Lajmet

Me këtë rast drejtori Shabani, i uroi mirëseardhje delegacionit nga Iowa Law Enforcement, ndërsa theksoi se kjo vizitë është dëshmi e partneritetit të qëndrueshëm dhe marrdhënieve të veçanta që Kosova ka me Shtetet e Bashkuara të Amerikës.

“SHBA-ja, ka qenë dhe mbetet aleati më i madh i Kosovës duke qëndruar përkrahë gjatë gjithë proceseve të shtetndërtimit. Përveç mbështetjes së përgjithshme nga SHBA-të, Kosova ka një partneritet të shkëlqyer dhe të veçantë me shtetin e Iowa-s, bashkëpunim ky që është shndërruar në shembull frymëzues për miqësi dhe aleancë mes dy vendeve”, tha drejtoi Shabani.  

Ndërkohë drejtori Shabani, kujtoi kontributin e jashtëzakonshëm të gjeneralit Timothy Orr, si një nga figurat kyqe i cili që ka udhëhequr përpara partneritetin mes Kosovës dhe Iowa-s.

Gjithashtu z. Shabani, theksoi se vizita e sotme është tejet e rëndësishme, për faktin se nga këtu së bashku do të shqyrtohen mundësitë për thellimin e bashkëpunimit, jo vetëm në mes të institucioneve të sigurisë, por vazhdimin e partneritetin dhe lidhjen e veçantë mes Kosovës dhe shtetit të Iowa-s.

Gjatë takimit u prezantua në pika të shkurtëra misioni dhe vizioni i Akademisë, roli, përgjegjësitë, të arriturat dhe bashkëpunimet vendore, rajonale e ndërkombëtarë, duke nënvizuar kështu rolin kyç të akademisë në trajnimet bazike, profesionale dhe të avancuara të zyrtarëve të institucioneve zbatuese të ligjit.

Nga ana e tyre, Delegacion nga Iowa, shprehu admirim për punën e bërë në Akademi për më shumë se dy dekada, duke ngritur kështu efikasitetin në sigurinë publike. Në të njëjtën kohë ata mirëpritën idenë për fillimin dhe vazhdimin e bashkëpunimit mes Akademisë së Kosovës për Siguri Publike dhe Akademisë së Zbatimit të Ligjit të Iowa-s.

Ndër të tjera mes zyrtarëve të Akademisë, PK- së dhe delegacionit të Iowa-s, u zhvillua një diskutim i ndërsjellë për programet e trajnimit për Policët e Kosovës, proceset rekrutuese, sfidat  në realizimin e projekteve dhe programeve për rritjen e kapaciteteve të zbatuesvëve të ligjit në Kosovë, me theks të veçantë në Policinë e Kosovës.

Vushtrri, 29 shtator 2025 - Në Akademinë e Kosovës Për Siguri Publike në Vushtrri, tri ditë radhazi u zhvilluan aktivitete nga të rinjtë në kuadër të “Kampi i Punësueshmërisë”, organizuar nga OJQ “Toka”. Pjesmarrësit në “Kampin e Punësueshmërisë”, u angazhuan në aktivitete dinamike, mësuan si të shkruajnë një CV, një letër motivimi dhe fituan aftësi bazike të cilat do t’iu ndihmojnë në tregun e punës.

Gjatë këtyre tri ditëve pjesëmarrësit e kampit u takuan me ekspertë të fushave të ndryshme, ku njohën me praktikat përvojat e ndryshme.

Pjesëmarrësit në “Kampin e Punësueshmërisë’, përveç se fituan njohuri për sfidat profesionale për të ardhmen e tyre, ishte edhe një përvojë argëtuese, ku ata krijuan edhe ura miqësie mes vete.

Ky projekt implementohet nga OJQ "TOKA" dhe mbështetet nga Qeveria Gjermane përmes GIZ Kosovo.

Akademia (AKSP), si përherë, përveç aktiviteteve që rrjedhin nga fushëveprimtaria ligjore, edhe këtë radhë ishte e hapur dhe në përkrahje të komuniteteve në Republikën e Kosovës. 

Vushtrri, 22 shtator 2025 - Në Akademinë e Kosovës për Siguri Publike sot ka filluar trajnimi për grupin e parë të zyrtarëve të sigurimit të gjykatave të Kosovës.

Trajnim po zhvillohet në kuadër të Marrëveshjes së Mirëkuptimit të arritur paraprakisht ndërmjet Drejtorit te Përgjithshëm të AKSP z. Shpend Shabani dhe Kryesuesit të KGJK-së z. Albert Zogaj, e cila ka për qëllim forcimin e kapaciteteve profesionale dhe ngritjen e standardeve të sigurisë në objektet gjyqësore të Republikës së Kosovës.

Trajnimi përqëndrohet në zhvillimin e aftësive praktike dhe njohurive profesionale të zyrtarëve të sigurimit, duke përfshirë menaxhimin e situatave emergjente, procedurat standarde të sigurisë, komunikimin dhe bashkëpunimin me institucionet e tjera të rendit dhe ligjit.

Ky program trajnimi shënon një hap të rëndësishëm drejt forcimit të sigurisë publike dhe garantimit të një mjedisi të sigurt për punonjësit e gjykatave, palët dhe qytetarët që marrin pjesë në proceset gjyqësore.

Është planifikuar që trajnimi të zhvillohet në mënyrë ciklike me 3-4 grupe me rreth 120 zyrtarë të Sigurimit të Gjykatave të Kosovës.

