Lajmet

Vushtrri, 03 Korrik 2009 – Pas një trajnimi intensiv katër javor, sot në ora 10:00, në Qendrën e Kosovës për Siguri Publike Edukim dhe Zhvillim, u mbajt ceremonia e diplomomimit të gjeneratës së parë të pjesëmarrësve që ndoqën trajnimin për Lidership të Nivelit Ekzekutiv. Ky trajnim u organizua në qendër me përkrahjen e disa këshilltarëve të OSBE-së. Planprogrami mësimor përfshinte aftësitë komunikuese, ndërtimin e ekipeve, mendimin strategjik, studimin e rasteve të incidenteve madhore si dhe lëmi të tjera të menaxhmentit ekzekutiv.  Ligjeruesit ishin ekspertë ndërkombëtarë dhe vendorë të lëmive përkatëse. Ndërsa, pjesëmarrësit e këtij trajnimi ishin kryesisht udhëheqës departamentesh të ndryshme nga agjencionet e sigurisë publike si Policia e Kosovës, Doganat e Kosovës, Shërbimi Korrektues i Kosovës dhe Departamenti për Menaxhimin e Emergjencave.

Në ceremoni të diplomimit ishin të pranishëm zëvendësdrejtori i përgjithshëm i Policisë së Kosovës, z.Dejan Jankovic, drejtori i Departamentit për Siguri dhe Çështje të Sigurisë në OSBE, z.Carsten Twelmayer, si dhe zyrtarë të lartë nga agjencionet e zbatimit të ligjit.

Përveç ceremonisë së diplomimit, sot u bë edhe tranzicioni i planprogramin mësimor të Departamentit për Menaxhimin dhe Zhvillimin e Lidershipit, nga OSBE tek Qendra e Kosovës për Siguri Publike Edukim dhe Zhvillim. Ky Departament ishte themeluar në vitin 2006 dhe që nga ajo kohë ishte në mbikqyrjen e OSBE-së.

 “Sot është një ditë e vecantë, sepse materiali i OSBE-së, që nga sot i dorëzohet Departamentit për Menaxhimin dhe Zhvillimin e Lidershipit, që të zhvillojë më tej aftësi menaxheriale brenda agjensioneve të sigurisë publike, në mënyrë që të përmirësojnë dhe afirmojnë shërbimet e tyre për qytetarët”, tha z.Twelmayer.
Në vazhdim, z.Twelmayer premtoi se mbështetja për zhvillimin e menaxhmentit dhe lidershipit, nuk do të mungojë as në të ardhmen nga departamenti që ai udhëheq.

Ndërkaq, zëvendësdrejtori i policisë z.Jankoviq falenderoi QKSPEZH-in dhe OSBE-në për organizimin dhe mbështetjen e vazhdueshme të trajnimeve të ndryshme.
“Pjesëmarrësve të kursit ju dëshiroj punë të suksesshme që edhe në të ardhmen të japin kontributin ashtu si deri më tani”, tha për fund z.Jankoviq.

Ndërsa, u.d. e kryeshefit ekzekutiv të QKSPEZH, Taibe Canolli vlerësoi se ky është një hap i rëndësishëm për zhvillimin e vazhdueshëm të akterëve kyç për  ruajtjen e sigurisë së vendit. Ajo tha se “organizimi i këtij trajnimi është i një rëndësie të veçantë jo vetëm për Qendrën e Kosovës për Siguri Publike Edukim dhe Zhvillim, por edhe për të gjtiha institucionet ku ju shërbeni. Realizimi i këtij projekti i kontribon krijimit të një sistemi të qëndrueshëm të edukimit, duke qenë i drejtuar në ndërtim të kapaciteteve vendore për lidership të nivelit të lartë dhe trajnim të stafit menaxherial” , tha znj.Canolli.

Departamenti për Menaxhim dhe Lidership deri më tani ka zhvilluar nivelin e ulët dhe të mesëm të menaxhmentit si dhe disa seminare një javore për nivelin e lartë ekzekutiv. Ndërsa, ky është trajnimi i parë i këtij lloji që do të vazhdojë të mbahet edhe për gjeneratat e ardhshme.
 

