NewsArticle

Vushtrri, 08 korrik  2017 - Në Akademinë e Kosovës për Siguri Publike (AKSP), sot filloi miniolimpiada për persona me aftësi të kufizuara e  organizuar nga Komiteti Paraolimpik i Kosovës dhe Organizata e Prindërve dhe Fëmijëve me Aftësi  të Kufizuara  e mbështetur nga Akademia, OSBE-ja, KFOR-i dhe Karabinierët.

Miniolimpiada është ngjarje sportive, rekreative dhe shoqëruese e të rinjve të Kosovës me aftësi të kufizuara, të cilët garojnë në lojna të ndryshme sportive; hendboll, basketboll, futboll, tërheqje e litarit, mundje krahësh, qitje, pingpong, pikado, si dhe disiplina tjera sportive. Pjesëmarrësit qëndrojnë dy ditë në Akademi, me ç’ rast shoqërohen, vallëzojnë të shoqëruar nga familjarët e tyre si dhe vullnetar të Akademisë, OSBE-së, KFOR-it, Karabinierët, e tjerë. Për herë të parë Miniolimpiada është organizuar në vitin 2003, kurse nga viti 2005 nikoqir i këtij aktiviteti është Akademia e Kosovës për Siguri Publike. Miniolimpiada gjatë këtyre viteve është organizuar nga Komiteti Paraolimpik i Kosovës dhe Organizata e Prindërve dhe Fëmijëve me Aftësi  të Kufizuara, është mbështetur nga OSBE, KFOR-i, Qeveria e Kosovës, Policia e Kosovës, Karabinierët, Ambasadat e vendeve të ndryshme misionet në Kosovë dhe Akademia e Kosovës për Siguri Publike. Këtë vit miniolimpiada kryesisht është mbështet nga buxheti i Akademisë së Kosovës për Siguri Publike.

Në hapjen e miniolimpiadës morën pjesë, Drejtori i Përgjithshëm i Akademisë Ismail  Smakiqi, Ambasadori i OSBE-së Jan  Braathu, Komandanti i KFOR-it Gjeneral Majori Giovanni Fungo, Ambasadori i Francës në Kosovë Didier Chabert, Ambasadori i Austrisë në Kosovë Gernot Pfandler, Ambasadori i Italisë Piero Cristoforo Sardi, Kryetarja e Komitetit  Paralimpik Njomza  Emini, Përfaqësuesit e OPFAKKOS-it, Drejtori i Departamentit për Rend dhe Siguri Publike në OSBE-së  Ake Roghe, Këshilltarja e OSBE-së  në Akademi Shpresa Muharremi, Drejtori i Trajnimeve Mandatare i Policisë së Kosovës Driton Zabërgja, Udhëheqësit e UNHCR-së, UNICEF-it  si dhe përfaqësues tjerë nga institucionet vendore e ndërkombëtare.

Fjalën hyrëse në Ceremoninë e hapjes të Miniolimpiadës e mbajti Znj. Njomza Emini, kryetare e Komitetit Paraolimpik, e cila  vlerësoj lartë mbajtjen e garave për personat me nevoja të veçanta. Ajo tha se nga viti në viti është duke u shënuar progres në njohjen ndërkombëtare të  Komitetit Paraolimpik, me shpresën që vitin e ardhshëm të pranohemi në Komitetin Ndërkombëtar Paraolimpik dhe garues nga Kosova të marrin pjesë në gara ndërkombëtare sportive të rinjve me aftësi të kufizuara.

Emini ka falënderuar të gjitha institucionet; OSBE-në, Akademinë, KFOR-in, karabinierët  dhe agjencitë tjera të cilët ishin prezent në përkrahje për mbajtjen dhe pjesëmarrjen në miniolimpiades. “Miniolimpiada e personave me aftësi të kufizuar e cila mbahet në Akademi tashmë është aktivitet tradicional” – tha Znj. Emini dhe të gjithë ne do të vazhdojmë këtë traditë edhe në vitet në vijim.

Drejtori i Përgjithshëm i Akademisë së Kosovës për Siguri Publike Ismail Smakiqi, duke iu uruar  mirëseardhje pjesëmarrësve në Akademi, theksoi se  miniolimpiada për persona me aftësi të kufizuara  është një ngjarje mjaft me rëndësi  duke fituar kështu edhe statusin e një aktiviteti tradicional.

