Lajmet

Vushtrri, 10 nëntor 2009 - Qendrën e Kosovës për Siguri Publike, Edukim dhe Zhvillim  e vizitoi një delegacion nga Mali i Zi, i kryesuar nga Miroslav  Gospodinov nga OSCE ,  i shoqëruar  nga  Rajko Pekovic, Radivoje Sokovic dhe Nenad Vojinovic, instruktor policorë.
 
Delegacioni nga Mali i Zi në emër të Qendrës së Kosovës për  Siguri Publike,  Edukim dhe Zhvillim, është  pritur  nga Shefi i Zyrës Ligjore  Ali Bajgora, Nënkoloneli z. Driton Zabërgja dhe stafi menaxhues i Qendrës.

Fillimisht, të pranishmit i përshëndeti z. Bajgora me ç’rast në emër të u.d Kryeshefit Ekzekutiv z-sha Taibe Canolli u uroj mirëseardhje në Qendrën e Kosovës për Siguri Publike, Edukim dhe Zhvillim.

Gjatë takimit z. Bajgora delegacionin  e njoftoi dhe bëri një prezantim lidhur më punën, konceptin dhe vizionin e Qendrës. Gjithashtu i njoftoi për të gjitha aktivitetet që i zhvillon Qendra e Kosovës për Siguri Publike, Edukim dhe Zhvillim, për  kapacitetet dhe mundësit  në trajnimin  e pjesëtarëve të policisë dhe të agjencive  tjera të Sigurisë Publike.

Pas takimit, delegacioni në përcjellje të stafit menaxhues të Qendrës bëri  një vizitë  rreth objekteve dhe hapësirës  të cilën e disponon QKSPEZH. 

Vushtrri ,28 tetor 2009 - Më ftesën  e Asociacionit  të Kolegjeve Policore të Evropës (AEPC), delegacioni i udhëhequr nga  u.d. i Kryeshefit Ekzekutiv  të Qendrës së Kosovës për  Siguri  Publike, Edukim dhe Zhvillim  z-sha  Taibe  Canolli dhe  përfaqësuesja nga Ministria e Punëve të Brendshme (MPB), Dhurata Sadiku  udhëtuan për të marrë pjesë  në takimin e radhës së AEPC-ut  të  mbajtur më 29.11.2009 në  Zagreb të Kroacisë.

Nga  Asociacioni  i  Kolegjeve Policore të Evropës  (AEPC),  anëtare të së cilës janë 45 shtete, Qendra e Kosovës për Siguri Publike, Edukim dhe Zhvillim është pranuar në cilësi të anëtarit  vëzhgues në takimin e mbajtur të Bordit Qeverisës të (AEPC) më 17 shtator 2009 në Budvë të Malit  të Zi .

Në këtë takim nga shtetet anëtare të Asociacionit  të Kolegjeve Policore të Evropës, Qendra e Kosovës për  Siguri Publike,  Edukim  dhe Zhvillim u  mirëprit dhe ju ofrua mundësia që të jetë pjesë e të gjitha aktiviteteve  duke përfshirë trajnimet, shkëmbimin e përvojave,  pjesëmarrjen në të gjitha  konferencat e organizuara  nga shtetet anëtare  të AEPC.

Meqë ishte hera e parë  e pjesëmarrjes , Qendrës së Kosovës për  Siguri Publike, Edukim dhe Zhvillim  ju dha mundësia   të  prezantojë tërë aktivitetin ,  konceptin dhe  funksionimin e QKSPEZH –it ,  në mënyrë që  shtetet  anëtare të AEPC  të kenë një pasqyrë të qartë  mbi  Qendrën tonë. 

Pranimi i Qendrës  së Kosovës  për  Siguri Publike,  Edukim dhe Zhvillim në këtë Asociacion është i një rëndësie të veçantë  dhe i kontribuon zhvillimit dhe bashkëpunimit të ngushtë mes shteteve anëtare të Asociacionit  të Kolegjeve Policore  të Evropës  (AEPC).

Vushtrri, 29 tetor 2009 -  Në vazhdën e takimeve që ka zhvilluar me institucione te larta shtetërore të Republikës se Kosovës, drejtori i Policisë së Malit të Zi ka vizituar edhe Qendrën e Kosovës për Siguri Publike Edukim dhe Zhvillim. Delegacioni I shoqëruar edhe nga drejtori i Policisë së Republikës së Kosovës Sheremet Ahmeti, është pritur nga stafi menaxhues i Qendrës. 