Vushtri, 19 qershor 2009-Sot, më 19 qershor 2009  në Qendrën e Kosovës për Siguri Publike,Edukim dhe Zhvillim ,në Vushtrri,ambasada Çeke  dorëzoi në mënyrë solemne një donacion, që përmban dhomë dhe pajisje për hulumtimin dhe simulimin e vendngjarjes së krimit.
Në këtë  ceremoni ishin  prezent ambasadorja e Çekisë, znj.Janina Hrebícková, ambasadori i OSBE-së z.Ëerner Almhofer zv/kryetarja e komunës së Vushtrisë, z.Xhevahire Ismaku si dhe zyrtarë të tjerë  të lartë vendor e ndërkombëtarë.
Në fjalën e saj ambasadorja e Çekisë  znj.Hrebiçkova vlerësoi lartë të arriturat e Policisë së Kosovës  që nga formim. Ajo tha se ‘Republika Çeke  cdo here ka mbështetur zhvillimin e Kosovë. Ne jemi të interesuar që  së pari të  përmirësohen raportet ndër etnike dhe të  zhvilloj Policinë në hetimin e krimit. Kjo është mënyra më e mirë për  t’u arritur siguri jo vetëm në vend, por edhe në rajon”, tha ndër të tjera znj. Hrebickova.
 

Vushtri, 18 qershor 2009-Neser, më 19 qershor 2009  në Qendrën e Kosovës për Siguri Publike,Edukim dhe Zhvillim ,në Vushtrri, OSBE do të dorëzoj në mënyrë solemne një donacion, që përmban pajisje për hulumtimin dhe simulimin e vendngjarjes së krimit.
Në këtë  ceremoni do të jetë prezent edhe  ministri i Punëve të Brendshme z.Zenun Pajaziti, zv/ministri i MPB-së, z.Fatmir Xhelili, ambasadori i OSBE-së, z.Werner Almhofer, ambasadorja e Çekisë, znj. Janina Hrebícková, drejtori i përgjithëshëm i Policisë së Kosovës, z.Sheremet Ahmeti, kryetari i komunës së Vushtrisë, z.Bajram Mulaku si dhe zyrtarë të tjerë  të lartë vendor e ndërkombëtarë.
Ceremonia e  dorëzimit të donacionit fillon në ora 10:00

Ftohen mediat që ta përcjellin këtë ngjarje
 

Vushtrri, 5 maj 2009-Sot, në Qendrën e Kosovës për Siguri Publike, Edukim dhe Zhvillim, pas një trajnimi intensiv katër  javorë, u çertifikuan 20 pjesëmarrës, në kursin bazik të Hetimeve, zyrtarë të lartë të Drejtorisë së Shërbimit për Kontroll të Brendshëm të Shqipërisë.
Në ceremoninë e diplomimit morën pjesë drejtori i përgjithëshëm i Shërbimit të Kontrollit të Brendshëm të Shqipërisë, z. Astrit Halilaj,  kryeshefi ekzekutiv i Inspektariatit të Policisë së Kosovës, z.Enver Rrustemaj, përfaqësuesi i ICITAP në Shqipëri, z.Leon Strigote, Petrit Bushi nga Ambasada e Shqipërisë në Kosovë, përfaqësues i ICITAP në Qendër z.Alex Rivera,  si dhe  zyrtarë të  tjerë të lartë të Qendrës së Kosovës për Siguri Publike, Edukim dhe Zhvillim, Policisë së Kosovës dhe Inspektariatit Policor të Kosovës.

