Paris, 10 tetor 2025 – Me ftesë të FRANCOPOL (Rrjeti Ndërkombëtar Frankofon i Trajnimit Policor), ku Akademia e Kosovës për Siguri Publike (AKSP) është anëtare me të drejta të plota, zyrtarë të lartë të AKSP-së morën pjesë në Kongresin e 8-të Ndërkombëtar të FRANCOPOL, i cili u mbajt gjatë datave 7 - 9 tetor 2025 në ambientet e Drejtorisë për Bashkëpunim Ndërkombëtar të Sigurisë të Ministrisë së Brendshme Franceze, në Paris, Francë. AKSP në këtë ngjarje të rëndësishme ndërkombëtare u përfaqësua nga z. Shpend Shabani, Ushtrues i Detyrës së Drejtorit të Përgjithshëm, dhe z. Avni Istrefi, Udhëheqës i Divizionit për Marrëdhënie me Jashtë.

Në kuadër të programit u mbajt asambleja e anëtarëve të rrjetit FRANCOPOL dhe Kongresi i 8-të i FRANCOPOL-it me ç’rast u zhvilluan sesione të veçanta pune, ku pjesëmarrësit ndanë përvoja dhe arritjet e tyre nga hulumtimet shkencore në fushën e arsimit policor dhe sigurisë publike. Diskutimet u përqendruan në zhvillimet bashkëkohore të trajnimit policor, përdorimin e teknologjive të reja dhe Inteligjencës Artificiale në proceset e mësimdhënies dhe trajnimit, si dhe në forcimin e kapaciteteve profesionale të institucioneve të sigurisë. Pjesëmarrësit theksuan rëndësinë e integrimit të inovacionit digjital dhe trajnimeve virtuale në përgatitjen e kuadrove të sigurisë publike dhe ndarjen e përvojave të përbashkëta ndërmjet vendeve anëtare të rrjetit FRANCOPOL.

Pjesëmarrja e AKSP-së në këtë ngjarje përfaqëson një hap të rëndësishëm në procesin e ndërkombëtarizimit të AKSP-së në veçanti, dhe të Republikës së Kosovës në përgjithësi, në përputhje me strategjinë shtetërore për forcimin e bashkëpunimit ndërkombëtar në fushën e arsimit dhe trajnimit të sigurisë publike. Në këtë ngjarje treditore, ishin të pranishëm përfaqësues të anëtarëve të FRANCOPOL nga vendet e ndryshme të botës si: Franca, Kanada, Zvicra, Belgjika, Luksemburgu, Kamboxhia, Haiti, Kameruni, Senegali, etj.

Kjo pjesëmarrje e AKSP-së në Kongresin e 8-të të FRANCOPOL është mundësuar dhe përkrahur falë bashkëpunimit të ngushtë dhe mbështetjes së Projektit “HAPE” (Programi i Punëve të Brendshme i Bashkimit Evropian në Kosovë). Kjo mbështetje përbën një kontribut të rëndësishëm në forcimin dhe zhvillimin e mëtejmë të bashkëpunimit ndërkombëtar të AKSP-së, ngritjen e kapaciteteve institucionale, si dhe përmirësimin e cilësisë së trajnimeve në përputhje me standardet evropiane të sigurisë publike, përfshirë shkëmbimin e përvojave dhe praktikave më të mira profesionale.

AKSP mbetet e përkushtuar të vazhdojë bashkëpunimin me rrjetet ndërkombëtare të trajnimit policor dhe të avancojë në përfshirjen e praktikave inovative në proceset e trajnimit dhe edukimit të sigurisë publike në Kosovë.

Vushtrri, 2 tetor 2025 - Delegacioni nga Iowa Law Enforcement, SHBA vizitoi sot Akademinë e Kosovës për Siguri Publike, ku u prit nga ushtruesi i detyrës së Drejtorit të Përgjithshëm, Shpend Shabani me bashkëpunëtorë.

Vushtrri, 30 shtator, 2025 - Në Akademinë e Kosovës për Siguri Publike u mbajt mbledhja e parë e Këshillit të Etikës, i cili ka mandatë promovimin e integritetit akademik, respektimin e normave etike dhe adresimin e çështjeve që lidhen me etikën profesionale dhe akademike.

Mbledhjen e hapi ushtruesi i detyrës së Drejtorit të Përgjithshëm të AKSP-së z. Shpend Shabani i cili theksoi rëndësinë e funksionimit të këtij organi për forcimin e kulturës akademike dhe përmbushjen e standardeve të akreditimit, duke shtuar se me themelimin e këtij Këshilli po i shtohet edhe një vlerë institucionit tonë. “Ne si institucion synojmë jetësimin e vlerave etike dhe të integritetit. Po ashtu u zotua se do të ofroj mbështetje për çdo iniciativë dhe aktivitet të këtij Këshilli i cili është edhe një nga indikatorët për plotësimin e standardeve të akreditimit”, tha z. Shabani.

Për rendësin e funksionit dhe rolin e Këshillit të Etikës foli edhe Dekani i Fakultetit të Sigurisë Publike z. Ferid Azemi, i cili falënderoi të pranishmit, duke iu uruar punë të mbarë anëtarëve të Këshillit, ndërsa theksoi se funksionimi i këtij Këshilli është shumë i nevojshëm, sidomos tani kur ka marrë hov të madh zhvillimi i teknologjisë.

“Në aspektin akademik është shumë e nevojshme të bëhet promovimi i vlerave hulumtuese duke iu shmangur plagjiaturës sepse edhe aplikimi i teknologjisë e sidomos inteligjencës artificiale mund të krijoj rezultate negative në plagjiaturë. Andaj qëllimi i këtij Këshilli përveç aspektit disiplinor mendoj se duhet orientohet më shumë në dimensionin e sensibilizimit dhe preventives rreth proceseve plagjiaturës ku përmes fushatave dhe dokumenteve promovuese mund të arrihet ky qëllim”, tha z. Azemi.

Nga aspekti i sigurimit të cilësisë foli edhe z. Emin Uka, Udhëheqës i Divizionit për Sigurimin e Cilësisë i cili theksoi se ky Këshill ka vlerë të madhe për institucionin tonë e sidomos nga aspekti i cilësisë dhe besoj se Këshilli i Etikës mund të krijojë dhe instalojë kulturë etike si vlera të cilat do ti jetësojmë.

Tutje z. Emini tha se, sipas standardeve akredituese roli dhe puna e këtij Këshilli është shumë dimensional dhe ndihmon institucionin në përmbushjen e tyre.

Në këtë takim u prezantua përbërja e Këshillit dhe u diskutua për hartimin e draftit për plani vjetor të punës së Këshillit të Etikës i cili do të jetë një udhërrëfyes për punën dhe dëshmi e angazhimit për të përmbushur përgjegjësitë ndaj vlerave të përbashkëta dhe i cili do të përfshijë aktivitete të ndërgjegjësimit mbi integritetin akademik, organizimin e trajnimeve dhe ligjëratave për student dhe stafin akademik.

Takimi u finalizua me zotimin e anëtarëve për bashkëpunim të ngushtë dhe përkushtim në përmbushjen e mandatit të Këshillit.