Lajmet

Vushtrri, 19 gusht 2026 – Një delegacion nga Republika e Maqedonisë së Veriut, i kryesuar nga z. Aleksandar Pandov, Drejtor i Drejtorisë për Ekzekutimin e Sanksioneve, vizitoi Akademinë e Kosovës për Siguri Publike (AKSP), ku u prit nga ushtruesi i detyrës së Drejtorit të Përgjithshëm të AKSP-së, z. Shpend Shabani, me bashkëpunëtorë, si dhe nga z. Ismail Dibrani, Drejtor i Përgjithshëm i Shërbimit Korrektues të Kosovës (SHKK) me bashkëpunëtorë.

Z. Shpend Shabani i uroi mirëseardhje delegacionit dhe e falënderoi për vizitën, duke vlerësuar rëndësinë e bashkëpunimit ndërinstitucional ndërmjet institucioneve të sigurisë së Republikës së Kosovës dhe atyre të Republikës së Maqedonisë së Veriut.

Në këtë drejtim, z. Shabani theksoi se AKSP mbetet e hapur dhe e gatshme për thellimin e bashkëpunimit me institucionet homologe të Republikës së Maqedonisë së Veriut, veçanërisht përmes shkëmbimit të përvojave, praktikave të mira dhe njohurive profesionale, me synim fuqizimin e mëtejshëm të kapaciteteve të institucioneve të sigurisë dhe kontribuimin në zhvillimin e bashkëpunimit rajonal, si dhe më gjerë.

Drejtori i SHKK-së, Ismail Dibrani, u uroi të pranishmëve mirëseardhje në Kosovë dhe në Akademi, duke çmuar bashkëpunimin profesional që kanë të dyja institucionet përkatëse për ekzekutimin e sanksioneve penale të të dyja shteteve, pra Shërbimi Korrektues i Kosovës dhe Drejtoria për Ekzekutimin e Sanksioneve e Maqedonisë së Veriut.

Ai i njoftoi shkurtimisht të pranishmit lidhur me rolin, misionin dhe fushëveprimtarinë e Shërbimit Korrektues të Kosovës (SHKK), duke theksuar se kjo vizitë paraqet një mundësi të mirë për njohje më të afërt me punën, praktikat dhe përvojat e këtij institucioni. Duke vlerësuar nivelin e lartë të bashkëpunimit ndërinstitucional, drejtori Dibrani shprehu gatishmërinë për të vazhduar dhe thelluar shkëmbimin e përvojave dhe praktikave të mira, jo vetëm me homologët nga Republika e Maqedonisë së Veriut, por edhe me institucionet homologe nga vendet e rajonit.

Gjatë takimit, delegacioni nga Republika e Maqedonisë së Veriut u njoftua për misionin, funksionin dhe aktivitetet e AKSP-së, si dhe për bashkëpunimin e saj me institucionet vendore, rajonale dhe ndërkombëtare në fushën e sigurisë publike. Në veçanti, u prezantua bashkëpunimi ndërmjet AKSP-së dhe institucioneve të sigurisë së Republikës së Maqedonisë së Veriut, me theks në shkëmbimin e përvojave dhe zhvillimin e kapaciteteve profesionale.

Nga ana e tij, Drejtori i Drejtorisë për Ekzekutimin e Sanksioneve të Maqedonisë së Veriut, Aleksandar Pandov, shprehu mirënjohje për mikpritjen e ofruar në AKSP, si dhe vlerësoi lart të arriturat e Akademisë në ndërtimin dhe zhvillimin e kapaciteteve profesionale në fushën e sigurisë publike.

Përfaqësuesit e delegacionit të Republikës së Maqedonisë së Veriut veçanërisht vlerësuan rolin e AKSP-së në ofrimin e programeve të avancuara të trajnimit profesional, në përputhje me standardet dhe praktikat bashkëkohore ndërkombëtare.

Në përfundim, të dyja palët shprehën gatishmërinë për vazhdimin dhe avancimin e bashkëpunimit, duke vlerësuar se shkëmbimi i vazhdueshëm i përvojave dhe praktikave profesionale ndërmjet institucioneve homologe kontribuon në forcimin e kapaciteteve institucionale dhe në avancimin e sigurisë publike në nivel rajonal.