Drejtori i Shërbimit të Kontrollit të Brendshëm të Shqipërisë, z.Astrit Halilaj falenderoi Ministrinë e Punëve të Brendshme të Kosovës për realizimin e këtij trajnimi, ai thë se ‘ky trajnim shënon një urë bashkëpunimi, ndërmjet dy shteteve tona të pavarura dhe demokratike , që i përkasim të njëjtit komb dhe flasim të njëjtën gjuhë. Është i pari kurs që zhvillohet jashtë shtetit pa patur nevojë për përkthyes’
Në vazhdim drejtori Halilaj  vlerësoi këtë trajnim tejet të  rëndësishëm për konsolidimin e bashkëpunimit reciprok  në të gjitha fushat, me theks të veçant  në fushën e zbatimit të ligjit  dhe krijimin e standardeve të përbashkëta. ‘Shkëmbimi i modeleve dhe eksperiencave  të ngjashme ndërmjet Agjencive  të Ligjit  të dy shteteve tona, është i rëndësishëm  për bashëkpunim reciprok. Ky trajnim do të forcojë edhe më tej, bashkëpunimin tonë me Inspektariatin Policor të Kosovës, pasi që IPK dhe SHKB janë dy agjencitë ligjore përgjegjëse për mbikëqyrjen e punës së Shërbimeve Policore  të të dy vendeve’, tha ndër të tjera drejtori i Shërbimit të Kontrollit të Brendshëm të Shqipërisë, z.Astrit Halilaj.

Driton Zabërxha nga Policia e Kosovës  theksoi se ‘Policia e Kosovës dhe Policia e Shqipërisë janë dy institucione shumë të rëndësishme, të cilat kanë bashkëpunim të mirë dhe janë në rrugë të drejtë  të zhvillimit, duke punuar me zell për një rajon të sigurt dhe demokratik’
Ndërkaq përfaqësuesi i ICITAP në Shqipëri z.Leon Strigote  vlerësoi lartë punën e Inspektariatit Policor të Kosovës dhe tha se  ‘ Demokracia dhe liria nuk janë të barabarta me korrupcionin, nuk mund të jemi shoqëri demokratike nëse nuk kemi agjenci që  lufton krimin. Ju jeni expert  në luftimin e krimit, por duke  parë punën e mirë të IPK-së  është inicuar ky trajnim dhe pasi që ju jeni në front të luftimit të korrupcionit shpresojmë se së bashku me homologët kosovar  do të vendosni një standard, që do të jetë model, jo vetëm për vendet tuaja, por për tërë Europën Juglindore’, tha përfaqësuesi i ICITAP në Shqipëri.
Pjesëmarrësit i përshendeti edhe Petrit Bushi nga ambasada e Shqipërisë në Kosovë.
 

Vushtrri, 26 maj 2009-Sot  Qendrën e Kosovës  për Siguri Publike, Edukim dhe Zhvillim e  vizitoi ambasadori i Holandës në Prishtinë z. Henk Voskamp, i shoqëruar nga zëvendës ambasadorja  znj. Emma Key dhe  z. Caspar Velkamp drejtor i Drejtorisë për Ballkanin Perëndimor, i Ministrisë së Punëve të Jashtme të Mbretërisë së Holandës.
Delegacionin Holandez e priti u.d. i drejtorit  të QKSPEZH znj. Taibe  Canolli, e cila i njoftoi mysafirët për të gjitha aktivitetet që i zhvillon Qendra e Kosovës për Siguri Publike, Edukim dhe Zhvillim, për kapacitetet dhe mundësitë që i ofron kjo Qendër në trajnimin e pjesëtarëve të  policisë dhe të agjencioneve të tjera të Sigurisë Publike.
Në vazhdim të takimit komandanti i  NATO Training  Team( NTT) Vincenzo Matina, e  njoftoi delegacionin për të gjitha   aktivitetet   që  po zhvillohen në  trajnimin e  FSK-së.
Delegacioni nga Mbretëria e Holandës vizitoi edhe ambientet e Qendrës për t’u njohur më afër me punët e kësaj Qendreje.
 

Vushtrri 22  maj ’09 - Në mbështetje të nenit 145 (2) të Kushtetutës së Republikës së Kosovës, në bazë të Rregullores së UNMIK-ut 2006/26 të dt. 27 prill 2006, Rregullores së UNMIK-ut  2008/17, Urdhëresës Administrative nr. 2008/3 për themelimin e Qendrës së Kosovës për Siguri Publike, Edukim dhe Zhvillim neni 3, si dhe Rregullores së UNMIK-ut 2001/36 për Shërbimin Civil në Kosovë, ministri i Ministrisë së Punëve  të Brendshme nxori këtë vendim:
I. Në pozitën e ushtruesit të detyrës së Kryeshefit Ekzekutiv në Qendrën e Kosovës për Siguri Publike, Edukim dhe Zhvillim që vepron si Agjenci Ekzekutive, në kuadër të Ministrisë së Punëve të Brendshme emërohet znj.Taibe Canolli.
II. Znj. Taibe Canolli do ta ushtrojë këtë funksion deri në përfundim të procedurave të rregullta të rekrutimit të Kryeshefit të kësaj Agjencie. Mandatin e saj/tij, Kryeshefi Ekzekutiv do ta ushtrojë duke u bazuar në legjislacionin në fuqi.
III. U.d. i kryeshefit Ekzekutiv i përgjigjet Ministrit të Punëve të Brendshme.
 

