Lajmet

Vushtrri, 15 tetor 2026 – Përfaqësues të Akademisë së Kosovës për Siguri Publike (AKSP), të udhëhequr nga Shpend Shabani, ushtrues i detyrës së Drejtorit të Përgjithshëm të AKSP-së, së bashku me Xhemil Klinakun, Udhëheqës i Divizionit për Burime Njerëzore, morën pjesë në Konferencën Vjetore të Asociacionit Rajonal të Akademive Policore dhe Qendrave të Trajnimit të Evropës Juglindore (RAPATC SEE), e cila u mbajt nga 13 deri më 15 tetor 2026 në Krani të Maqedonisë së Veriut.

RAPATC SEE i themeluar në tetor të vitit 2025, me Kosovën si një nga anëtaret themeluese, synon forcimin e bashkëpunimit rajonal, shkëmbimin e përvojave dhe avancimin e arsimit dhe trajnimit policor.

Një nga zhvillimet e rëndësishme të konferencës është kalimi i kryesimit të Asociacionit nga Maqedonia e Veriut te Shqipëria, në përputhje me parimin e rotacionit vjetor, duke vazhduar kështu angazhimin e përbashkët të anëtarëve për realizimin e objektivave të Asociacionit.

Pjesëmarrja e AKSP-së në këtë konferencë riafirmon përkushtimin e institucionit për thellimin e bashkëpunimit rajonal, forcimin e partneriteteve ndërinstitucionale dhe shkëmbimin e përvojave profesionale, në funksion të zhvillimit të kapaciteteve dhe avancimit të arsimit e trajnimit në fushën e sigurisë publike.

Budapest, 8 tetor 2026 - Në selinë e Agjencisë së Bashkimit Evropian për Trajnimin për Zbatimin e Ligjit (CEPOL), në Budapest të Hungarisë, u mbajt Takimi i 20-të i Njësive Kombëtare të CEPOL-it (CNU).

Në këtë takim, Akademia e Kosovës për Siguri Publike (AKSP) u përfaqësua nga Avni Istrefi, Koordinator Kombëtar i Kosovës për CEPOL dhe udhëheqës i Divizionit për Marrëdhënie me Jashtë.

Takimi mblodhi përfaqësues të njësive kombëtare dhe partnerëve të CEPOL-it, me qëllim të forcimit të bashkëpunimit, shkëmbimit të përvojave dhe koordinimit të aktiviteteve në fushën e trajnimit për zbatimin e ligjit.

Ky takim shërben si një platformë e rëndësishme për adresimin e nevojave të përbashkëta dhe avancimin e bashkëpunimit ndërmjet institucioneve pjesëmarrëse.

Agjenda përfshiu diskutime mbi përmirësimin e proceseve të CEPOL-it, shkëmbimin e praktikave të mira ndërmjet njësive kombëtare, zhvillimin e lidershipit dhe përparësitë e agjendës së trajnimeve.

Vëmendje e veçantë iu kushtua platformës LEEd, inteligjencës artificiale në trajnim, sigurisë kibernetike, zhvillimit të programeve të të nxënit dhe definimit të mjeteve të përbashkëta të Bashkimit Evropian për zbatimin e ligjit.

Vushtrri, 2 tetor 2026 - Fakulteti i Sigurisë Publike i Akademisë së Kosovës për Siguri Publike, organizoi sot, Ditën e Mirëseardhjes dhe Orientimit Akademik për studentët e rinj të Programit Bachelor në Siguri Publike, të regjistruar në vitin akademik 2026/2027.

Gjenerata e re përbëhet nga pjesëtarë të institucioneve të sigurisë publike, përfshirë Policinë e Kosovës, Shërbimin Korrektues të Kosovës, Inspektoratin Policor të Kosovës dhe Agjencinë e Menaxhimit të Emergjencave.

Në ceremoninë e mirëseardhjes, studentëve iu drejtuan u.d. Drejtori i Përgjithshëm i AKSP-së, z. Shpend Shabani, dhe u.d. Dekani i Fakultetit të Sigurisë Publike, Prof. Asoc. Dr. Vilard Bytyqi.