Delegacioni është njoftuar për së afërmi me punën dhe aktivitetet e Qendrës, si dhe nga të dyja palët është shfaqur interesim bashkëpunimi në fushën e sigurisë. Pasi u ka dëshiruar mirëseardhje të pranishmëve, u.d. i Drejtorit te Administratës dhe Logjistikes, Erton Beka Ka theksuar se kjo vizite është shumë e rëndësishme për shkëmbimin e përvojave dhe thellimin e bashkëpunimit ne mes dy shteteve. 
Ai e ka njoftuar drejtorin Veljovic se “Qendra për Siguri Publike Edukim dhe Zhvillim brenda vitit trajnon 12 deri ne 13 mijë zyrtarë të sigurisë publike në trajnime të avancuara dhe specializuara”. Gjithashtu ka sqaruar se në këtë Qendër trajnohen zyrtarët e katër agjensioneve te sigurisë publike. 

Pas takimit delegacioni i kryesuar nga drejtori Veljovic, ka vizituar studentët e gjeneratës se 39 të Policisë së Republikës së Kosovës, të cilët po e vijojnë trajnimin bazik në këtë Qendër. Më pas ata kanë bërë një vizitë rreth Qendrës për t`u informuar me infrastrukturën dhe pajisjet qe posedon Qendra.

Vushtrri, 23 tetor- Sot në Qendrën e Kosovës për Siguri Publike Edukim dhe Zhvillim kanë diplomuar 29 pjesëtarë të Shërbimit Korrektues të Kosovës të cilët për dy javë kanë ndjekur “Trajnimin për Trajnerë”, të organizuar nga OSBE. Të pranishëm në ceremoninë e ndarjes së diplomave ishin  u.d e Kryeshefit Ekzekutiv të QKSPEZH znj. Taibe Canolli,  Këshilltari i Ministres së Drejtësisë z. Rrustem Buzhala, Zëvendës Komisari i SHKK z. Sokol Zogaj, Shefi i Departamentit për Siguri Publike në OSBE, z. Carsten Tweilmeier, Zëvendës Shefja e Njësitit të Korrektuesve në EULEX znj. Amu Mellko, si dhe zyrtarë të tjerë.

Gjatë kësaj ceremonie në emër të Ministres së Drejtësisë znj. Nekibe Kelmendi, të pranishmit i ka përshëndetur këshilltari i, z. Rrustem Buzhala i cili ka theksuar se ky trajnim ka qenë i domosdoshëm për pjesëtarët e SHKK-së të cilëve u ndihmon ne kryerjen e detyrave dhe në avancimin e tyre. Ai gjithashtu ka falënderuar OSBE-në dhe EULEX-in dhe ka shtuar se trajnime të tilla janë të mirëseardhura.

Ndërkaq Kryesuesi i Departamentit për Siguri Publike në OSBE z. Carsten Tweilmeier pasi ka përshëndetur të pranishmit, ka siguruar se OSBE do të përkrahë edhe me tutje aktivitete të tilla, “dua të them që sapo të njoftohemi për nevojat tuaja, ne do të jemi në gjendje t`i projektojmë ato dhe më pas t`i realizojmë ato”, ka thënë z Tweilmeier.

Ky trajnim që ka zgjatur dy javë dhe është ndarë në dy faza. Në atë teorike dhe praktike, pjesa teorike është realizuar ne QKSPEZH ndërsa ajo praktike është realizuar në ambientet e Burgut të Dubravës. Gjatë kësaj kohe, pjesëmarrësve u kanë ligjëruar ligjërues nga Austria, profesionist e kësaj fushe. Pjesëmarrësit e trajnimit pasi janë pajisur me diploma, kanë demonstruar para të pranishmëve disa nga aktivitetet qe i kanë mësuar gjatë këtij trajnimi.

 

Vushtrri, 07 tetor 2009 -  Në vazhdën e agjendës së takimeve të tij në Kosovë, ministri i Punëve të Brendshme të Republikës së Kroacisë, z.Tomislav Karamarko, të mërkurën rreth orës 15:00, ka qëndruar për vizitë në Qendrën e Kosovës për Siguri Publike, Edukim dhe Zhvillim(QKSPEZH), në Vushtrri.  Ai ka zhvilluar një takim me u.d e Kryeshefit Ekzekutiv të QKSPEZH-së, znj.Taibe Canolli. 