Vushtrri, 15 maj  2009 - Pas një trajnimi të 2 javor, në QKSPEZH diplomuan   zyrtarët e   rinjë zjarrfikës.
Në ceremoni të diplomimit morën pjesë: sekretarja permanente e Ministrisë së Punëve të Brendshme, Sebahate Muharremi, u.d. i drejtorit të Departamentit për Menaxhimin e  Emergjencave, Ramadan Krasniqi, Lulzim Fushtica u.d.i drejtorit të QKSPEZh, Driton Zabërgja nga Policia e Kosovës, Tahir Krasniqi  nga Shërbimi Korrektues i Kosovës, Heinz Schneider nga OSBE, kryetari i komunës së Mamushës Arif Bytyqi si dhe zyrtarë të tjerë të lartë të QKSPEZh.

Sekretarja permanente e MPB-së  përgëzoi zyrtarët e rinjë zjarrfikës    për diplomimin, duke falenderuar me theks të vecant pjesëtarët serb dhe turk për bashkëngjitjen e  tyre në Shërbimin Zjarrfikës.

Lulzim Fushtica  në emër  të  QKSPEZh dhe MPB-së i  uroi të sapo diplomuarit  dhe  tha se ‘përkushtimi i Ministrisë së Punëve të Brendshme do të vazhdojë  në mbështetjen e Agjencioneve të Sigurisë Publike, në mënyrë që në të ardhmen këto agjencione të pavarësohen në përmbushjen   e misionit të tyre’

Ndërkaq z. Heinz Schneider i cilësoi zjarrfikësit si hero, me një rol  kyq  në mbrojtjen e jetës dhe pasurisë  së qytetarëve. ‘Do t’i inkurajoj insitucionet e Kosovës për  të përkrahur Shërbimin Zjarrfikës, me që roli i tyre në mbrojtjen e jetës dhe pasurisë së qytetarëve  është  kyq’, tha  z. Schneider.

Në  ceremoninë e sotme, në emër  të pjesëtarëve serb foli njëri nga të  diplomuarit e  sotëm , po ashtu pjesëtarë i nacionalitetit serb,  cili u shpreh i kënaqur  për kohën e kaluar në QKSPEZh gjatë këtyre dy javëve. ‘ Në emër të nacionalitetit serb , ju falenderojë për trajtimin që  na  është bërë gjatë këtyre  javëve, jemi ndjerë si në shtëpinë tonë’, tha  njëri nga pjesëmarrësit serb.

Kjo gjeneratë numëron 23 pjesëtarë, pjesa më e madhe e të cilëve vijnë nga komuna e Hanit të Elezit dhe Mamushës , komuna këto të cilat janë në formim e sipër të Shërbimit Zjarrfikës.

Gjashtë prej pjesëmarrësve janë të nacionalitetit  serb dhe  kjo është  hera e parë që Shërbimit Zjarrëfikës i bashkëngjiten pjesëtarë  të këtij  nacionaliteti.