“Miniolimpiada është aktiviteti më i rëndësishëm që e zhvillon Akademia me Komunitete. Kjo miniolimpiad është e trembëdhjeta me radhë dhe tani më ka fituar statutin e aktivitetit tradicional.  Ju çdo verë vini në Akademi që të zhvilloni gara sportive dhe këtu ne njoftoheni mes veti, rinjihemi, shoqërohemi, garojmë, argëtohemi, këndojmë. Akademia ditët më të bukura i kalon në ditët kur mbahet miniolimpiada”,  u shpreh Smakiqi 

Drejtori Smakiqi  falënderoi të gjitha institucionet që e përkrahin mbajtjen e këtij aktiviteti.
“Falënderoi për përkrahjen  OSBE-në dhe KFOR-in, ambasador Jan Braathu dhe gjeneral majorin Giovanni Fungo, për përkrahjen e vazhdueshme, përkushtimin dhe dedikimin tuaj për qytetarët e Kosovës të cilët kanë nevojë për përkrahjen dhe kujdesin tonë; faleminderit ambasador i Francës, Austrisë dhe Italisë për përkrahjen tuaj, faleminderit drejtor i UNICEF-it dhe UNHCR-it, që sot jeni në Akademi në përkrahje të pjesëmarrëseve në këtë miniolimpiad”, tha drejtori Smakiqi.

Kurse ambasadori i OSBE-së  në Kosovë  Jan Braath   tha se lojërat miniolimpike janë një ngjarje shumë e rëndësishme ku kanë mundësi të marrin pjesë shumë persona që të tregojnë aftësitë e tyre në lojëra të ndryshme.

“Ky rast ju ofron të gjithë pjesëmarrësve mundësi për të shfaqur aftësitë e tyre në disiplina të ndryshme sportive dhe ju inkurajojmë që përsëri të përkrahim frymën e ekipit dhe të sfidoni veten tuaj në bërjen e këtyre lojërave sa ma argëtuese”, u shpreh ambasadori Braath, duke thënë se në këtë vit marrin pjesë edhe garues të rinj nga Graqanica dhe  nga pjesa veriore e Mitrovicës.

“Jam shumë i kënaqur që jam me ju sot në lojërat miniolimpike 2017 të cilat ne në OSBE i konsiderojmë ngjarje të jashtëzakonshme dhe mundësi të shkëlqyeshme për të sjellë kaq shumë njerëz që të angazhohen në aktivitete sportive dhe të njihen me punën e oficerëve të zbatimit të ligjit”, u shpreh Braath.

Më këtë rast ambasadori Braath falënderoi Komitet Paraolimpik të Kosovës dhe Organizatën Kosovare të Prindërve dhe Fëmijëve me Aftësi të Kufizuara (OPPFAKKOS) për organizimin e kësaj ngjarje.  Po ashtu Braath falënderoi edhe Akademinë e Kosovës për Siguri Publike për gatishmërinë e saj të vazhdueshme për ta mbështetur  miniolimpiaden.

Gjatë këtij aktiviteti OSBE i dhuroi Komitetit Paraolimpik të Kosovës dhe OPFAKKOS-it  20 karroca me rrota, për fëmijët më nevojat të veçanta të moshës dhjetë dhe dymbëdhjetë vjeç si dhe për të rriturit.

“OSBE-ja do të vazhdojë të ofrojë mbështetjen e saj për institucionet e Kosovës”, tha Braath

Ndryshe miniolimpiada do të zgjatë dy ditë radhazi ku do të zhvillohen këto gara  hendboll, basketboll, pikado, futboll, shah, pingpong, vrapim me karrocë, shenjëtari etj.
Në këtë miniolimpiad janë duke marrë pjesë persona me nevoja të veçanta nga e gjithë Kosova.
 

Vushtrri, 24 korrik 2017 – Ambasadori i Shteteve të Bashkuara të Amerikës, Greg Delawie, vizitoi sot Akademinë e Kosovës për Siguri Publike, ku u prit nga Drejtori i Përgjithshëm i Akademisë, Ismail Smakiqi, Dekani i Fakultetit të Sigurisë Publike, Bejtush Gashi si dhe Drejtorët e Departamenteve të AKSP-së: Rrahim Rexha, Kastriot Jashari dhe Shpend Shabani.

Qëllimi i vizitës së Ambasadorit Delawie ishte që të njihet nga afër me historikun, zhvillimet, misionin, vizionin dhe strukturën e Akademisë.

Drejtori Smakiqi falënderoi Ambasadorin Delawie për vizitën dhe përkrahjen e Ambasadës të Shteteve të Bashkuara të Amerikës dhe të institucioneve amerikane, në radhë të parë ICITAP-it, gjatë të gjitha fazave të zhvillimit të Akademisë. Gjatë këtyre viteve, Akademia, gjegjësisht agjencitë e sigurisë publike, u përkrahën në fushën e trajnimeve dhe pajisjeve të ndryshme teknike.

Në fushën e trajnimeve, drejtori Smakiqi veçoi trajnimin dhjetëjavor “Shkolla e Stafit dhe Komandës Policore”, i cili zhvillohet nga Qendra për Siguri Publike e Universitetit Northwestern. “Ky trajnim në Akademi është mbajtur pesë vite me radhë dhe ka pasur karakter regjional duke përfshirë oficerët policorë nga Kroacia, Bosnja dhe Hercegovina, Mali i Zi, Maqedonia, Shqipëria dhe Kosova. Ky trajnim po ashtu ka rritur reputacionin e Akademisë në përmasa regjionale dhe ndërkombëtare”, tha Smakiqi.