Qëllimi i vizitës ishte njohja e konceptit, trajnimeve dhe mënyra e funksionimit të Qendrës së Kosovës për Siguri Publike, Edukim dhe Zhvillim.

Në takimin e udhëhequr nga kryeshefja znj.Canolli, morën pjesë Komesari i Shërbimit Korrektues të Kosovës, z.Resmi Hoxha, ndihmës i drejtorit të Përgjithshëm të Policisë për Personel dhe Trajnim, z.Riza Shillova, këshilltarja në Ministrinë e Punëve të Brendshme, znj.Luanda Domi, përfaqësuesi nga Doganat e Kosovës, z.Bekim Mehmetaj, udhëheqësi i Qendrës për Trajnim dhe Edukim të DME-së, z.Rrahman Sefedini dhe zyrtarë të lartë nga QKSPEZH-i.  

Gjatë takimit znj.Canolli bëri një prezentim të punës, aktiviteteve dhe konceptit të QKSPEZH-së. Ajo falenderoi ministrin Karamarko për vizitën dhe për mbështetjen e vazhdueshme që shteti dhe Qeveria e Kroacisë i ofrojnë Kosovës, e në veçanti kontributin e dhënë përmes ekspertëve në ndërtimin e kapaciteteve të trajnimit në Qendrën e Kosovës për Siguri Publike Edukim dhe Zhvillim, që ndihmuan në hartimin dhe implementimin e projekteve të ndryshme të trajnimit.
“Progresi i arritur në Qendrën për Siguri Publike mund t’i dedikohet edhe partnerëve ndërkombëtarë,në këtë rast edhe ekspertëve nga Kroacia që kanë dhënë kontribut të madh në trajnimin e pjesëtarëve të Agjencioneve të Sigurisë Publike”, tha znj.Canolli.

Ndërsa, minsitri Karamarko duke shpjeguar qëllimin e vizitës dhe marrëdhëniet e mira  që ekzistojnë mes dy shteteve, Republikës së Kosovës dhe Republikës së Kroacisë, tha se “gjatë kësaj vizite dua të paraqes një mozaik të sigurisë në shkallë të bashkëpunimit jo vetëm me shtetet e Evropës, por edhe të rajonit”, tha z.Karamarko, duke potencuar se bashkëpunimi me Qendrën për Siguri Publike, Edukim dhe Zhvillim për trajnimin e zyrtarëve policorë mund të vazhdojë edhe në të ardhmen. “Në qoftë se keni nevojë për instruktorë nga Kroacia, apo anasjelltas, ne jemi të gatshëm për bashkëpunim”, tha ndër të  tjera z.Karamarko. Ai nuk ka harruar të përmend edhe kontributin e shqiptarëve që kanë dhënë në luftën çlirimtare të Kroacisë.
 
Pas takimit, delegacioni në përcjellje të znj.Canolli dhe stafit menaxhues të Qendrës për Siguri Publike, bënë një vizitë rreth objekteve të QKSPEZH-it për t’u njoftuar me infrastrukturën dhe disa nga pajisjet me të cilat trajnohen zyrtarët e Agjencioneve të Sigurisë Publike.

Vushtrri, 06 tetor 2009 -  Të mërkurën, me datë 07 tetor 2009 (nesër), në ora 15:00, Qendrën e Kosovës për Siguri Publike, Edukim dhe Zhvillim(QKSPEZH), në Vushttri,  do ta vizitojë një delegacion i kryesuar nga  ministri i Punëve të Brendshme të Republikës së Kroacisë, z.Tomisllav Karamarko.

Delegacioni do të mirëpritet nga u.d e Kryeshefit Ekzekutiv, znj.Taibe Canolli, me ç’rast znj.Canolli do të bëjë një prezentim të punës dhe aktiviteteve të QKSPEZH-së.

Në takim pritet të marrin pjesë edhe zyrtarë të lartë nga Ministria e Punëve të Brendshme dhe pëfaqësues të Agjencioneve të Sigurisë Publike.

Pas takimit, delegacioni në përcjellje të znj.Canolli dhe stafit menaxhues të Qendrës për Siguri Publike, do të bëjnë një vizitë rreth objekteve të QKSPEZH-it për t’u njoftuar me infrastrukturën dhe disa nga pajisjet me të cilat trajnohen zyrtarët e Agjencioneve të Sigurisë Publike.

