NewsArticle

Vushtrri, 15 maj 2024 – Anëtarët e bordi të  Akademisë së  Kosovës për Siguri Publike (AKSP) sot mbajtën takimin e radhës ku u diskutuan disa pika që kanë të bëjnë më trajnimet dhe arsimimin në fushën e sigurisë publike.

Pas aprovimit të rendit të ditës dhe procesverbaleve të takimit të 41 të  Bordit të AKSP-së, zv/Drejtori i Përgjithshme i Akademisë,  Kastriot Jashari, i njoftoi anëtaret e bordit  për aktivitetet dhe veprimet e ndërmarra të AKSP-së  gjatë muajve të fundit. Jashari u shpreh i gatshme që në bashkëpunim më gjitha institucionet e sigurisë publike tu ofrohet kushte sa më të mira pjesëmarrësve në trajnime.

Gjatë takimit anëtaret e bordit janë njoftuar rreth procesit  aktual të akreditimit të Akademisë së Kosovës për Siguri Publike.

 Udhëheqës i Divizionit për Sigurim të Cilësisë, Emin Uka,  i njoftoi anëtarët e bordit për fazat e vlerësimit ndërkombëtarë nga Asociacionin Ndërkombëtar i Drejtorëve të Standardeve, Trajnimit dhe Zbatimit të Ligjit (IADLEST) të Shteteve të Bashkuara të Amerikës.

Po ashtu anëtarët e bordit u njoftuan edhe për procesin e akreditimin vendor të Akademisë, që është i vetmi institucion në Kosovë për ofrimin e arsimit, aftësimit profesional më trajnime të validuara dhe akreditimin e Akademisë si institucion i Arsimit të lartë.

Në mbledhjen e sotme anëtarët e bordit u njoftuan nga dekani i Fakultetit të Sigurisë Publike Ferid Azemi për korrikulen e re të programit bachellor të Fakultetit të Sigurisë Publike.  Azemi tha ky program është program unik, i integruar për sigurinë publike.

Tutje në këtë takim u fol edhe për procesin e trajnimeve , sidomos në theks të veçantë për trajnime profesionale aktuale që janë duke u mbajtur në Akademi.

Në mbledhjen e sotme u zgjodh kryesuesi i ri i bordit Ismail Dibranin, i cili njëheri është drejtor i Përgjithshëm i SHKK-së.   
Në këtë takim morën pjesë  zëvendësuesi i Drejtorit të Përgjithshëm të Akademisë Kastriot Jashari, Drejtori i Përgjithshëm i Policisë së Kosovës Gazmend Hoxha, Drejtori i Përgjithshëm i Shërbimit Sprovues të Kosovës Arsim Tahiri, Drejtori i Përgjithshëm i Inspektoratit Policor të Kosovës Kushtrim Hodaj,  Drejtori i Përgjithshëm i Doganës se Kosovës Agron Llugaliu,  Drejtori i Përgjithshëm i  Shërbimit Korrektues të Kosovës  Ismail Dibrani,  zëvendësuesi i Drejtorit të Përgjithshëm në Agjencinë e Menaxhimit Emergjent Shefki Avdullahu, Dekani i Fakultetit të Sigurisë Ferid Azemi,  Drejtori i Departamentit për Rend dhe Siguri në OSBE me mision në Kosovë Edward Anderson si dhe zyrtarë të lartë nga institucionet  përkatëse.

 

Vushtrri, 28 maj 2024 - Zëvendësuesi i Drejtorit të Përgjithshëm në Akademinë e Kosovës për Siguri Publike (AKSP), Kastriot Jashari, priti sot në takim dekanin e Fakultetit të Sigurisë të Universitetit “St. Kliment Ohridski” të Manastirit në Maqedoninë e Veriut, Nikola Dujovski i cili ishte i shoqëruar nga prodekanja e këtij fakultetit, Snežana Mojsoska.

Drejtori, Jashari së bashku me dekanin e  Fakultetit të Sigurisë Publike , Ferid Azemi, e njoftuan delegacionin maqedonas për zhvillimet e fundit në Akademi.

Gjatë këtij takimi, drejtori Jashari e njoftoi dekanin Dujovski për gjendjen aktuale në Akademi, duke përfshirë të arriturat e fundit dhe sfidat me të cilat ballafaqohet institucioni. Ai foli edhe për të reja në rekrutimin e zyrtarëve të sigurisë publike në Kosovë. Në theks të veçantë drejtori Jashari u fokusua në fushëveprimtarinë dhe mandatin e Akademisë si i vetmi institucion në Kosovë për trajnimin dhe arsimin e këtyre zyrtarëve të sigurisë publike në vend. 

Ndërsa, dekani i Fakultetit të Sigurisë Publike në Akademi, Ferid Azemi e njoftoi delegacionin në fjalë, rreth zhvillimit të procesit arsimor në fakultet. Po ashtu Azemi foli edhe për mundësitë e reja për të fuqizuar më tej bashkëpunimin ndërmjet të dyja fakulteteve.

Kurse, dekani i Fakultetit të Sigurisë të Universitetit “St. Kliment Ohridski” të Manastirit në Maqedoninë e Veriut, Nikola Dujovski u shpreh i gatshëm që bashkëpunimi nderinstitucional të vazhdojë edhe më tutje.  

Gjatë takimit dekani Dujovski  njoftoi për  të rejat më të fundit që e përcjellin Fakultetin e Sigurisë në Shkup në veçanti rreth arsimit të lartë në përgjithësi. 

Në fund të takimit, të dy delegacionet u pajtuan që bashkëpunimi mes tyre në fushën e arsimimit në sigurinë publike të vazhdojë edhe në të ardhmen, duke marrë pjesë kështu në programe dhe projekte të ndryshme të përbashkëta.

Përndryshe, Fakulteti i Sigurisë Publike i AKSP-së dhe Fakulteti i Sigurisë në Shkup i Universitetit “St. Kliment Ohridski” të Universitetit të Manastirit nga Maqedonia e Veriut kanë nënshkruar marrëveshje bashkëpunimi që nga viti 2017, e cila është përtërirë edhe në 2022, përderisa kjo është hera e parë që realizohet shkëmbimi i stafit mësimdhënës ndërmjet të dyja institucioneve përmes fondeve të programit Erasmus+. Si rezultat i marrëveshjes ndërmjet të dyja institucioneve përmes Erasmus+, Dekani i FSP-së, Ferid Azemi dhe ligjëruesja e rregullt në këtë FSP Anita Zenuni,  gjatë këtij muaj kanë marr pjesë  në cilësinë e ligjëruesve në kuadër të mobilitetit të stafit për mësimdhënie në Fakultetin e Sigurisë në Shkup. Ndërsa nga tetori i këtij viti, një student i FSP-së do të qëndrojë për një semestër të plotë atje.

Erasmus+ është program i BE-së që përkrah arsimin, trajnimin, rininë dhe sportin në Evropë. AKSP e përdor atë që nga viti 2016 për ndërkombëtarizimin e saj, ku kryesisht janë shkëmbyer studentë, pjesëtarë të stafit akademik dhe atij administrativ në gjashtë shtete nga rajoni dhe Evropa.