Drejtori Smakiqi më tutje vazhdoi se në fushën e donacioneve, përkatësisht pajisjeve teknike dhe të tjera, gjatë këtyre viteve Akademia ka përfituar shumë, siç është pajisja e Trajnimit të Simulimit me Armë Zjarri (FATS) që shërben për trajnimin e zyrtarëve të sigurisë publike të Kosovës. “Kjo pajisje ju dhurua Akademisë nga Zyra për Çështje Ndërkombëtare të Narkotikëve dhe të Zbatimit të Ligjit (INL) e Departamentit të Shteteve të Bashkuara në muajin qershor të këtij viti dhe është e vetmja në Kosovë dhe në vendet e regjionit”, u shpreh Smakiqi.

Gjatë këtyre viteve Akademia është përkrahur me këshilltarë të lartë, zyrtarë të ICITAP-it, ekspertë të fushave të sigurisë publike, policore, legjislacionit dhe trajnimit.

Drejtori i Përgjithshëm i Akademisë, Ismail Smakiqi, njoftoi Ambasadorin Delawie për të gjitha aktivitetet që zhvillohen në Akademi si dhe për synimet e saj në të ardhmen. Ajo që e veçon Akademinë, u shpreh Smakiqi, është niveli i lartë i profesionalizmit të personelit të Akademisë, puna ekipore dhe respektimi i vlerave të proklamuara të saj, siç janë ndershmëria, transparenca, llogaridhënia dhe etika profesionale.

Gjithashtu drejtori Smakiqi gjatë këtij takimi e informoi ambasadorin Delawie edhe për procese të rëndësishme të Akademisë, siç janë hapja e Fakultetit të Sigurisë Publike dhe ri-akreditimi i programit studimor të këtij fakulteti si dhe validimin e programeve profesionale bazike në Autoritetin Kombëtar të Kualifikimeve.

Po ashtu ambasadori Delawie u informua edhe për bashkëpunimin ndërkombëtar që ka Akademia me akademitë policore evropiane dhe më gjerë si dhe për anëtarësimet në asociacione të ndryshme, e në veçanti për nënshkrimin e Marrëveshjes së Punës me CEPOL-in si dhe për Projektin e Binjakëzimit të financuar nga BE-ja

Ambasadori i SHBA-ve Greg Delawie u shpreh i kënaqur me vizitën e tij në Akademi. “Kam kënaqësinë që për të tretën herë e vizitoj Akademinë tuaj, ju faleminderit për të gjitha që bëni për sigurinë publike në vendin tuaj”, tha Delawie. Ai përgëzoi Drejtorin e Përgjithshëm të AKSP-së për bashkëpunimin ndërkombëtar, e në veçanti për nënshkrimin e Marrëveshjes së Punës me CEPOL.

Në vazhdim duke vlerësuar Akademinë, ambasadori Delawie tha: “Policia e Kosovës është institucioni më i besueshëm në rajon, ndër të tjera, falë ofrimit të trajnimeve që bën Akademia e juaj”.

Gjatë vizitës, ambasadori Delawie u interesua edhe për progresin e arritur në akreditimin ndërkombëtar të Akademisë përmes IADLEST. Po ashtu Delawie shfaqi interesimin tij edhe rreth numrit të trajnimeve që zhvillohen në Akademi.

Këshilltarja e lartë e ICITAP-it Drita Perezic, e njoftoi ambasadorin për gatishmërinë e IADLEST për të akredituar Akademinë si institucion i trajnimit dhe arsimit të lartë. Akreditimi i Akademisë nga IADLEST do të shtonte reputacionin e Akademisë si institucion trajnues dhe arsimor për trajnimin e zbatuesve të ligjit si dhe mundësisë së përkrahjes së Akademisë nga ICITAP për krijimin e një programi studimor Master, i cili do të bazohet në kurrikulën e kursit të “Shkollës së stafit dhe komandës policore”.
 
Ambasadori Delawie i shoqëruar nga Drejtori i Përgjithshëm Smakiqi vizituan kampusin e  AKSP-së, duke përfshirë demonstrimin e punës së FATS-it, donacion nga Zyra për Çështje Ndërkombëtare të Narkotikëve dhe të Zbatimit të Ligjit (INL).

Përveç ambasadorit Greg Delawie, pjesë e delegacionit në vizitë bërë Akademisë ishin edhe James Hope, Drejtor i Misionit të USAID në Kosovë, Kimberly Riffe, u.d. e Menaxherit të Programit të ICITAP-it si dhe Drita Perezic, këshilltare e lartë e ICITAP.