Në fjalën e tij, u.d. Drejtori i Përgjithshëm, z. Shpend Shabani, u uroi mirëseardhje studentëve, duke theksuar se ata vijnë në Akademi me përvojë profesionale dhe përgjegjësi institucionale dhe se programi duhet të shërbejë për avancimin e mëtejshëm të njohurive dhe profesionalizmit të tyre. Duke theksuar se: “Ju nuk vini këtu si njerëz që sapo po njiheni me sigurinë publike. Vini me përvojë, me përgjegjësi, me sfida të përditshme dhe me një institucion pas vetes. Pikërisht për këtë arsye, ky program duhet të jetë më shumë se një diplomë. Duhet të jetë një mundësi për ta ngritur në një nivel tjetër atë që tashmë dini dhe atë që tashmë bëni.”

Duke folur për rëndësinë e kësaj gjenerate për Akademinë, theksoi se fillimi i studimeve vjen pas një periudhe të rëndësishme pune për rikthimin e akreditimit institucional dhe të Programit Bachelor në Siguri Publike.

Ndërsa u.d. Dekani i Fakultetit të Sigurisë Publike, Prof. Asoc. Dr. Vilard Bytyqi, theksoi se fillimi i vitit të ri akademik ka një domethënie të veçantë për Fakultetin, pasi pas një pauze trevjeçare në pranimin e studentëve të rinj, FSP-ja po e fillon përsëri vitin akademik me një gjeneratë të re. Duke iu referuar rolit që pjesëtarët e institucioneve të sigurisë publike kanë në shërbim të qytetarëve dhe të shtetit, u.d. Dekani theksoi se arsimimi i tyre në Fakultetin e Sigurisë Publike tejkalon dimensionin individual të zhvillimit profesional, duke theksuar se: “Arsimimi juaj këtu nuk ka të bëjë vetëm me zhvillimin tuaj individual profesional, por edhe me forcimin e kapaciteteve tuaja për t’i shërbyer qytetarit, për ta zbatuar ligjin dhe për t’i mbrojtur vlerat kushtetuese të Republikës së Kosovës,” theksoi prof. Bytyqi.

Ai inkurajoi studentët që Fakultetin ta shohin jo vetëm si vend të ligjëratave dhe provimeve, por si hapësirë të zhvillimit akademik, profesional dhe të shkëmbimit të përvojave.

Pas pjesës së ceremonisë së mirëseardhjes dhe prezantimeve, drejtuesit e AKSP-së dhe FSP-së, të ftuarit, personeli akademik, drejtues dhe administrativ dhe studentët realizuan një fotografi të përbashkët me rastin e fillimit të vitit të ri akademik 2026/2027.

Më pas, aktiviteti vazhdoi sipas agjendës me programin e orientimit akademik, duke prezantuar stafin akademik, më pas studentët  patën rastin të njoftohet me të drejtat dhe detyrimet e tyre, komunikimin me Fakultetin, shërbimet dhe mbështetjen administrative, përdorimin e Sistemit të Menaxhimit Universitar (SMU), qasjen në bibliotekë dhe burimet mësimore, si dhe procedurat për kërkesa, ankesa dhe çështje të tjera studentore.

Pastaj programi vijoi me vizitën orientuese në hapësirat e AKSP-së, gjatë së cilës studentët u njohën nga afër me Zyrën e Shërbimeve Studentore, bibliotekën, hapësirat mësimore, shërbimet e teknologjisë informative, kushtet për akomodimin, kuzhinën/mensën, hapësirat sportive dhe rekreative, shërbimet shëndetësore dhe shërbimet e tjera që Akademia ofron për studentët.

Aktivitetin e nderuan me praninë e tyre edhe ish-Drejtori i Përgjithshëm i Akademisë së Kosovës për Siguri Publike, z. Ismail Smakiqi, dhe ish-Dekani i Fakultetit të Sigurisë Publike, Prof. Asoc. Dr. Bejtush Gashi.

Me këtë aktivitet, Fakulteti i Sigurisë Publike shënoi fillimin e rrugëtimit akademik të gjeneratës së re të studentëve të Programit Bachelor në Siguri Publike për vitin akademik 2026/2027.