Vushtrri, 14 gusht 2026 – Në Akademinë e Kosovës për Siguri Publike (AKSP) u zhvillua sot ceremonia solemne e diplomimit të gjeneratës së 46-të të kadetëve të Shërbimit Korrektues të Kosovës (SHKK). Pas përfundimit me sukses të trajnimit profesional, 100 zyrtarë të rinj korrektues i bashkohen SHKK-së, duke kontribuar në përmbushjen e misionit të këtij institucioni për garantimin e sigurisë dhe zbatimin e standardeve profesionale në sistemin korrektues.

Në ceremoninë solemne morën pjesë personalitete të larta shtetërore, përfshirë Kryeministrin në detyrë të Republikës së Kosovës, z. Albin Kurti, Zëvendëskryeministren dhe ministren në detyrë të Drejtësisë, znj. Donika Gërvalla-Schwarz, drejtues dhe përfaqësues të institucioneve vendore dhe ndërkombëtare, eprorë dhe zyrtarë të Shërbimit Korrektues të Kosovës dhe të Agjencioneve të tjera të Sigurisë, zyrtarë të lartë të Akademisë së Kosovës për Siguri Publike, si dhe familjarë të kadetëve të sapodiplomuar.

Kryeministri në detyrë i Republikës së Kosovës, z. Albin Kurti, në fjalën e tij drejtuar kadetëve, theksoi se detyra e zyrtarit korrektues përfaqëson një përgjegjësi të madhe dhe një profesion që kërkon disiplinë, integritet dhe përkushtim për sigurinë, rendin dhe respektimin e dinjitetit të personave të privuar nga liria.

Ai tha se, nga sot, zyrtarët e rinj korrektues përfaqësojnë shtetin dhe institucionet e Republikës së Kosovës dhe se, në çdo situatë, duhet të veprojnë me profesionalizëm, në përputhje me ligjin dhe me dinjitet.

“Nga nesër fillon përgjegjësia e vërtetë. Mbajeni lart uniformën, zbatoni ligjin dhe shërbeni me ndershmëri, duke afirmuar profesionalizmin për çdo ditë dhe në secilën situatë”, tha Kryeministri Kurti.

Në përfundim të fjalës së tij, Kryeministri Kurti falënderoi Shërbimin Korrektues të Kosovës, Akademinë e Kosovës për Siguri Publike, instruktorët dhe familjarët e kadetëve për mbështetjen e tyre gjatë rrugëtimit profesional.

Zëvendëskryeministrja dhe ministrja në detyrë e Drejtësisë, znj. Donika Gërvalla-Schwarz, përgëzoi kadetët për përfundimin me sukses të trajnimit, duke theksuar se respektimi i dinjitetit njerëzor duhet të jetë parim themelor në ushtrimin e detyrës së zyrtarit korrektues.

Ajo theksoi se detyra e zyrtarëve korrektues nuk lidhet vetëm me ruajtjen e rendit, por edhe me garantimin e sigurisë, ligjshmërisë dhe trajtimit njerëzor të personave të privuar nga liria.

“Detyra juaj nuk është vetëm të ruani rendin, por të bëni të mundur që siguria, ligjshmëria dhe trajtimi njerëzor të bashkëjetojnë çdo ditë në institucionet tona korrektuese. Një sistem korrektues modern nuk mund të mjaftohet vetëm me ekzekutimin e dënimit, por duhet të krijojë kushte që një person, pas përfundimit të dënimit, të ketë mundësi reale për rehabilitim dhe rikthim në shoqëri. Dhe në këtë proces, roli juaj është i pazëvendësueshëm”, tha Gërvalla-Schwarz.

Drejtori i SHKK-së, z. Ismail Dibrani, pasi uroi kadetët për diplomimin, u bëri thirrje zyrtarëve të rinj korrektues që detyrën ta ushtrojnë me profesionalizëm, integritet dhe respekt për dinjitetin njerëzor.

Ai theksoi se roli i zyrtarëve korrektues nuk kufizohet vetëm në garantimin e sigurisë, rendit dhe disiplinës në institucionet korrektuese, por përfshin edhe mbështetjen e proceseve të rehabilitimit dhe riintegrimit të të burgosurve.

