Lajmet

Qendrën e Kosovës për Siguri Publike, Edukim dhe Zhvillim (QKSPEZH), sot e vizituan Deputetët e Kuvendit të Republikës së Kosovës, ku u priten nga Kryeshefi Ekzekutiv Sheremet Ahmeti dhe menaxhmenti i lartë i qendrës.

Kryeshefi Ahmeti i informoi deputetet për gjitha trajnimet dhe aktivitetet e Qendrës së Kosovës për Siguri Publike, Edukim dhe Zhvillim. Deputetet gjatë kësaj vizite u informuan edhe për anëtarësimin e  fundit të QKSPEZH-it në Asociacionin Ndërkombëtar të Akademive Policore.

“Në Qendrën e Kosovës për Siguri Publike trajnohen pjesëtarë të sigurisë publike jo vetëm nga Republika e Kosovës, por edhe nga vendet e rajonit. Qëllimi ynë është që Qendra të marrë karakter regjional në Evropën Juglindore për studime në fushën e sigurisë publike”, tha Ahmeti.

Deputet  vlerësuan se QKSPEZH-in e shohin si një vend adekuat dhe të shkathët për t'i ofruar dijen dhe përgatitje shkencore pjesëtareve të sigurisë publike në vend.

Deputetja  e Kuvendit të Kosovës, Xhevahire Izmaku tha se qëllimi i vizitës se tyre kishte karakter informues për punën dhe trajnimet e shumta që janë duke bërë në QKSPEZH nga pjesëtarët e sigurisë publike.

“Ne si deputet premtojmë se përmes zërit tonë në Kuvendin e Kosovës  do t’i japim mbështetje të madhe, Qendrës së Kosovës për Siguri Publike Edukim dhe Zhvillim”, tha Izmaku.

Deputetet shprehën  kënaqësinë e tyre lidhur me vizitën dhe shfaqen gatishmërinë e tyre që ta mbështesin qendrën në çdo aspekt.

Vushtrri, 05 korrik 2011- Qendrën e Kosovës për Siguri Publike, Edukim dhe Zhvillim nesër në ora 12:00 do ta vizitoj një grup deputetësh nga Kuvendi i Republikës së Kosovës. Delegacioni do të pritet nga kryeshefi Ekzekutiv z. Sheremet Ahmeti, menagjmenti i lartë i Qendrës dhe nga agjencionet  e sigurisë publike.
Qëllimi i kësaj vizite nga deputetet e Kuvendit të Kosovës është që të  informohen më për së afërmi me punën, trajnimet, aktivitete dhe fazat tjera të  rëndësishme të cilat po kalon Qendra e Sigurisë Publike.
Ftohen mediat që të jenë prezent në këtë takim.
 

Vushtrri, 04 korrik ’11 – Qendra e Kosovës për Siguri Publike, Edukim dhe Zhvillim (QKSPEZH) është anëtarësuar në Asociacionin Ndërkombëtar të Akademive Policore (INTERPA). Kështu ka bërë të ditur Kryeshefi Ekzekutiv  i Qendrës së Kosovës për Siguri Publike, Edukim dhe Zhvillim, Sheremet Ahmeti, pas kthimit të tij nga vizita zyrtare dy ditore në Republikën e Turqisë.
Kryeshefi Ahmeti i shoqëruar nga drejtori i Departamentit të Trajnimeve për Përkrahje Programore Dukagjin Dinaj, gjatë vizitës zyrtare të tyre në Turqi kanë marrë pjesë në nënshkrimin e draft protokollit për themelimin e Asociacionit Ndërkombëtar të Akademive Policore (INTERPA), i cili u nënshkrua në Stamboll me 2  korrik ku përveç pjesëmarrjes në këtë nënshkrim QKSPEZH edhe u bë anëtare e këtij asociacioni.
Asociacioni Ndërkombëtar i Akademive Policore (INTERPA) ka për qëllim të themeloj platformën e komunikimit, bashkëpunimit, shkëmbimit dhe koordinimit të përvojave me shtetet anëtare të këtij asociacioni. 
Qëllimi i themelimit të këtij asociacioni është lufta kundër krimit, kundër terrorizmit, kontrabandës, trafikimit me njerëz dhe gjitha dukurive tjera negative.
Menaxhmenti i lartë i QKSPEZH-it në kuadër të vizitës së tyre zyrtare në Turqi kanë marrë pjesë edhe në një ceremoni të Akademisë Policore Kombëtare Turke në Ankara. Gjatë kësaj ceremonie kryeshefi Ahmeti ka pasur takim miqësor edhe me presidentin e Republikës së Turqisë, Abdullah Gyl, dhe kryeministrin  Recep Tayyip Erdogan. Përveç tjerash kryeshefi Ahmeti është takuar me përfaqësuesit e lartë të Akademisë Policore turke ku kanë diskutuar  për vazhdimin e bashkëpunimit mes Kosovës dhe Turqisë. Ahmeti tha se gjatë takimeve është vlerësuar lartë bashkëpunimi bilateral midis dy vendeve dhe është shprehur gatishmëria për ngritjen dhe thellimin e marrëdhënieve në gjitha fushat e në theks të veçantë në fushën e sigurisë, në fushën e trajnimeve. 

