NewsArticle

Vushtrri, 12 nëntor 2025 - Në Akademinë e Kosovës për Siguri Publike (AKSP) u mbajt takimi i parë konstituiv i Bordit të Rrjetit Alumni. Në këtë takim morën pjesë ish-studentë të Akademisë, sot pjesëtarë të institucioneve të sigurisë publike dhe anëtarë të Bordit të Rrjetit Alumni, duke shënuar një moment të rëndësishëm në forcimin e bashkëpunimit të vazhdueshëm ndërmjet AKSP-së dhe komunitetit të saj të alumnive.

Takimin e hapi U.d. Drejtori i Përgjithshëm i AKSP-së, z. Shpend Shabani, i cili theksoi rëndësinë strategjike të funksionalizimit të Rrjetit Alumni si një mekanizëm jetik për ndërtimin e partneriteteve të qëndrueshme dhe përfshirjen aktive të ish-studentëve në zhvillimin e mëtejmë të Akademisë. Ai rikujtoi se roli i Rrjetit Alumni është të forcojë marrëdhëniet ndërmjet AKSP-së dhe ish-studentëve të arsimit të lartë, të ofrojë këshilla për zhvillimin institucional, të nxisë rrjetëzimin profesional dhe të kontribuojë në promovimin e vlerave të arsimit, integritetit dhe etikës profesionale. Po ashtu, Rrjeti pritet të zhvillojë aktivitete profesionale, sociale, kulturore e kërkimore, duke mbështetur publikimet shkencore dhe nisma të tjera të rëndësishme për komunitetin e sigurisë publike.

Në vijim, u prezantua përbërja e Bordit të Rrjetit Alumni dhe u diskutua draft-plani vjetor i punës, i cili do të shërbejë si dokument udhërrëfyes për aktivitetet dhe objektivat e Bordit gjatë vitit të ardhshëm. Plani parasheh nisma për forcimin e integritetit akademik, rritjen e përfshirjes së alumnive, organizimin e trajnimeve, ligjëratave dhe aktiviteteve të tjera profesionale e komunitare.

Me votim unanim, znj. Zijavere Keqmezi u zgjodh Kryesuese e Bordit të Rrjetit Alumni të AKSP-së, duke marrë besimin e anëtarëve për të udhëhequr punën dhe zhvillimin e mëtejmë të Rrjetit.

Takimi u përmbyll me zotimin e anëtarëve për bashkëpunim të ngushtë dhe përkushtim të plotë në përmbushjen e mandatit të Bordit, duke vendosur një themel të qëndrueshëm për funksionimin dhe avancimin e Rrjetit të Alumni të AKSP-së.

Vushtrri, 12 dhjetor 2025 - Sot, në ambientet e Akademisë së Kosovës për Siguri Publike (AKSP), Zyra e Erasmus+ në Kosovë mbajti sesionin informues dedikuar mundësive që ofron programi Erasmus+ i BE-së për stafin mësimdhënës dhe administrativ, si dhe për studentët e Fakultetit të Sigurisë Publike (FSP) të AKSP-së. Ky aktivitet kishte për qëllim informimin për pjesëmarrje rreth mundësive që ofron Erasmus+ për AKSP-në, siç është fusha e arsimit të lartë dhe e arsimit dhe aftësimit profesional për mobilitet, ngritje kapacitetesh dhe aspekte të tjera.

Sesioni informues u hap nga ushtruesi i detyrës së Drejtorit të Përgjithshëm të AKSP-së, z. Shpend Shabani, i cili shprehu mirënjohje për Zyrën e Erasmus+ në Kosovë dhe bashkëpunimin e vazhdueshëm në kuadër të programit Erasmus+. Ai theksoi se ky program është një mundësi e rëndësishme për zgjerimin e partneritetit ndërkombëtar, forcimin e kapaciteteve profesionale dhe avancimin e cilësisë në trajnimin dhe arsimimin e zyrtarëve të institucioneve të sigurisë publike. Drejtori Shabani ritheksoi gatishmërinë e plotë të AKSP-së për të intensifikuar bashkëpunimin me partnerët ndërkombëtarë, përfshirë OSBE-në dhe institucionet e BE-së, duke potencuar se projekte të tilla janë gjithmonë të mirëseardhura dhe me rëndësi të veçantë për zhvillimin institucional.

Ndërkaq, Prof. Dr. Vilard Bytyqi, ushtrues i detyrës së Dekanit të FSP-së, vuri në dukje rëndësinë e dimensionit ndërkombëtar të programit Erasmus+ për studentët dhe stafin akademik. Ai theksoi se pjesëmarrja në projekte ndërkombëtare kontribuon në rritjen profesionale, në shkëmbimin e praktikave të mira dhe në integrimin e institucioneve të Kosovës në rrjetet evropiane të arsimit të lartë.

Ndërkaq, udhëheqësi i Divizionit për Marrëdhënie me Jashtë (DMJ) në AKSP, Avni Istrefi, foli për bashkëpunimin me Erasmus+ dhe me institucionet tjera akademike të sigurisë në rajon dhe më gjerë, duke vlerësuar se bashkëpunimet e tilla rritin kredibilitetin e AKSP-së dhe FSP-së, në arenën ndërkombëtare.

Në kuadër të sesionit informues të programit Erasmus +, menaxherja e Zyrës së Erasmus+ në Kosovë, Blerina Zjaça Osmani, i njoftoi të pranishmit për dallimet që kanë thirrja për vitin e ardhshëm 2026 nga thirrjet e vitit të kaluar, pra vitit 2025. Ajo shpjegoi rregullat e reja të aplikimit dhe kushtet që duhet plotësuar për të qene përfitues të këtij programi. Ndër të tjera, ajo zbërtheu në detaje për të pranishmit Mobilitetin Ndërkombëtar të Kredive dhe të Diplomave, Ngritjen e Kapaciteteve si në Arsimin e Lartë, po ashtu edhe në Trajnimin Profesional, Jean Monnet, Shkëmbimet virtuale, Kartën e Erasmus+ për Arsimin e Lartë (ECHE) etj., e cila është në planet e AKSP-së për të aplikuar në të ardhmen e afërt.

Ndërsa përfaqësuesit nga Akademia e Kosovës për Siguri Publike u shprehën optimistë se studentët dhe mësimdhënësit e të dyja niveleve të arsimit që ofrohen në AKSP, pra të arsimit profesional dhe të trajnimit profesional, në të ardhmen do të mund të përfitojnë edhe më shumë nga programi Erasmus+.

Në përmbyllje, u prezantuan thirrjet aktuale, afatet e fundit për aplikime dhe u inkurajua pjesëmarrja aktive në projektet e ardhshme.