“Për ju, kjo është dita kur një ëndërr, një përpjekje dhe një angazhim i gjatë marrin formë. Të jesh zyrtar korrektues nuk do të thotë të veshësh thjesht një uniformë. Do të thotë të mbash mbi vete besimin që institucionet e Republikës së Kosovës vendosin mbi ju”, tha Dibrani.

Ushtruesi i detyrës së Drejtorit të Përgjithshëm të AKSP-së, z. Shpend Shabani, uroi kadetët për përfundimin me sukses të trajnimit profesional, duke theksuar se detyra e zyrtarit korrektues kërkon profesionalizëm, disiplinë, vetëkontroll dhe integritet, si dhe angazhim të vazhdueshëm në garantimin e sigurisë dhe mbështetjen e proceseve të risocializimit.

“Certifikata që merrni sot nuk është vetëm dëshmi se keni përfunduar programin, ajo është edhe një premtim profesional ndaj Republikës së Kosovës se dijen, aftësitë dhe autoritetin që ju është besuar do t’i përdorni me ndershmëri”, tha z. Shabani.

Në emër të Akademisë së Kosovës për Siguri Publike, z. Shabani përgëzoi zyrtarët e rinj korrektues dhe u uroi një karrierë të ndërtuar mbi profesionalizëm, disiplinë dhe integritet.

“Profesionalizmi juaj do të shihet kur askush nuk ju vëzhgon. Integriteti juaj do të provohet kur vendimi i drejtë është më i vështiri. Ndërsa nderi i uniformës do të varet çdo ditë nga mënyra se si ju e mbani atë. Andaj, shërbejini ligjit. Ruajeni integritetin. Nderojeni uniformën dhe Republikën e Kosovës”, u shpreh z. Shabani.

Almendina Ajvazi, kadete, falënderoi të gjithë ata që u angazhuan për arritjet dhe përmbylljen me sukses të trajnimit profesional,  ndërsa premtoi  se punën e zyrtarëve korrektues do ta ushtrojnë me përgjegjësi, integritet, dispilinë duke respektuar ligjin.

Ceremonia e diplomimit të kadetëve për zyrtarë korrektues u përmbyll me koktej rasti për të gjithë pjesmarrësit.  

Vushtrri, 6 gusht 2026 – Ushtruesi i detyrës së Drejtorit të Përgjithshëm të Akademisë së Kosovës për Siguri Publike (AKSP), z. Shpend Shabani, së bashku me bashkëpunëtorët, priti në takim Drejtorin e Departamentit për Rend dhe Siguri Publike pranë Misionit të OSBE-së në Kosovë, z. Bertram Welsing.

Me këtë rast, drejtori Shabani i uroi mirëseardhje z. Welsing dhe e falënderoi për mbështetjen e vazhdueshme që Misioni i OSBE-së në Kosovë i ka ofruar Akademisë në zhvillimin e kapaciteteve profesionale dhe realizimin e projekteve në fushën e sigurisë publike.

Ai theksoi rëndësinë e forcimit të bashkëpunimit ndërinstitucional dhe zgjerimit të partneritetit me institucionet homologe ndërkombëtare.

Drejtori Welsing vlerësoi zhvillimin institucional dhe të arriturat e Akademisë, duke rikonfirmuar përkushtimin e Misionit të OSBE-së në Kosovë për të vazhduar mbështetjen dhe partneritetin strategjik me AKSP-në edhe në periudhën 2026 e tutje.

Ai theksoi gatishmërinë e OSBE-së për të mbështetur prioritetet zhvillimore të Akademisë dhe për të kontribuar në realizimin e vizionit të saj afatgjatë si institucion qendror në fushën e sigurisë publike në Republikën e Kosovës. 

Vushtrri, 3 gusht 2026 - Akademia e Kosovës për Siguri Publike (AKSP) njofton zyrtarët e institucioneve të sigurisë publike se janë shpallur konkurset për pranimin e studentëve në vitin e parë të studimeve në programin studimor Bachelor "Siguri Publike", në Fakultetin e Sigurisë Publike, për vitin akademik 2026/2027.

Në kuadër të këtyre konkurseve janë miratuar gjithsej 55 vende nga Agjencia e Kosovës për Akreditim për regjistrim të studentëve për vit akademik, të ndara sipas institucioneve si në vijim:

• Policia e Kosovës - 26 vende;

• Shërbimi Korrektues i Kosovës - 20 vende;

• Agjencia e Menaxhimit Emergjent - 8 vende;

• Inspektorati Policor i Kosovës - 1 vend.