Vushtrri, 28 shtator `09 - Sot në Qendren e Kosovës për Siguri Publike Edukim dhe Zhvillim, ka qëndruar për vizitë drejtori i sapoemëruar i Departamentit të Menaxhimit të Emergjencave z. Fadil Kodra. Ai ka zhvilluar një takim me menaxhmentin e kësaj Qendre, gjatë të cilit u.d e Drejtorit te Departamentit te Perkrahjes Programore znj. Shpresa Çekaj-Muharremi e ka njoftuar për së afërmi më konceptin e QKSPEZH si dhe vizionin e saj.

Në takim u bisedua gjithashtu edhe për thellimin e bashkëpunimit në mes të dyja palëve duke konstatuar se deri më tani kanë arritur shumë suksese si rezultat i bashkëpunimit të ndërsjellë. Z. Kodra gjithashtu ka qenë i pranishëm edhe në hapjen solemne të trajnimit ”Përdorimi i paisjeve themelore për shuarjen e zjarrit” në të cilin trajnim po marrin pjesë pjesëtarët e sigurimit të QKSPEZH.

Departamenti për Menaxhimin e Emergjencave është njëri ndër katër Agjencionet e Sigurisë Publike që ndajnë hapësirën e trajnimit bazik dhe të avancuar në Qendrën e Kosovës për Siguri Publike Edukim dhe Zhvillim, në Vushtrri.

Vushtrri, 26 shtator ’09 – Për të pestën herë me radhë në Qendrën e Kosovës për Siguri Publike Edukim dhe Zhvillim po mbahet Miniolimpiada e personave me aftësi të kufizuara organizuar nga OPFAKOS në të cilën po marrin pjesë rreth 450 persona, të përcjellë nga familjarët dhe organizatorët e kësaj Miniolimpiade.

Në hapjen zyrtare të Miniolimpiadës ishin të pranishëm zyrtarë të Ambasadës Amerikane, ICITAP, Ministria e Kulturës Rinisë dhe Sportit si dhe zyrtatë të QKSPEZH. Në emër të OPFAKOS të pranishmit I ka falenderuar kryetari I kësaj organizate, Gani Mehmeti. Ai gjatë fjalimit të tij ka theksuar se është shumë e rëndësishme që këta persona të mbështeten nga institucionet dhe se QKSPEZH është një shembull shumë I mirë të cilin duhet ndjekur. Duke falenderuar në vazhdim stafin e QKSPEZH të cilët në mënyrë vullnetare kanë shprehur gatishmërinë të punojnë gjatë këtyre dy ditëve sa do të zgjasë Miniolimpiada, z. Mehmeti ka shprehur dëshirën që ky bashkëpunim të vazhdojë edhe në të ardhmen.

Të pranishmëve u kanë dëshiruar mirëseardhje menaxhmenti I Qendrës duke I siguruar  se do ta kenë mbështetjen e plotë të Qendrës. Gjithashtu mirëseardhje pjesëmarrësve u ka dëshiruar Nënkolonel Driton Zabergja I cili ka theksuar se Miniolimpiada përveç se ka karakter garues, kontribuon edhe në thellimin e bashkëpunimit dhe krijimin e miqësive të reja duke konsideruar se ky është edhe një arkëtim për të gjithë pjesëmarrësit. Duke I ftuar që të ndjehen si  në shtëpinë e tyre, Nënkolonel Zabërgja garuesve u ka dëshiruar sukses. Ndërkaq në emër të Ministrisë së Kulturës Rinisë dhe Sportit pjesëmarrësit I ka përshëndetur z. Agron Gashi zyrtar nga Departamenti I Sportit praën kësaj Ministrie.

Pas hapjes zyrtare, pjesëmarrësit kanë vazhduar garat në aktivitete të ndyshme sportive si vrapim me karrocë, basketboll, hendboll, goll-boll, pikado, shenjëtari etj. Miniolompiada do të zgjasë edhe nesër ku do t`u shperndahen medalje dhe mirënjohje garuesve më të mirë. QKSPEZH edhe kësaj radhe është sponsor gjeneral i Miniolimpiadës, ndërsa pjesëmarrësit janë mbeshtetur me transport, akomodim dhe ushqim. 