 

Vushtrri, 14 maj 2009 –Më 15, 16 dhe 17 maj të këtij viti në Qendrën e Kosovës për Siguri Publike, Edukim dhe Zhvillim në Vushtrri, Policia e Kosovës në bashkëpunim me organizatën joqeveritare  ‘Terre de Hommes”  organizon  kampin multietnik , për fëmijët e zyrtarëve të Policisë së Kosovës.
Në këtë  kamp, i cili përfshinë lojra dhe aktivitete të ndryshme, do të marrin pjesë rreth 120 fëmijë, të moshës 12-14 vjeçare dhe do të përfaqësojnë  të  gjashtë  rajonet e Policisë së Kosovës.
Pjesëmarrës  në këtë kamp do të jenë edhe Trupat Operative Shumëkombëshe-Lindje (Multi-National Task Force-East -MNTF-E), të cilët  do të mbështesin këtë  kamp.
Hapja solemne e këtij kampi, do të bëhet  në Qendrën e Kosovës për Siguri Publike Edukim dhe Zhvillim, më 15 maj, në ora 18:30. Të shtunën, përkatësisht më  16 maj në orën 11, fëmijët do të dërgohen në Parkun e Bajgorës ku edhe do të realizohen këto lojra dhe aktivitete.

Ftohen mediat që të marrin pjesë në hapjen solemne të këtij kampi.

 

“Policia e Kosovës është pikë reference  si një  storie suksesi” 

Vushtrri, 5 maj ’09- Sot Qendrën e Kosovës për Siguri Publike Edukim dhe Zhvillim e vizitoi zëvendësministrja e Punëve të Jashtme Vlora Çitaku, e  shoqëruar me këshilltarin e saj Besfort Rrecaj.
Zëvendësminstren e Punëve të Jashtme e  priti  u.d. i drejtorit të QKSPEZH, Lulzim Fushtica cili e njoftoi për të gjitha aktivitetet që i zhvillon Qendra e Kosovës për Siguri Publike, Edukim dhe Zhvillim, për kapacitetet dhe mundësitë që i ofron kjo Qendër në trajnimin e pjesëtarëve të  policisë dhe të agjencioneve të tjera të Sigurisë Publike.
Gjatë kësaj vizite zëvendësministrja e Punëve të Jashtme, Vlora Çitaku u takua  me student kadet  të Policisë së Kosovës dhe Forcës së Sigurisë së Kosovës.
Me këtë rast zv/ministrja Çitaku vlerësoi  lartë të  arriturat dhe sukseset e  Policisë së Kosovës, duke theksuar se ‘ju shpeshëherë na bëni të ndjehemi krenar. Policia e Kosovës është pikë  reference si një storie  suksesi. Ne ju kemi borxh dhe ju siguroj se kushtet tuaja  do të përmirësohen hap pas hapi’ u tha  zv/minstrja Çitaku, studentëve të Policisë së Kosovës.
Ndërkaq gjatë  vizitës që zv/ministrja  Çitaku u bëri kadetëve të FSK-së, i cilësoi  ata me shumë fat, me që do të  jenë gjenerata e parë e ushtrisë së Shtetit. ‘Ju keni një bazament të fort, një trashëgimi të respektueshme, jam e sigurt që  do të bëheni ushtri e fort, që  do t’i kontribuoni paqes, jo vetëm në vend, por  edhe në rajon’, shtoi ndër të tjera zv/ministrja e Jashtme Çitaku.
Zv/minstrja Çitaku vizitoi edhe ambientet e Qendrës për t’u njohur më afër me punët dhe aktivitetet e kësaj Qendreje.
 

Vushtrri,  4 maj  '09 - Sot në Qendrën e Kosovës për Siguri Publike, Edukim dhe Zhvillim filloi trajnimi bazik  për Zjarrfikje dhe Shpëtim.
Kjo gjeneratë  numëron 23 pjesëtarë, pjesa  më e  madhe e të cilëve vijnë nga komuna e Mamushës dhe Hanit të Elezit, komuna të cilat janë në formim e  sipër të Shërbimit Zjarrfikës.
Gjashtë prej pjesëmarrësve janë të nacionalitetit  serb, kjo është  hera e parë që Shërbimit Zjarrëfikës i bashkëngjiten pjesëtarë  të këtij  nacionaliteti.   Trajnimi bazik do të zgjasë  2  javë.
 

Vushtrri, 24 Prill 2009 - Pas një trajnimi të modifikuar 12 javor, në QKSPEZH diplomoi gjenerata e 37-të e  zyrtarëve të rinj të Policisë së Kosovës. Kjo gjeneratë numëron 80 pjesëtarë, të cilët u trajnuan me planprogramin e dizajnuar në bazë të standardeve ndërkombëtare për të drejtat e njeriut dhe sundim të ligjit.