Vushtrri, 20 qershor 2011- Nënkampioni Evropian i xhudos z. Anton Cena  instruktor në Qendrën e Kosovës për Siguri Publike, Edukim dhe Zhvillim tani edhe nënkampion botëror. Anton Cena rreshter në Policinë e Kosovës njëherit është edhe  Instruktor në Qendrën e Kosovës për Siguri Publike, Edukim dhe Zhvillim (QKSPEZH), pas shumë fitoreve në Xhudo ai u shpallë edhe nënkampion botëror në kampionatin e xhudos të mbajtur në Frankfurt të Gjermanisë më 17 qershor 2011.
Ne këtë Kampionat kane marre pjese xhudistë nga vende të ndryshme botërore si nga  Japonia , Brazili, Amerika, Mongolia, Norvegjia etj.
 Anton Cena gjatë kësaj gare mposhti gjermanin Notzel Werner, Braziliani Ivan Penne Norvegjezin Chinchila Alfredo për të arritur deri në finale.
Cena me paraqitjen e tij shumë profesionale dhe të shkëlqyer  luftojë deri në fund mirëpo u mposhtë nga rusi Nikolai Evgerov. Cena thotë se nuk do të ndalet me kaq ai shpreson që me shkathtësitë që ka dhe profesionalizmin e tij një ditë do të bëhet edhe kampion bote. Cena e cilësoi lartë pjesëmarrjen në këtë ngjarje sportive duke falënderuar Policinë e Kosovës dhe Qendrën e Kosovës për Siguri Publike, Edukim de Zhvillim që i mundësoi pjesëmarrjen në këtë Kampionat.