Vushtrri, 10 shtator 2009 – U.D. e Kryeshefit Ekzekutiv të Qendrës së Kosovës për Siguri Publike, Edukim dhe Zhvillim, znj. Taibe Canolli, sot, në ora 10:30, priti për një vizitë zyrtare Komesarin e Shërbimit Korrektues të Kosovës, z.Resmi Hoxha. Qëllimi i vizitës është thellimi i bashkëpunimit në mes të Qendrës për Siguri Publike, Edukim dhe Zhvillim dhe Shërbimit Korrektues, në fushën e edukimit dhe trajnimit të zyrtarëve të këtij institucioni.

Në takim u diskutua për planet afatgjate të programeve të edukimit dhe zhvillimit të zyrtarëve të sigurisë publike, e në veçanti për përkrahjen në trajnimin e oficerëve korrektues. Z.Hoxha njoftoi se në kuadër të SHKK-së fuksionon Njësia e Transportit që bënë përcjelljen e të burgosurve në Qendra Korrektuese. Ai kërkoi mbështetje nga QKSPEZH-i, për trajnim me armë të gjata të oficerëve korrektues që sigurojnë perimetrin e jashtëm të institucioneve korrektuese dhe për Njësitin e Transportit për Përcjellje të Burgosurve. Çështje tjetër që u diskutua në takim, ishte edhe mbështjetja me municion përgjatë trajnimit.
Znj.Canolli premtoi se “përkrahja e Shërbimit Korrektues në zbatimin e planit të trajnimeve, nuk do të mungojë as në të ardhmen”.  Ajo tha se “QKSPEZH përkujdeset të zbatojë me përpikshmëri misionin e saj për mbështetje edukative dhe teknike për të gjitha Agjensionet e zbatimit të ligjit”.

Si rezultat i misionit të përafërt dhe synimit të përbashkët për mbrojtjen e të drejtave dhe lirive të njeriut, Shërbimi Korrektues i Kosovës i zhvillon trajnimet në bashkëpunim me Policinë e Kosovës, dhe Agjencionet tjera të Sigursë Publike. Në vecanti trajnimet e avancuara vazhdojnë të mbeten vizion i përbashkët i këtyre agjencioneve.

Nën ombrellën e QKSPEZH-së funksionon Akademia e Shërbimit Korrektues të Kosovës, e cila nën udhëheqjen e kordinatorit të trajnimeve dhe stafit korrektues, përgatitë planin strategjik të trajnimeve dhe menaxhon trajnimet e zyrtarëve korrektues, sipas nevojave që parashihen me planin strategjik të trajnimit, gjithmonë në koordinim me QKSPEZH-in.
Shërbimi Korrektues është një ndër katër Agjencionet e Sigurisë Publike që ndajnë hapësirën e trajnimit bazik dhe të avancuar në Qendrën e Kosovës për Siguri Publike Edukim dhe Zhvillim, në Vushtrri.
 

Vushtrri, 29 Korrik 2009 – Dje, në ora 11:30, Qendrën e Kosovës për Siguri Publike, Edukim dhe Zhvillim, në Vushtrri, e vizitoi një delegacion nga Departamenti i Shëndetësisë së Policisë të Republikës së Shqipërisë. Delegacioni ishte i kryesuar nga drejtori i Departamentit të Shëndetësisë së Policisë, Dr.Dragush Canka, Dr. Engjëll Shehu- pneumoftiziatër, Dr. Gëzim Rugova- kirurg, ortoped dhe traumatolog dhe Fotaq  Koqi- ndihmës mjek për njësitë speciale. Në përcjellje të delegacionit ishte edhe drejtoresha e Shërbimeve Shëndetësore të Policisë së Kosovës, Lendita Kajtazi.

Qëllimi i kësaj vizite ishte bashkëpunimi de shkëmbimi i përvojave në mes të Shërbimit Mjekësor të QKSPEZH-it, Departamentit të Shëndetësisë të Policisë së Shqipërisë dhe Departamentit të Shëndetësisë të Policisë së Kosovës.

Ky delegacion u mirëprit nga u.d. e Kryeshefit Ekzekutiv të QKSPEZH-it, znj. Taibe Canolli dhe stafi menaxhues i kësaj Qendre. Fillimisht, drejtoresha Canolli bëri një prezentim rreth misionit, vizionit, fazës së tranzicionit, legjislacionit, trajnimeve dhe aktiviteteve që zhvillon  Qendra e Kosovës për Siguri Publike, Edukim dhe Zhvillim.