Vushtrri, më 29 shtator 2026 - Në Akademinë e Kosovës për Siguri Publike u mbajt ceremonia e ndarjes së diplomave për studentët e Fakultetit të Sigurisë Publike, të cilët kanë përfunduar me sukses studimet në programin Bachelor në Siguri Publike gjatë viteve 2025 - 2026.

Ceremonia e organizuar nga Fakulteti i Sigurisë Publike, mblodhi së bashku të diplomuarit për të shënuar përfundimin e rrugëtimit të tyre akademik dhe për t’ua dorëzuar zyrtarisht diplomat e fituara pas përfundimit me sukses të programit të studimeve.

Në fjalën e tij para të pranishmëve, ushtruesi i detyrës së Dekanit të Fakultetit të Sigurisë Publike, Prof. Asoc. Dr. Vilard Bytyqi, vlerësoi gatishmërinë e të diplomuarve për t’iu përgjigjur ftesës së Fakultetit dhe Akademisë dhe për t’u ri-takuar në një ceremoni të përbashkët simbolike me rastin e pranimit të diplomave. Ai përgëzoi të diplomuarit për angazhimin, përkushtimin dhe rezultatet e treguara gjatë rrugëtimit të tyre akademik.

Në mënyrë të veçantë, u.d. Dekani prof. Bytyqi vlerësoi angazhimin studentëve të cilët paralelisht me studimet kanë vazhduar të kryejnë edhe detyrat e tyre operative në shërbim të institucioneve ligj-zbatuese dhe interesit publik. Gjithashtu theksoi se Akademia i ka bërë të gjitha përgatitjet e nevojshme që t’i pres studentët e rijnë që do t’i fillojnë studimet në vitin akademik 2026/2027.

Në emër të studentëve të diplomuar, të pranishmëve iu drejtua me një fjalë rasti edhe togeri Muhamed Berisha. Ai falënderoi Akademinë dhe Fakultetin e Sigurisë Publike për mundësinë e ofruar për studime, si dhe për mbështetjen e vazhdueshme gjatë gjithë periudhës së studimeve. Tog. Berisha vlerësoi veçanërisht mirëkuptimin dhe fleksibilitetin gjatë studimeve, i cili u ka mundësuar studentëve që krahas obligimeve akademike, të vazhdojnë të përmbushin edhe përgjegjësitë dhe detyrat e tyre profesionale.

Me këtë rast, në emër të studentëve të diplomuar, togeri Muhamed Berisha i ndau u.d. Dekanit të Fakultetit të Sigurisë Publike, Prof. Asoc. Dr. Vilard Bytyqi, një mirënjohje në shenjë falënderimi për përkushtimin dhe kontributin e dhënë gjatë rrugëtimit të tyre akademik.

Ceremonia u përmbyll me dorëzimin e diplomave dhe realizimin e një fotografie të përbashkët me të diplomuarit dhe pjesëmarrësit, duke shënuar kështu në mënyrë simbolike përfundimin e një etape të rëndësishme të rrugëtimit të tyre akademik dhe profesional.

Vushtrri, 18 shtator 2026 – Ushtruesi i Detyrës së Drejtorit të Përgjithshëm të Akademisë, z. Shpend Shabani, priti sot në takim instruktorin e taktikave mbrojtëse, z. Adnan Barileva, si dhe kadetët e Gjeneratës së 63-të të Policisë së Kosovës, Alketa Parduzi dhe Genc Aliu.

Me këtë rast, z. Shabani i përgëzoi instruktorin dhe kadetët për profesionalizmin, përkushtimin dhe nivelin e lartë të përgatitjes së dëshmuar gjatë pjesëmarrjes në Punëtorinë e Dytë Rajonale mbi Teknikat e Mbrojtjes, të mbajtur në Shkup, ku ata prezantuan teknikat për përdorimin e shufrës së hapur dhe të mbyllur.

Në shenjë vlerësimi për kontributin dhe profesionalizmin e treguar gjatë kësaj punëtorie, u.d. Drejtori i Përgjithshëm, z. Shpend Shabani, u ndau mirënjohje instruktorit Adnan Barileva dhe kadetëve Alketa Parduzi e Genc Aliu.