Kushtet e përgjithshme për aplikim janë:

• Të kenë përfunduar me sukses shkollimin e mesëm, të dëshmuar me diplomë;

• Të jenë të punësuar në institucionin përkatës të sigurisë publike.

Kushtet e veçanta për aplikim, dokumentacioni i nevojshëm, mënyra e testimit dhe procedurat e tjera janë të përcaktuara në konkurset e veçanta të shpallura nga secili institucion i sigurisë publike.

Vegzat (linqet) i gjeni sin ë vijim:

Policia e Kosovës - Konkurs i brendshëm për pranimin e studentëve në programin studimor Siguri Publike:
Shkarko dokumentin

Shërbimi Korrektues i Kosovës - Konkurs i brendshëm për pranimin e studentëve në programin studimor Siguri Publike:

Shkarko dokumentin

Agjencia e Menaxhimit Emergjent - Konkurs i brendshëm për pranimin e studentëve në programin studimor Siguri Publike:

Shkarko dokumentin

Inspektorati Policor i Kosovës - Konkurs i brendshëm për pranimin e studentëve në programin studimor Siguri Publike:

Shkarko dokumentin

Afati për aplikim është nga 3 gusht 2026 deri më 17 gusht 2026. Procedurat e pranimit, duke përfshirë pranimin e aplikimeve, verifikimin e dokumentacionit, organizimin e testimit, vlerësimin dhe përzgjedhjen e kandidatëve, administrohen nga institucionet përkatëse të sigurisë publike, në përputhje me konkurset e shpallura prej tyre.

Në Fakultetin e Sigurisë Publike të Akademisë së Kosovës për Siguri Publike do të regjistrohen kandidatët që i përfundojnë me sukses procedurat e pranimit dhe përzgjidhen sipas konkurseve të administruara nga institucionet e sigurisë publike, në kuadër të kuotave të miratuara.

Për informata më të detajuara lidhur me kushtet e përgjithshme dhe të veçanta për aplikim, dokumentacionin e nevojshëm, mënyrën e testimit, procedurat e përzgjedhjes dhe çështjet e tjera që lidhen me procesin e pranimit, kandidatët duhet t’u referohen konkurseve të veçanta të shpallura nga institucionet përkatëse të sigurisë publike, të cilat janë bashkëngjitur këtij njoftimi.

Për informata shtesë lidhur me programin studimor, kandidatët mund të kontaktojnë Fakultetin

e Sigurisë Publike në:

E-mail: [email protected] 

Tel.: +383 (0)28 590 070

Vushtrri, 29 korrik 2026 - Akademia e Kosovës për Siguri Publike (AKSP) mirëpriti në një vizitë zyrtare Zëvendësministrin e Punëve të Brendshme të Republikës së Kosovës, z. Enver Dugolli së bashku me Shefen e Kabinetit të MPB-së znj. Jeta Tela-Shema, të cilët u pritën  nga u.d. Drejtori i Përgjithshëm i AKSP-së z. Shpend Shabani, së bashku me bashkëpunëtorët e tij.

Gjatë takimit, z. Shabani prezantoi zhvillimet kryesore të AKSP-së, të arriturat në fushën e trajnimit dhe arsimit të lartë, si dhe prioritetet strategjike dhe sfidat për zhvillimin e mëtejmë të institucionit. Diskutimet u fokusuan në zhvillimet aktuale të AKSP-së, synimet dhe perspektivën e zhvillimit të saj si institucioni qendror për arsimin e lartë dhe trajnimin profesional në fushën e sigurisë publike.

Zëvendësministri Dugolli vlerësoi rezultatet e arritura dhe kontributin e AKSP-së në zhvillimin e kapaciteteve profesionale të institucioneve të sigurisë publike. Ai shprehu mbështetjen e plotë të Ministrisë së Punëve të Brendshme për zhvillimin dhe fuqizimin e mëtejshëm të AKSP-së, duke theksuar rëndësinë e saj si institucion kyç në përgatitjen profesionale të zyrtarëve të institucioneve të sigurisë publike.