Më pas, delegacioni nga Shqipëria, i përcjellur nga stafi menaxhues i Qendrës, vizituan objektet e QKSPEZH-it, për t’u njohur për së afërmi me punën dhe aktivitetet që zhvillohen në departamente dhe sektore të ndryshme të kësaj Qendre.

Në fund, delegacioni u nda i kënaqur me mikëpritjen në Qendër dhe u fascionuan me punën, aktivitetet dhe funksionimin e  Qendrës Kosovare për Siguri Publike Edukim dhe Zhvvillim.

Nga të dy palët u shpreh vullneti për bashkëpunim sa më të ngushtë edhe në të ardhmen.

Vushtrri, 24 korrik 2009 – Pas një trajnimi të modifikuar 3 mujorë, sot në Qendrën e Kosovës për Siguri Publike, Edukim dhe Zhvillim, diplomoi gjenerata e 38-të e zyrtarëve të rinj policorë. Kjo gjeneratë numëron gjithsej 80 oficerë policorë.

Në ceremoninë e diplomimit morën pjesë ministri i  Punëve të Brendshme, z. Zenun Pajaziti, shefi i zyrës së stafit të kryemnistrit të Kosovës, z. Bekim Çollaku, drejtori i Aeroportit Ndërkombëtar të Prishtinës, z.Agron Mustafa, u.d. e Kryeshefit Ekzekutiv të Qendrës për Siguri Publike, Edukim dhe Zhillim, znj. Taibe Canolli, drejtori i Përgjithshëm i Policisë, z. Sheremet Ahmeti, përfaqësues nga KFOR-i, FSK-ja, zyrtarë të lartë nga Ministria e Punëve të Brendshme, Policia e Kosovës, Shërbimi Korrektues i Kosovës, Departamenti për Menaxhimin e Emergjencave, si dhe familjarë të të diplomuarve.
Ministri i Brendshëm, z. Zenun Pjaziti i përgëzoi zyrtarët e rinj policorë për diplomimin, duke theksuar se policia është dhe do të mbetet edhe më tutje ndër institucionet më të rëndësishme në ruajtjen e rendit në vend. “Policia e Kosovës arriti të bëhet ndër organizatat policore më të suksesshme në rajon, falë përkushtimit, angazhimit  dhe bashkëpunimit edhe me institucionet ndërkombëtare”. Në fund ministri Pajaziti tha se “Policia e Kosovës është në prag të 10 vjetorit dhe këtë ditë do ta shënojë me shumë të arritura. Ajo që është thënë ‘zero tolerancë’ ndaj krimit të organizuar do të jetë moto e Policisë së Kosovës ”.
Drejtori i Përgjithshëm i Policisë, Sheremet Ahmeti, vlerësoi se edukimi dhe trajnimi luajnë rol të rëndësishëm në formimin e kuadrit profesional. “Institucionet e zbatimit të ligjit duhet gjithmonë të përfaqësojnë komunitetin dhe shprehjen e vullnetit të lirë të tij, duke kuptuar se sistemi i qeverisjes që ne po e ndërtojmë nuk i jep fuqi absolute asnjë personi, grupi njerëzish apo institucioni, prandaj duhet të kujdesemi që si mbrojtës kryesor të këtij sistemi që ka ndërtuar vendi jonë, mos të lejojmë askë të jetë mbi ligjin”,- tha drejtori i Policisë së Kosovës, z. Sheremet Ahmeti.
Ndërsa, zëdhënësi i gjeneratës së 38-të, Besart Maloku, tha se do të përpiqen “që të mbrojnë të drejtat e të gjithë qytetarëve, pa dallim etnie, race, gjinie, duke zbatuar me përpikshmëri Ligjet e Republikës së Kosovës”.
Pas shpërndarjes së diplomave, kapitenët e klasëve i dorëzuan flamujt, të cilët simbolizonin të arriturat akademike, disiplinën, si dhe arritjet në të gjitha fushat gjatë tre mujorit të trajnimit.

 

Vushtrri, 20 Korrik 2009 – Sot në Qendrën e Kosovës për Siguri Publike, Edukim dhe Zhvillim, Ambasada Gjermane në bashkëpunim me OSBE-në, solemnisht dhuruan donacionin me vlerë prej 50 mijë euro. Donacioni përmbante libra që kryesisht mbulojnë sferën e sigurisë (Kriminalistikë, Planifikim i Emergjencave, Policimi në Komunitet, Menaxhimi në Polici, Shkathtësitë e Menaxhimit etj.), aparat mbushës për aparatet zjarrfikëse, kompresor për mbushjen e bombolave me oksigjen, kompasa matës (busulla) për Policinë Kufitare si dhe disa pajisje për vëzhgim në errësirë. 