Punëtoria e Dytë Rajonale mbi Teknikat e Mbrojtjes u organizua nga Akademia Policore e Maqedonisë së Veriut, në cilësinë e Kryesuesit të radhës të Asociacionit Rajonal të Akademive Policore/Qendrave të Trajnimit të Evropës Juglindore (RAPATC SEE).

Shkup, 15-16 shtator 2026 – Një instruktor i taktikave mbrojtëse dhe dy kadetë të Trajnimit Profesional për Zyrtarë Policorë, të Gjeneratës së 63-të të Policisë së Kosovës në Akademinë e Kosovës për Siguri Publike (AKSP), morën pjesë në Punëtorinë e Dytë Rajonale mbi Teknikat e Mbrojtjes, të organizuar nga Kryesuesi i radhës i Asociacionit Rajonal të Akademive Policore/Qendrave të Trajnimit të Evropës Juglindore (RAPATC SEE), Akademia Policore e Maqedonisë së Veriut.

Punëtoria u mbajt më 15 dhe 16 shtator 2026, në ambientet e Akademisë Policore në Shkup, me pjesëmarrjen e përfaqësuesve të institucioneve policore dhe akademive të trajnimit nga rajoni.

Punëtoria kishte për qëllim përmbylljen e ciklit të zhvillimit të një kurrikule për teknikat themelore të mbrojtjes, të nevojshme për ushtrimin e autoritetit policor në situata të përditshme.

Në kuadër të punëtorisë u realizuan fotografi dhe xhirime të teknikave, skenarëve dhe ushtrimeve mbrojtëse, të cilat do të përdoren për përfshirjen dhe finalizimin e materialeve përkatëse në versionin përfundimtar të kurrikulës. Teknikat, skenarët dhe ushtrimet u demonstruan nga kadetët e policisë në palestrën e arteve marciale të Akademisë Policore në Shkup.

Instruktori Adnan Barileva dhe kadetët e Gjeneratës së 63-të të Policisë së Kosovës, Alketa Parduzi dhe Genc Aliu, demonstruan profesionalizëm dhe nivel të lartë të përgatitjes didaktike e fizike gjatë prezantimit të teknikave për përdorimin e shufrës së hapur dhe të mbyllur, si mjete për vënien nën kontroll të subjektit në rastet kur komunikimi verbal nuk është efektiv.

Përveç përfaqësuesve të Akademisë së Kosovës dhe nikoqirëve nga Maqedonia e Veriut, në punëtori morën pjesë edhe përfaqësues nga Greqia, Mali i Zi dhe Moldavia.

Asociacioni Rajonal i Akademive Policore/Qendrave të Trajnimit të Evropës Juglindore (RAPATC SEE) është themeluar më 14 tetor 2025 në Shkup, me pjesëmarrjen e përfaqësuesve nga Kosova, Shqipëria, Kroacia, Greqia, Maqedonia e Veriut, Mali i Zi, Sllovenia dhe Moldavia.

Vushtrri, 15 shtator 2026 - Akademia e Kosovës për Siguri Publike njofton të gjithë studiuesit, profesorët universitarë, hulumtuesit, ekspertët e sigurisë dhe profesionistët e fushave relevante se është zgjatur afati për dorëzimin e abstrakteve për Konferencën e V-të Shkencore Ndërkombëtare në Siguri Publike.

Sipas afateve të reja të përcaktuara për organizimin e konferencës, afati për dorëzimin e abstrakteve është zgjatur deri më 31 tetor 2026. Autorët do të njoftohen për pranimin e abstrakteve më së largu deri më 5 nëntor 2026, ndërsa regjistrimi për pjesëmarrje në konferencë do të bëhet deri më 10 nëntor 2026.

Njëkohësisht, është ndryshuar mënyra e dorëzimit të punimeve të plota. Pjesëmarrja dhe prezantimi i punimeve në konferencë realizohen në bazë të abstrakteve të pranuara, ndërsa autorëve të interesuar për publikimin e punimeve të plota u mundësohet dorëzimi i tyre edhe pas përfundimit të konferencës, më së largu deri më 31 dhjetor 2026. Punimet e dorëzuara për publikim do t’i nënshtrohen procedurave përkatëse të vlerësimit shkencor para publikimit.

