Vushtrri, 4 dhjetor 2025 – Në ambientet e Agjencisë së Kosovës për Siguri Publike (AKSP) u zhvillua punëtoria rajonale me titull “Transparenca e Agjencive Mbikëqyrëse Policore dhe Roli i Transparencës në Forcimin e Integritetit Policor”. Ky aktivitet u organizua nga Inspektorati Policor i Kosovës (IPK) në partneritet me AKSP-në dhe përfaqëson një nga ngjarjet kryesore të Planit të Aktivitetit të Forumit Rajonal të Agjencive Mbikëqyrëse Policore.

Punëtoria dyditore mblodhi përfaqësues nga institucionet e mbikëqyrjes policore dhe departamentet e kontrollit të brendshëm të rajonit, përfshirë delegacione nga agjencitë mbikëqyrëse policore nga Shqipëria, Maqedonia e Veriut dhe Mali i Zi dhe përfaqësues të institucioneve vendore, nga Ministria e Punëve të Brendshme, Inspektorati Policor i Kosovës, Policia e Kosovës, Akademia e Kosovës për Siguri Publike. Pjesë e kësaj punëtorie ishin edhe profesorë nga Universiteti i Prishtinës (Fakulteti i Filologjisë – Programi i Gazetarisë) dhe përfaqësuesja e Misionit të OSBE-së në Kosovë.

Qëllimi kryesor ishte promovimi i transparencës institucionale si një shtyllë thelbësore në rritjen e besimit publik dhe forcimin e integritetit policor në nivel rajonal. Pjesëmarrësit – përfaqësues të institucioneve të ndryshme të mbikëqyrjes policore dhe strukturave të kontrollit të brendshëm nga vendet e rajonit – patën mundësinë të diskutojnë sfidat aktuale, të prezantojnë praktika të mira dhe të shkëmbejnë përvoja në fushën e mbikëqyrjes policore.

Gjatë sesioneve u trajtuan temat kyçe si: rëndësia e komunikimit transparent me publikun, roli i raportimit të rregullt në llogaridhënie, përdorimi i mekanizmave të avancuar të monitorimit, si dhe forcimi i bashkëpunimit ndërinstitucional në adresimin e parregullsive policore. Po ashtu, u theksua nevoja për standardizimin e qasjeve të mbikëqyrjes dhe rritja e efikasitetit të institucioneve përgjegjëse në ruajtjen e etikës dhe profesionalizmit.

Diskutimet treguan qartë se transparenca lidhet ngushtë me profesionalizmin, etikën policore dhe integritetin institucional.

Punëtoria rezultoi një platformë e rëndësishme për nxitjen e dialogut dhe koordinimit rajonal, duke kontribuar në krijimin e një rrjeti më të fortë dhe më bashkëpunues ndërmjet agjencive që kanë mision të përbashkët sigurimin e integritetit dhe përgjegjshmërisë policore.

Në fund të aktivitetit u mbajt ceremonia e ndarjes së certifikatave. Përfaqësuesit e IPK-së dhe AKSP-së falënderuan delegacionet për pjesëmarrjen dhe theksuan rëndësinë e vazhdimit të bashkëpunimit rajonal në forcimin e integritetit policor dhe qeverisjes së mirë.

Vushtrri, 18 nëntor 2025 - Biblioteka e Akademisë së Kosovës për Siguri Publike është pasuruar me dhjetëra tituj të rinj librash në gjuhën angleze, të botuar nga shtëpi botuese ndërkombëtare. Këto libra përfshijnë fusha të ndryshme të sigurisë publike dhe janë pjesë e literaturës së programit të ri studimor “Bachelor në Siguri Publike”, i cili aktualisht është në procedurë të akreditimit nga Agjencia e Kosovës për Akreditim.

Me këtë koleksion të ri, studentët dhe stafi akademik kanë mundësi të zgjerojnë edhe më tutje qasjen në literaturë bashkëkohore që mbështet studimet, hulumtimet dhe mësimdhënien bashkëkohore. Librat ndihmojnë në rritjen e cilësisë së programit studimor, gjithashtu ofrojnë kushte për përmirësimin e përgatitjes profesionale dhe forcimin e kapaciteteve akademike të Akademisë.

Ky është një hap i rëndësishëm për zhvillimin e mëtejshëm të Akademisë dhe krijimin e një mjedisi të pasur me burime moderne të literaturës për të gjithë studiuesit dhe studentët e fushës së sigurisë publike.