Në ceremoni ishin të pranishëm ambasadori i Gjermanisë, z.Hans-Dieter Steinbach, shefi i misionit të OSBE-së në Kosovë, ambasadori Werner Almhofer, zëvendësministri i Punëve të Brendshme, z.Fatmir Xhelili, u.d. e Kryeshefit Ekzekutiv të Qendrës për Siguri Publike, znj. Taibe Canolli, drejtori i Policisë së kosovëz, z.Sheremet Ahmeti, kryetari i Komunës së Vushtrrisë, z.Bajram Mulaku, si dhe zyrtarë tjerë të lartë nga Ambasada e Gjermanisë, Minsitria e Punëve të Brendshme, OSBE-ja,  Policia e Kosovës, Departamenti për Menaxhimin e Emergjencave dhe nga Komuna e Vushtrrisë.

Hapjen e ceremonisë e bëri z.Heins Schneider – shef i  sektorit për Zhvillimin e Sektoreve të Sigurisë në Kosovë, i cili në emër të Ambasadës Gjermane dhe OSBE-së përshëndeti të pranishmit. Ai tha se “rëndësia e këtij donacioni është e veçantë, sepse përveç që do t’i ndihmojë agjencionet e zbatimit të ligjit për trajnim, kjo do t’i shërbejë në veçanti Qendrës për Sigui Publike, Edukim dhe Zhvillim (QKSPEZH) në arenën e akreditimit dhe certifikimit ndërkombëtar”. 

Në fjalën e tij, ambasadori i Gjermanisë, z.Hans-Dieter Steinbach vlerësoi lartë bashkëpunimin mes OSBE-së dhe QKSPEZH-it, në sferën e ngritjes së nivelit të trajnimit të zyrtarëve të Agjencioneve të Sigurisë Publike. Ai tha se “këto pajisje do të mundësojnë një trajnim jo vetëm teorik, por edhe praktik. Mbështetja për Policinë Kufitare duhet të forcohet jo vetëm për të ngritur sigurinë në Kosovë, por edhe që të ndihmojë procesin për liberalizimin e vizave”, tha ndër të tjera ambasadori i Gjermanisë, z. Steinbach.

Ndërkaq, zëvendësministri i Punëve të Brendshme, z.Fatmir Xhelili tha se “  Qendra e Kosovës për Siguri Publike Edukim dhe Zhvillim, do të pajiset me mjete të sofistikuara teknike duke ngritur kështu kapacitetet e saj për trajnimin dhe profesionalizimin e zyrtarëve të Agjencioneve që merren em zbatimin e ligjit”. 
Në vazhdim z.Xhelili falenderoi Ambasadën e Gjermanisë për “përkrahjen e vazhdueshme që ofron për demokratizimin dhe zhvillimin e gjithmbarshëm të Kosovës. Në këtë frymë është edhe mbështetja që po i ofrohet Qendrës për Siguri Publike Edukim dhe Zhvillim”, tha në vazhdim z.Xhelili.
Ai më tej tha se “sukseset tona të deritanishme i atribohen edhe partnerëve tanë”.
Zëvendësministri Xhelili siguroi që Ministria e Punëve të Brendshme është e përkushtuar me të gjitha kapacitetet dhe mekanizmat e saj, me theks të veçantë Policinë e Kosovës, që të jenë në nivel të detyrës dhe të sigurojnë sundimin e ligjit.

Ceremoninë e përshëndeti edhe Ambasadori i OSBE-së, z.Almhofer, i cili vlerësoi lartë rëndësinë e Qendrës për Siguri Publike Edukim dhe Zhvillim.
“Kjo Qendër luan një rol të rëndësishëm dhe e dimë se përfundimi i gjithë kësaj është siguria në Kosovë. Gjatë 10 viteve është punuar shumë në QKSPEZH që të ngritet vazhdimisht cilësia e trajnimeve”, tha z.Almhofer.

Pas përmbylljes së ceremonisë, nga Departamenti i Menaxhimit të Emergjencave u bë një demonstrim për mbushjen e bombolave me oksigjen. Ky  demonstrim u bë me pajisjen e dhuruar nga Ambasada e Gejrmanisë në Kosovë.