Vushtrri, 20 qershor ’11 –  Në Qendrën e Kosovës për Siguri Publike, Edukim dhe Zhvillim (QKSPEZH) për të shtatën herë me radhë u mbajt Miniolimpiada për persona me aftësi të kufizuara  e cila është  organizuar nga OPFAKOS e përkrahur nga Ministria e Punëve të Brendshme, QKSPEZH dhe OSBE-ja. Në këtë miniolimpiad kanë marrë pjesë rreth 450 persona me aftësi të kufizuara. Në hapjen zyrtare të Miniolimpiadës të pranishëm ishin  Kryeshefi Ekzekutiv i QKSPEZH-it, Sheremet Ahmeti, zëvendës ambasadori i OSBE-së Edward Joseph si dhe përfaqësues të KFOR-it.
Kryeshefi Ekzekutiv i QKSPEZH-it Sheremet Ahmeti tha se  është nder dhe kënaqësi e madhe që të bëjmë së bashku hapjen e miniolimpiadës së Organizatës së Prindërve të Fëmijëve me Aftësi të Kufizuara në Qendrën e Kosovës për Siguri Publike, Edukim dhe Zhvillim.
“Trajtimi, përkujdesja dhe qasja ndaj personave me aftësi të kufizuara është një ndër faktorët kyçë që përcaktojnë edhe vlerat dhe sistemin e ndërtuar në shoqëri të veçanta dhe në përgjithësi në aspektin global”, tha Ahmeti. Ai tha se duke parë se vendi ynë dekadave të fundit ka kaluar nëpër faza të vështira shoqërore e politike, kjo pa dyshim që ka ndikuar që perceptimi dhe trajtimi për këtë kategori shumë të rëndësishme të shoqërisë sonë të mos jetë ashtu si duhet të jetë. Kryeshefi Ahmeti tha se me konsolidimin gradual të institucioneve demokratike të shtetit tonë, gjendja e personave me aftësi të kufizuara në Kosovë ka shënuar progres të vazhduar, që njëherësh tregon edhe orientimin e drejtë dhe racional të sektorit qeveritar, shoqërisë civile dhe të gjithë mekanizmave tjerë tek ne në këtë aspekt. Ai tha për shtatë vite me radhë Qendra është nikoqire e miniolimpiadës së fëmijëve me aftësi të kufizuara dhe prindërve të tyre, ku për dy ditë me radhë ata bëjnë gara në disiplina të ndryshme sportive dhe kënaqen duke u shoqëruar me njëri-tjetrin. Kjo njëherësh paraqet më së miri urën lidhëse ndërmjet qytetarit në njërën anë, dhe në anën tjetër të policit, zjarrfikësit, doganierit apo korrektuesit, të cilët në fakt i shërbejnë këtij qytetari.
Zëvendës ambasadori i OSBE-së në Kosovë ka përshëndetur të pranishmit duke thënë se OSBE është e gatshme të përkrah vazhdimisht Qendrën e Kosovës për Siguri Publike, Edukim dhe Zhvillim në realizimin e trajnimeve dhe aktiviteteve tjera.
“OSBE nuk e mbështet vetëm trajnimet e personave të sigurisë publike, por edhe këta persona  ma të ndjeshëm të shoqërisë sonë”, tha  Joseph. Ai tha se Institucionet Demokratike në Kosovë duhet të din jo vetëm për personat me aftësi të kufizuar por edhe për aftësitë e tyre.
Kryetari i OPFAKOS-të, Gani Mehmeti ka përshëndetur  të pranishmit dhe i ka falënderuar për përkrahjen e vazhdueshme që QKSPESH dhe OSBE i bënë personave me aftësi të kufizuar në realizimin e aktiviteteve të tyre. Mehmeti gjatë fjalimit të tij tha se është shumë e rëndësishme që këta persona kanë gjetur përkrahje nga QKSPEZH-i dhe OSBE. “Kjo  përkrahje që po bëhet tani  është një shembull shumë i mirë të cilin duhet ndjekur”, tha Mehmeti.
Mehmeti ka shprehur dëshirën që ky bashkëpunim të vazhdojë edhe në të ardhmen. “ Tani shtatë vjet gjejmë përkrahje të madhe nga Qendra e Kosovës për Siguri Publike, Edukim dhe Zhvillim. U jemi  shumë mirënjohës donatorëve që kanë përkrahur këtë miniolimpiad siç janë  OSBE-ja MPB, QKSPEZH’’, u shpreh Mehmeti.
Pas hapjes zyrtare, pjesëmarrësit kanë vazhduar garat në aktivitete të ndyshme sportive si vrapim me karrocë, basketboll, hendboll, goll-boll, pikado, shenjëtari etj.
Në fund të kësaj ngjarje e cila zgjati dy ditë radhazi pjesëmarrësit fitues të garave të miniolimpiadës  ju shpërndan medalje, certifikata dhe mirënjohje.

  Vushtrri, 17 qershor ‘11- Në Qendrën e Kosovës për Siguri Publike, Edukim dhe Zhvillim (QKSPEZH) do të mbahet miniolimpiada për persona më aftësi të kufizuara. Miniolimpiada do të mbahet dy ditë radhazi të shtunën dhe të dielën (me datën 18 dhe 19 qershor). Hapja e ceremonisë zyrtare do të bëhet të shtunën në ora 11:00, në QKSPEZH. Miniolimpiada e cila  organizohet nga  “OPFAKOS”  përmban aktivitet të ndryshme sportive si: vrapim me karrocë, basketboll, hendboll, goll-boll, pikado, shenjëtari etj. Pjesëmarrës do të jenë  450 persona, të cilët janë kryesisht fëmijë të përcjellë nga familjarët e tyre dhe organizatorët.
Qendra e Kosovës për Siguri Publike, Edukim dhe Zhvillim dhe Organizata për Siguri dhe Bashkëpunim Evropian (OSBE) edhe kësaj radhe janë sponsor gjeneral i miniolimpiadës për persona me aftësi të kufizuar.
Ftohen mediat që të jenë prezent.