Vizita u përmbyll me konfirmimin e përkushtimit për realizimin e objektivave strategjike të AKSP-së dhe vazhdimin e mbështetjes për avancimin e saj në zhvillimin e kapaciteteve në sektorin e sigurisë publike.

Prizren, 21 korrik 2026 - Delegacioni i Akademisë së Kosovës për Siguri Publike (AKSP), i udhëhequr nga Ushtruesi i Detyrës së Drejtorit të Përgjithshëm, z. Shpend Shabani, zhvilloi një vizitë zyrtare në Universitetin “Ukshin Hoti” në Prizren, ku u prit nga Rektori i Universitetit, Prof. Asoc. Dr. Mentor Alishani, së bashku me ekipin drejtues të universitetit.

Pjesë e delegacionit të AKSP-së ishin Prof. Dr. Vilard Bytyqi, Ushtrues i Detyrës së Dekanit të Fakultetit të Sigurisë Publike, Prof. Dr. Anita Zenuni, Prodekane e Fakultetit të Sigurisë Publike, z. Fitim Osmani, Ushtrues i Detyrës së Drejtorit të Departamentit për Planifikim Strategjik dhe Çështje Ligjore, si dhe z. Avni Istrefi, Udhëheqës i Divizionit për Marrëdhënie me Jashtë. Në takim morën pjesë edhe prorektorët e Universitetit “Ukshin Hoti” në Prizren, Prof. Ass. Dr. Luan Vardari, Prof. Asoc. Dr. Serdan Kervan dhe Prof. Ass. Dr. Adelina Rakaj.

Qëllimi i takimit ishte inicimi i bashkëpunimit ndërinstitucional dhe shqyrtimi i mundësive për nënshkrimin e një marrëveshjeje bashkëpunimi ndërmjet Akademisë së Kosovës për Siguri Publike dhe Universitetit “Ukshin Hoti” në Prizren, në fusha me interes të përbashkët. Gjatë takimit u diskutua për krijimin e një partneriteti të qëndrueshëm, me fokus në arsimin e lartë, kërkimin shkencor, zhvillimin profesional dhe realizimin e projekteve të përbashkëta.

Takimi u zhvillua në një atmosferë konstruktive dhe me frymë të bashkëpunimit të ndërsjellë. Në përfundim, palët u dakorduan për vazhdimin e procedurave drejt finalizimit dhe nënshkrimit të marrëveshjes së bashkëpunimit, e cila pritet të kontribuojë në forcimin e bashkëpunimit institucional, avancimin e veprimtarisë akademike dhe shkencore, si dhe në zhvillimin e iniciativave të përbashkëta në interes të institucioneve të Republikës së Kosovës.

Vushtrri, 14 korrik 2026 - Sot, në Akademinë e Kosovës për Siguri Publike (AKSP), u mbajt mbledhja e 45-të e Bordit të Akademisë, e kryesuar nga Drejtori i Përgjithshëm i Shërbimit Korrektues të Kosovës, njëherësh Kryesues i Bordit, z. Ismail Dibrani.

Në mbledhje morën pjesë Drejtori i Përgjithshëm i Policisë së Kosovës, z. Gazmend Hoxha, Kryeshefi Ekzekutiv i Inspektoratit Policor të Kosovës, z. Kushtrim Hodaj, Drejtori i Përgjithshëm i Doganës së Kosovës, z. Agron Llugaliu, Drejtori i Përgjithshëm i Akademisë së Kosovës për Siguri Publike, z. Shpend Shabani, si dhe në cilësinë e përfaqësuesit të Shërbimit Sprovues të Kosovës, z. Driton Zogiani, i cili mori pjesë në zëvendësim të Drejtorit të Përgjithshëm të SHSK-së. Po ashtu në takim morrën pjesë përfaqësues nga OSBE si dhe zyrtar të lartë të AKSP-së.

Në përputhje me rendin e ditës, Bordi fillimisht miratoi procesverbalet dhe transkriptet e mbledhjeve të mëparshme, ndërsa më pas shqyrtoi çështje me rëndësi strategjike për zhvillimin institucional të AKSP-së.