Në ceremoni të diplomimit morën pjesë: ministri i Brendshëm, Zenun Pajaziti, drejtori i Përgjithshëm i Policisë, Sheremet Ahmeti, përfaqësues nga EULEX-i, KFOR-i, OSBE-ja, zyrtarë të lartë nga Ministria e Punëve të Brendshme dhe Policia e Kosovës si dhe familjarë të të diplomuarëve.

Ministri Pjaziti përgëzoi zyrtarët e rinj policorë  për diplomimin duke theksuar se policia është dhe do të mbetet edhe më tutje polici shumetnike. Ai më tutje vlerësoi se “Policia e Kosovës do të vazhdojë të jetë tregimi më i mirë i institucioneve dhe kjo vetëm si rezultat i punës që bëjnë”.

Në vazhdim ministri Pajaziti theksoi se “Policia e Kosovës mbetet institucioni më i rëndësishëm që në Kosovë të kemi një jetë të mirë dhe një lëvizje të lirë”.

Drejtori i Përgjithshëm i Policisë, Sheremet Ahmeti, vlerësoi se  edukimi  dhe trajnimi luajnë rol të rëndësishëm në formimin e kuadrit profesional. Ai në vazhdim theksoi se “është kënaqësi të shohësh mundësinë që kemi sot për t’u trajnuar sipas standardeve më të larta të zbatimit të ligjit dhe të drejtave të njeriut së bashku me të gjitha agjencionet e zbatimit të ligjit në Qendrën e Kosovës për Siguri Publike Edukim dhe Zhvillim”.

Ndërsa, zëdhënësi i gjeneratës së tridhjeteshtatë të policisë, oficer Muharrem Kelmendi, tha se “do të përpiqemi që t’i mbrojmë të drejtat e qytetarëve, pa dallim etnie, race apo gjinie, si dhe pronat e tyre duke u bazuar dhe zbatuar me përpikshmëri ligjet e Republikës së Kosovës”.


Pas shpërndarjes së diplomave, kapitenët e klasëve dorëzuan flamujt të cilët simbolizonin të arriturat akademike, disiplinën si dhe arritjet në të gjitha lëmitë përgjatë 3 mujorit të  trajnimit. Këta flamuj iu dorëzun drejtorit të  Drejtoratit për Trajnime Mandatore, nënkolonel Driton Zabërgja. Në fund të ceremonisë, instruktori i paradës dhe disiplinës liroi gjeneratën e re të policisë.

 

Vushtrri, 23  prill ’09 - Sot u  shënua  \"Dita Ndërkombëtare  e Vajzave\" e cila për  herë të dytë   u mbajt  në  Kosovë, projekt i Organizatës Gjermane për Bashkëpunim Teknik dhe Ministrisë së Arsimit, Skencës dhe Teknologjisë .Në përkrahje të këtij   projekti  Qendra e Kosovës për Siguri Edukim dhe Zhvillim ofroi mbështetje për 100 vajza nga shkollat fillore të Vushtrisë, ‘Anton Zako Çajupi’ dhe ‘Mustafa Venhari’.

Qëllimi i kësaj dite është që vajzat  të cilat  nuk kanë bërë  ende  zgjedhjen e  tyre  profesionale, të kenë mundësinë të   njihen me  profesione  të cilat  tradicionalisht konsiderohen punë burrash.

Gjatë  kësaj dite  vajzat  u ndanë  në dy  grupe, sipas  Agjencioneve të Sigurisë Publike, të integruara në Qendër, Policisë së Kosovës dhe Departamentit të Menaxhimit të Emergjencave. Pas ligjëratave nga zyrtarë të  agjencioneve përkatëse, vajzat  ushtruan praktikisht  disa nga detyrat dhe aktivitetet e Policisë  dhe Zjarrfikësve.

Ishte një  ushtrim praktik i cili  ndihmon këto vajza  të  krijojnë  ide  për profesione  të cilat  tradicionalisht konsiderohen jo femrore dhe në këtë  mënyrë të krijohen mundësi të  barabarta karriere për të dy gjinitë.