 Në Qendrën e Kosovës për Siguri Publike, Edukim dhe Zhvillim (QKSPEZH), u mbajt ceremonia e diplomimit të gjeneratës së 42-të e zyrtarëve policorë, (kadetë) të Policisë  së Kosovës.
Në këtë ceremoni ishin të pranishëm ministri i Punëve të Brendshme, Bajram Rexhepi, drejtori i Policisë së Kosovës, Reshat Maliqi, kryeshefi ekzekutiv i QKSPEZH-it, Sheremet Ahmeti, zyrtarë të lartë të KFOR-it,  EULEX-it, OSBE, ICITAP,  si dhe familjarë të zyrtarëve policorë të Policisë së Kosovës të gjeneratës së 42-të.
Me këtë rast, ministri Bajram Rexhepi, u uroi sukses gjeneratës së re të Policisë së Kosovës në kryerjen e detyrave të tyre dhe tha se policët e sapo diplomuar do të marrin detyra dhe përgjegjësi të reja për ruajtjen e rendit dhe qetësisë për gjithë qytetarët e Republikës së Kosovës.
Ai paralajmëroi se tashmë gjeneratat e reja të policisë do të trajnohen me një koncept të ri.
“Tani e tutje gjeneratat e reja të Policisë së Kosovës do të trajnohen me një koncept më të avancuar”, tha ministri Rexhepi.
Ndërsa drejtori i Policisë së Kosovës, Reshat Maliqi, tha se institucionet e zbatimit të ligjit nuk duhet lejuar askënd të jetë mbi ligjin.
“Edukimi dhe trajnimi në QKSPEZH ka krijuar mundësinë që sot të kemi zyrtarë policor të trajnuar sipas standardeve dhe praktikave më të larta ndërkombëtare të zbatimit të ligjit dhe të drejtave të njeriut”, tha Maliqi.
Kryeshefi ekzekutiv i QKSPEZH-it, Sheremet Ahmeti i inkurajoi kadetët e rinj që të kryejnë detyrat e tyre me ndershmëri dhe dinjitet.
“Jam thellësisht i bindur se ju si policë të ardhshëm të Republikës së Kosovës do të ballafaqoheni me sukses me të gjitha sfidat që do t’i keni në të ardhmen gjatë kryerjes së detyrave të juaja zyrtare”, tha Ahmeti.
Gjithashtu, në këtë ceremoni mori fjalën zëdhënësi i gjeneratës së 42-të të Policisë së Kosovës, Skënder Zejnullahu.
“Që nga dita e sotme, familja e madhe dhe të shenjtë e zbatimit të ligjit do të ketë përkrah me plotë përgjegjësi morale dhe profesionale. Ne do t’i kryejmë më nderë të gjitha detyrat që na udhëzon Ligji i Republikë së Kosovës”, tha Zejnullahu.
Në emër të gjeneratës së 42-të të Policisë së Kosovës, ai tha se do të angazhohen të japin maksimumin për ruajtjen e rendit dhe qetësisë publike në tërë territorin e Republikës së Kosovës.

Vushtrri, 10 qershor 11- Në Qendrën e Kosovës për Siguri Publike, Edukim dhe Zhvillim sot përfundoi trajnimi një javorë “armët shkatërrimit në masë”. Ky trajnim ishte i mbështetur nga  International Criminal Investigative Training Assistance Program (ICITAP). Pjesëmarrës në këtë trajnim ishin nga Policia e Kosovës, Dogana , prokuror si dhe pjesëtarë të sigurisë publike nga Republika e Shqipërisë. Ligjërues të këtij trajnimi ishin instruktor të FBI nga Shtetet e Bashkuara të Amerikës, të cilët vlerësuan shumë lartë mbajtjen e këtij trajnimi si dhe theksuan, “përvojat tona nga Shtetet e Bashkuara të Amerikës i kemi përcjell tek ju në aftësimin dhe profesionalizimin për ruajtjen e sigurisë së përgjithshme  për të gjithë qytetarët e Republikës së Kosovës”.
Në fund pjesëmarrësve të trajnimit ju shpërndanë certifikatat.

Vushtrri, 09 qershor ‘11- Të premten në ora 10:00, në Qendrën e Kosovës për Siguri Publike, Edukim dhe Zhvillim (QKSPEZH) do të mbahet ceremonia e diplomimit të gjeneratës së 42 -të  e  zyrtarëve policorë, (kadetë) të policisë  së Kosovës.Të pranishëm në ceremoninë e diplomimit do të jenë Ministri i Punëve të Brendshme Bajram Rexhpi, Kryeshefi Ekzekutiv i QKSPEZH-it Sheremet Ahmeti, drejtori i Policisë së Kosovës Reshat Maliqi, zyrtar të lartë të KFOR-it,  EULEX-it, OSBE, ICITAP  si dhe familjarë të zyrtarëve policorë të Policisë së Kosovës të gjeneratës së 42-të.

Ftohen mediat që të marrin pjesë  në ceremoninë e Diplomimit.