Gjatë mbledhjes, Bordi u informua lidhur me zhvillimin e arsimit të lartë në AKSP, përfshirë procesin e riakreditimit institucional dhe programor të Programit Bachelor “Siguria Publike”, rritjen e pjesëmarrjes së institucioneve të sigurisë publike në këtë program si dhe zhvilloi një diskutim lidhur me mundësitë e ndërlidhjes së këtij programi me zhvillimin profesional dhe sistemin e karrierës në institucionet e sigurisë publike. Bordi miratoi kuotat për pranimin e studentëve në Programin Bachelor “Siguria Publike” për vitin akademik 2026/2027, duke krijuar kështu bazën për fillimin e procedurave të pranimit të studentëve nga institucionet e sigurisë publike në programin bachelor.

Po ashtu, Bordi u njoftua me përgatitjet për organizimin e Konferencës V-të Shkencore Ndërkombëtare të AKSP-së, e cila do të mbahet gjatë muajit nëntor 2026, si dhe me aktivitetet e ndërmarra në kuadër të organizimit të saj.

Në vijim, anëtarët e Bordit shqyrtuan rishikimin e Planit të Trajnimeve të AKSP-së për vitin 2026, i cili është harmonizuar me nevojat dhe prioritetet e institucioneve të sigurisë publike, si dhe u informuan për ecurinë e procesit të akreditimit dhe validimit të programeve profesionale të AKSP-së nga Autoriteti Kombëtar i Kualifikimeve.

Prishtinë, 2 korrik 2026 - Me rastin e shënimit të 20-vjetorit të themelimit të Inspektoratit Policor të Kosovës (IPK), u organizua një ceremoni solemne, në të cilën morën pjesë përfaqësues të institucioneve shtetërore, partnerë vendorë dhe ndërkombëtarë, si dhe personalitete të larta të sektorit të sigurisë. Në këtë ceremoni mori pjesë edhe ushtruesi i detyrës së Drejtorit të Përgjithshëm të Akademisë së Kosovës për Siguri Publike (AKSP), z. Shpend Shabani.

Në kuadër të këtij jubileu, IPK vlerësoi rrugëtimin e saj dydekadësh në forcimin e llogaridhënies, integritetit institucional dhe mbikëqyrjes së Policisë së Kosovës, si dhe ndau mirënjohje dhe medalje për individë dhe institucione që kanë dhënë kontribut të veçantë në zhvillimin dhe suksesin e institucionit.

Për bashkëpunimin e frytshëm dhe kontributin e vazhdueshëm në zhvillimin profesional dhe institucional të Inspektoratit Policor të Kosovës, Akademia e Kosovës për Siguri Publike u nderua me medalje mirënjohjeje. Kjo medalje iu dorëzua ushtruesit të detyrës së Drejtorit të Përgjithshëm të AKSP-së, z. Shpend Shabani, në shenjë vlerësimi për partneritetin institucional dhe mbështetjen e vazhdueshme ndërmjet dy institucioneve.

Ky vlerësim dëshmon bashkëpunimin e ngushtë ndërinstitucional dhe përkushtimin e përbashkët për ngritjen e kapaciteteve profesionale, forcimin e integritetit institucional dhe avancimin e sektorit të sigurisë në Republikën e Kosovës.

Vushtrri, 25 qershor 2026 - Akademia e Kosovës për Siguri Publike ka kënaqësinë të njoftojë organizimin e Konferencës V-të Shkencore Ndërkombëtare në Siguri Publike, e cila do të mbahet më 19-20 nëntor 2026 në Akademinë e Kosovës për Siguri Publike.

Tema e konferencës është: “Siguria Publike në Epokën Digjitale: Inteligjenca Artificiale, Kërcënimet Kibernetike dhe Sfidat Bashkëkohore”

Konferenca synon të shërbejë si platformë ndërkombëtare për shkëmbimin e njohurive, përvojave dhe rezultateve të hulumtimeve shkencore në fushën e sigurisë publike, me fokus në transformimin digjital, inteligjencën artificiale, sigurinë kibernetike dhe sfidat bashkëkohore të sigurisë.

Ftohen të marrin pjesë studiues, profesorë universitarë, hulumtues, ekspertë të sigurisë, përfaqësues të institucioneve publike dhe organizatave vendore e ndërkombëtare, studentë të nivelit master dhe doktoratë, si dhe profesionistë të fushave relevante.