Konferenca synon të shërbejë si platformë ndërkombëtare për shkëmbimin e njohurive, përvojave dhe rezultateve të hulumtimeve shkencore në fushën e sigurisë publike, me fokus të veçantë në transformimin digjital, inteligjencën artificiale, sigurinë kibernetike dhe sfidat bashkëkohore të sigurisë.

Afatet e përditësuara janë:

Dorëzimi i abstrakteve: deri më 31 tetor 2026

Njoftimi për pranimin e abstrakteve: deri më 5 nëntor 2026

Regjistrimi për pjesëmarrje: deri më 10 nëntor 2026

Publikimi i agjendës finale: 10 nëntor 2026

Mbajtja e konferencës: 19-20 nëntor 2026

Dorëzimi i punimeve të plota (nga autorët e interesuar për publikim): deri më 31 dhjetor 2026

Abstraktet dorëzohen në adresën elektronike: [email protected].

Për kriteret akademike dhe shkencore, formatin e abstraktit, formatin e punimit të plotë dhe informata të tjera rreth konferencës, të interesuarit mund t’u referohen dokumenteve të publikuara në thirrjen për punime të publikuar më 26.06.2026: https://aksp-ks.net/News/NewsArticle/872

Pjesëmarrja në konferencë është pa pagesë.

Vushtrri, 11 shtator 2026 – Sot, Akademinë e Kosovës për Siguri Publike (AKSP) e vizitoi z. Philippe Marie, Zëvendësudhëheqës i Ekipit pranë Programit të Bashkimit Evropian për Punë të Brendshme në Kosovë (HAPE), i cili u prit nga z. Shpend Shabani, u.d. Drejtor i Përgjithshëm i AKSP-së, së bashku me ekipin e tij.

Z. Marie shoqërohej nga dy pjesëtarë të Akademisë Policore të Francës, të specializuar në ngritjen e kapaciteteve në fushën e përdorimit të dronëve.

Gjatë takimit, z. Marie e njoftoi z. Shabani për aktivitetet e zhvilluara në kuadër të trajnimit të zyrtarëve të sigurisë publike në Kosovë për përdorimin e dronëve. Ai bëri të ditur se trajnimet kanë filluar në shtator deri në dhjetor të vitit 2025 dhe kanë vazhduar në mars dhe prill të vitit 2026, gjatë të cilave janë trajnuar 13 përdorues të dronëve, 11 zyrtarë policorë dhe 2 zyrtarë doganorë dhe 6 trajnerë të trajnerëve, prej tyre 5 zyrtarë policorë dhe 1 zyrtar doganor.

Gjithashtu, z. Marie prezantoi aktivitetet e tjera të projektit HAPE dhe rëndësinë e tij për institucionet e sigurisë publike dhe të punëve të brendshme në Kosovë, duke vlerësuar bashkëpunimin e deritashëm me AKSP-në.

Nga ana e tij, z. Shabani e përgëzoi z. Marie për aktivitetet dhe arritjet e deritashme të projektit HAPE, duke theksuar kontributin dhe mbështetjen e rëndësishme që ky projekt ka ofruar për institucionet e sigurisë publike në Kosovë. Ai ritheksoi gatishmërinë e AKSP-së për të vazhduar bashkëpunimin dhe mbështetjen e aktiviteteve të projektit HAPE.

Në këtë kuadër, z. Shabani e falënderoi z. Marie edhe për demonstrimin praktik të përdorimit të dronëve, të realizuar nga zyrtarët e Policisë së Kosovës të trajnuar përmes projektit HAPE, për kadetët e Gjeneratës së 63-të të Trajnimit Profesional për zyrtar policor në AKSP.

Gjatë vizitës, z. Marie ndoqi nga afër këtë demonstrim praktik, përmes të cilit zyrtarët e Policisë së Kosovës, të trajnuar në kuadër të projektit HAPE, prezantuan para kadetëve mënyrën e përdorimit të dronëve në fushën e sigurisë publike. Kadetët e Gjeneratës së 63-të aktualisht janë duke ndjekur Trajnimin Profesional për zyrtar policor në AKSP.