Vushtrri, 07 qershor ’11 - Një delegacion i Akademisë së Sigurisë nga Austria sot vizitoi Qendrën e Kosovës për Siguri Publike, Edukim dhe Zhvillim (QKSPEZH) ku u prit nga menaxhementi i lartë i qendrës. Delegacioni i kryesuar nga kolonel Peter Lamplot dhe Heinz Schneider u njoftuan me të gjitha të arriturat e qendrës, konceptin, vizionin dhe trajnimet të cilat mbahen në Qendër nga gjitha agjencionet si  Policia e Kosovës, Agjencioni për Menaxhimin e Emergjencave, Shërbimit Korrektues dhe Dogana e Kosovës. Gjatë takimit i cili kishte karakter njoftues u bisedua  edhe për format dhe mundësitë e bashkëpunimit bilateral mes Austrisë dhe Kosovës sidomos sa  i përket fushës së sigurisë.Drejtori i Departamentit të Administratës së Përgjithshme, Halim Shala ka shprehur falënderimin e tij për bashkëpunimin e mirë mes QKSPEZH-it dhe Akademisë së Sigurisë në Austri. Shala tha se QSKPEZH është e gatshme që të shkëmbej përvoja me gjitha akademitë policore evropiane.Ndërkaq edhe  kolonel Peter Lamplot gjatë  vizitës së tij në QKSPEZH ka prezantuar plan programin e Akademisë së Sigurisë në Austri dhe mënyrën se si funksionon kjo akademi. Ai më këtë rast ka shprehur gatishmërinë e tij për shkëmbimin e përvojave mes Qendrës së Kosovës për Siguri Publike, Edukim dhe Zhvillim dhe Akademisë së Sigurisë në Austri. Në fund delegacioni nga Austria kanë vizituar e gjithë ambientin e Qendrës.

Vushtrri, 06 qershor ’11- Pas trajnimeve të shumta që po mbahen në Qendrën e Kosovës për Siguri Publike, Edukim dhe Zhvillim sot filloi trajnimi mbi hetimet  e armëve të shkatërrimit në masë,  trajnim ky i organizuar nga International Criminal Investigative Training Assistance Program (ICITAP). Pjesëmarrësit të cilët vijojnë këtë trajnim janë pjesëtarë të  Policisë së Kosovës, Dogana e Kosovës dhe prokuror. Në këtë trajnim janë duke marrë pjesë edhe pjesëtarë të sigurisë publike nga Republika e Shqipërisë.
 Ligjërues në këtë trajnim janë instruktor të FBI  nga Shtete e Bashkuara të Amerikës.
“Qëllimi i këtij trajnimi është aftësimi dhe profesionalizimi i pjesëtarëve të sigurisë publike në ruajtjen e rendit dhe sigurisë së përgjithshme për të gjithë qytetarët e Republikës së Kosovës”, than pjesëmarrësit. Ky trajnim do të zgjasë një javë.  

Vushtrri, 03 qershor ’11-  Kryeshefi Ekzekutiv i Qendrës se Kosovës për Siguri Publike, Edukim dhe Zhvillim z. Ahmeti priti në takim një delegacion nga kontigjenti i KFOR-it Francez i kryesuar nga Komandanti  Kolonel Michel Georges.
Fillimisht z. Ahmeti iu uroi mirëseardhje e më pas i informoi me punën, trajnimet dhe aktivitetet tjera të cilat zhvillohen në Qendër nga katër agjencionet e sigurisë publike në Kosovë. Gjithashtu z. Ahmeti delegacionin e  informoi  edhe për konceptin, vizionin, fazën e tranzicionit, akreditimit, legjislacionit, por edhe për sukseset dhe të arriturat e Qendrës së Kosovës për Siguri Publike.
“Në Qendrën e Kosovës për Siguri Publike trajnohen pjesëtarë të sigurisë publike jo vetëm nga Republika e Kosovës, por edhe nga vendet e rajonit. Qëllimi ynë është që Qendra të marrë karakter regjional në Evropën Juglindore për studime në fushën e sigurisë publike, tha kryeshefi Ahmeti.Kryeshefi Ahmeti  foli edhe për ndihmën e vazhdueshme që kanë dhënë  në ngritjen dhe kapacitetet e Qendrës  dy partnerët kryesor OSBE-ja dhe ICITAP.Z.Ahmeti  falënderoi edhe KFOR-in për bashkëpunimin e mirë qe kanë pasur deri me tani në ngritjen e sigurisë së përgjithshme në  Kosovë.

Ndërsa Komandanti i i Kontigjentit të KFOR-it Francez Kolonel Michel Georges falënderoi për pritjen si dhe shprehu bindjen se ky bashkëpunim do të vazhdoj edhe në të ardhmen në ruajtjen e rendit dhe sigurisë për të gjithë qytetarët e Republikës së Kosovës.

Në fund të takimit delegacioni i KFOR-it bëri edhe një vizitë objekteve dhe pajisjeve me të cilat trajnohen pjesëtaret e sigurisë publike.