Abstraktet dhe punimet e pranuara do të publikohen në Librin e Punimeve të Konferencës (Conference Proceedings) me ISBN.

Afatet:

• Afati për dorëzimin e abstrakteve: 15 shtator 2026

• Njoftimi për pranimin e abstrakteve: 25 shtator 2026

• Afati i regjistrimit për pjesëmarrje: 30 shtator 2026

• Dorëzimi i punimeve të plota: 25 tetor 2026

• Publikimi i agjendës finale të konferencës: 10 nëntor 2026

• Tarifa e pjesëmarrjes: Pa pagesë

• Mbajtja e konferencës: 19-20 nëntor 2026

Abstraktet (deri 300 fjalë në shqip ose anglisht) dhe punimet e plota dërgohen në e-mail: [email protected]

Për informata të detajuara lidhur me konferencën, temat, afatet, udhëzimet për autorët dhe procedurat e aplikimit, ju lutemi konsultoni dokumentet e publikuara më poshtë.

• Thirrja për punime shkencore

• Template për abstrakt

• Template për punimin e plotë

Informata për kontakt:

Akademia e Kosovës për Siguri Publike

Rr. “Gjergj Kastrioti Skënderbeu”, Nr. 60, 42 000 Vushtrri, Republika e Kosovës

E-mail: [email protected] 

Tel: +383 28 590 070; Ext: 141

Web: https://aksp-ks.net/

Vushtrri, 26 qershor 2026 - Akademia e Kosovës për Siguri Publike organizoi një ceremoni të veçantë gjatë së cilës familjes së të ndjerit Prof. Ass. Dr. Nexhat Jasharit iu nda Mirënjohja Post Mortem, në shenjë nderimi dhe mirënjohjeje për kontributin e tij të çmuar akademik dhe profesional në zhvillimin e Akademisë së Kosovës për Siguri Publike.

Mirënjohja iu dorëzua bashkëshortes dhe fëmijëve të profesorit nga Drejtori i Përgjithshëm i AKSP-së, z. Shpend Shabani, në praninë e u.d. Dekanit të Fakultetit të Sigurisë Publike, Prof. Asoc. Dr. Vilard Bytyqi, u.d. Prodekanes, Dr. sc. Anita Zenuni, si dhe u.d. Drejtorit të Departamentit për Planifikim Strategjik dhe Çështje Ligjore, z. Fitim Osmani.

Me këtë akt simbolik, Akademia shprehu respektin dhe vlerësimin e saj institucional për figurën dhe veprën e Prof. Nexhat Jasharit, i cili gjatë angazhimit të tij dha një kontribut të çmuar në ngritjen dhe zhvillimin e përgjithshëm të Akademisë, e veçanërisht të arsimit të lartë në fushën e sigurisë publike.

Vushtrri, 17 qershor 2026 - Në Akademinë e Kosovës për Siguri Publike (AKSP), u mbajt takimi i radhës i Bordit ALUMNI, me pjesëmarrjen e anëtarëve të bordit dhe përfaqësuesve të Akademisë.

Gjatë takimit u shqyrtua Draft-Dokumenti i Planit të Aktiviteteve ALUMNI të AKSP-së për vitin 2026, duke përfshirë komentet dhe sugjerimet e pranuara gjatë procesit të konsultimit dhe rishikimit të dokumentit.

Pjesëmarrësit zhvilluan diskutime konstruktive lidhur me aktivitetet e parapara, prioritetet strategjike dhe mundësitë për avancimin e mëtejmë të rrjetit ALUMNI, me fokus në forcimin e bashkëpunimit profesional, shkëmbimin e përvojave dhe promovimin e zhvillimit të vazhdueshëm profesional të anëtarëve të tij.

Pas shqyrtimit të propozimeve dhe rekomandimeve të paraqitura, Bordi ALUMNI miratoi Planin Vjetor të Aktiviteteve ALUMNI të AKSP-së për vitin 2026, i cili do të shërbejë si dokument orientues për realizimin e aktiviteteve dhe nismave të planifikuara gjatë vitit.

Akademia e Kosovës për Siguri Publike mbetet e përkushtuar në mbështetjen e rrjetit ALUMNI dhe në promovimin e aktiviteteve që kontribuojnë në fuqizimin e bashkëpunimit profesional dhe institucional ndërmjet anëtarëve të saj.