Vushtrri, 7 shtator 2026 – Delegacioni i Ministrisë së Punëve të Brendshme të Republikës së Maqedonisë së Veriut, i kryesuar nga zëvendësministri z. Astrit Iseni, i shoqëruar nga zëvendësministri i Ministrisë së Punëve të Brendshme të Republikës së Kosovës, z. Enver Dugolli, vizitoi Akademinë e Kosovës për Siguri Publike (AKSP), ku u prit nga ushtruesi i detyrës së Drejtorit të Përgjithshëm të AKSP-së, z. Shpend Shabani, me bashkëpunëtorë.

Zëvendësministri z. Enver Dugolli falënderoi delegacionin për vizitën dhe vlerësoi rolin e rëndësishëm të AKSP-së në përgatitjen profesionale të kuadrove të institucioneve të sigurisë, përfshirë zyrtarët policorë, korrektues, doganorë dhe zjarrfikës. Ai vlerësoi punën dhe angazhimin e Akademisë në zhvillimin e kapaciteteve profesionale të institucioneve për zbatimin e ligjit dhe forcimin e sigurisë publike.

Ushtruesi i detyrës së Drejtorit të Përgjithshëm të AKSP-së, z. Shpend Shabani, i uroi mirëseardhje delegacionit dhe e vlerësoi vizitën si një mundësi të rëndësishme për forcimin e mëtejshëm të bashkëpunimit ndërmjet institucioneve të sigurisë të të dyja vendeve.

Në këtë kuadër, z. Shabani theksoi gatishmërinë e AKSP-së për thellimin e bashkëpunimit me institucionet homologe të Republikës së Maqedonisë së Veriut, duke veçuar bashkëpunimin e deritashëm me Qendrën e Trajnimit në Idrizovë dhe Fakultetin e Sigurisë. Ai nënvizoi rëndësinë e shkëmbimit të përvojave, praktikave të mira dhe njohurive profesionale, me synim forcimin e kapaciteteve institucionale, ngritjen e standardeve profesionale dhe avancimin e bashkëpunimit rajonal në fushën e sigurisë publike.

Në këtë drejtim, z. Shabani, theksoi edhe rolin e AKSP-së si bashkëthemeluese e Asociacionit Rajonal të Akademive Policore.

Nga ana e tij, zëvendësministri z. Astrit Iseni përgëzoi AKSP-në për zhvillimin e kapaciteteve profesionale dhe infrastrukturore, duke vlerësuar standardet e avancuara të aplikuara në fushën e trajnimit dhe përgatitjes profesionale për sigurinë publike. Ai theksoi rëndësinë e thellimit të bashkëpunimit ndërinstitucional të të dyja vendeve dhe shkëmbimit të përvojave e praktikave të mira, duke vlerësuar veçanërisht modelin dhe qasjen e trajnimeve të aplikuara këtu në AKSP.

Vushtrri, 1 shtator 2026 - Në Akademinë e Kosovës për Siguri Publike (AKSP) u zhvillua takim ndërmjet drejtuesve të Akademisë së Kosovës për Siguri Publike dhe Spitalit të Përgjithshëm të Vushtrrisë, me fokus në forcimin e bashkëpunimit dhe koordinimit ndërinstitucional. Në takim morën pjesë U.D. Drejtori i AKSP-së, z. Shpend Shabani, dhe Drejtori i Spitalit të Përgjithshëm të Vushtrrisë, z. Besim Muzaqi, së bashku me bashkëpunëtorët e tyre.

Gjatë takimit u diskutua për mundësitë e përkrahjes nga AKSP gjatë periudhës së ndërtimit të objektit të ri spitalor, përfshirë mundësinë e shfrytëzimit të një pjese të hapësirave të Akademisë në raste emergjente në spital.

Po ashtu, u diskutua mundësia që Spitali “Sheikh Zayed” të ofrojë një ditë të veçantë për kontrolle dhe shërbime shëndetësore për kadetët që vijojnë programet trajnuese në Akademi.

Bashkëpunimi dhe koordinimi ndërinstitucional synojnë realizimin e projekteve të rëndësishme dhe ofrimin e shërbimeve më cilësore.