Vushtrri, 8 shtator 2025 - Sot në Akademinë e Kosovës për Siguri Publike, (AKSP), filloi Trajnimi Profesional për Zjarrfikës.

Trajnimin profesional do ta ndjekin 23 kadetë, të cilët gjatë tre muajve do të marrin njohuri teorike profesionale për reagime emergjente në ambientet e Akademisë, për të vazhduar me trajnimin profesional praktik në institucionet relevante të Agjencisë së Menaxhimit të Emergjencave(AME).

Për përgatitjen profesionale teorike dhe praktike me kadetët e rinj do të angazhohen trajnerë profesional nga Akademia e Kosovës për Siguri Publike, Agjencia e Menaxhimit të Emergjencave, si dhe akterë relevant.

Vushtrri, 19 gusht 2025 - Drejtori i sapoemëruar i Departmantit për Rend dhe Siguri Publike (DRSP) pranë Misionit të OSBE-së në Kosovë, Bertram Welsing, vizitoi sot Akademinë e Kosovës për Siguri Publike, ku u prit nga ushtruesi i detyrës së Drejtorit të Përgjithshëm, Shpend Shabani me bashkëpunëtorë.

Drejtori Shabani, fillimisht i uroi mirëseardhje dhe suksese në detyrë z. Welsing, ndërsa u shpreh falënderues për mbështetjen e vazhdueshme të OSBE-së për Akademinë në realizimin e projekteve dhe programeve në fushën e sigurisë publike në Republikën e Kosovës.

“Zhvillimi dhe arritjet në AKSP janë falë ndihmës dhe kontributit që OSBE ka dhënë edhe pas kalimit të kompetencave tek vendorët, respektivisht në të gjitha fazat e saj. Akademia është ndihmuar në vazhdimësi, prandaj OSBE është një ndër partnerët kryesorë strategjik me të cilin ne bashkëpunojmë dhe kemi pasur ndihmën e këtij misioni në të gjitha aspektet dhe etapat e zhvillimit deri më sot”, u shpreh z. Shabani.

Drejtori Shabani theksoi nevojën e bashkëpunimit të AKSP-së me institucionet homologe ndërkombëtare, në këtë rast edhe me institucionet gjermane të fushës së arsimit të sigurisë publike, për çka kërkoi edhe arritjen e një marrëveshjeje formale të mundshme bashkëpunimi.

Gjatë takimit u prezantua në pika të shkurtëra misioni dhe vizioni i Akademisë, roli, përgjegjësitë, të arriturat e AKSP-së dhe bashkëpunimet në nivel ndërkombëtarëduke nënvizuar rolin kyç të saj në ngritjen e kapaciteteve të sigurisë publike në Republikën e Kosovës.

Nga ana e tij z. Welsing, kujtoi kohën kur ishte në Kosovë si misionar në vitet e para të pasluftës ndërsa, shprehu admirim për nivelin e zhvillimit të Akademisë dhe përgatitjen profesionale të pjesëtarëve të sigurisë publike.

Ai, përgëzoi udhëheqjen e AKSP-së për angazhimin dhe të arriturat në përgatitjen e resurseve njerëzore në shtimin e efikasitetit në sigurinë publike, duke u zotuar se mbështetja këshilldhënëse e profesionale nga OSBE nuk do të mungojë që Akademia të vazhdojë të jetë institucion kredibil për përgatitjen e gardës zbatuese të ligjit, garantuese e sigurisë shtetërore e qytetare.

Gjithashtu z. Welsing shprehu interesin e vazhdimit të bashkëpunimit të OSBE-së me Akademinë në nivelin strategjik, në formën e partneritetit të përbashkët.

Vushtrri, 12 gusht 2025- Pas përfundimit të trajnimit profesional në Akademinë e Kosovës për Siguri Publike, sot në një ceremoni solemne diplomoi gjenerata e re e kadetëve të Doganës së Kosovës. 108 kadetë doganor prej tyre, 69 meshkuj dhe 39 femra nga sot do të jenë në shërbim të mbrojtjes së shtetit, ekonomisë dhe sigurisë së qytetarëve, duke zbatuar praktikat më të mira profesionale.

Ceremonia solemne e diplomimit të 108 kadetëve doganor, njëherësh shënoi edhe 26 vjetorin e themelimit të Doganës së Kosovës ku morën pjesë personalitetet të larta shtetërore, përfaqësues të institucioneve vendore dhe ndërkombëtare, zyrtarë të Doganës së Kosovës, zyrtarë të lartë të Akademisë së Kosovës për Siguri Publike, si dhe familjarët e kadetëve doganor të sapodiplomuar.

Kryeministri në detyrë Albin Kurti, në fjalën e rastit në ceremonin e diplomimit të kadetëve doganor vlerësoi lartë punën e Doganës së Kosovës, ndërsa theksoi se me diplomimin e kadetëve të rinj, Dogana fiton jo vetëm staf të ri, por edhe energji të re, mendim të freskët dhe motivim për të ecur bashkë përpara.

Drejtori i Doganës së Kosovës, Agron Llugaliu, në fjalën e tij gjatë ceremonisë, vuri në pah të arriturat e Doganës së Kosovës përgjatë viteve, ndërsa shprehu mirënjohje për të gjithë punonjësit për angazhimin dhe punën me integritet e profesionalizëm.

Gjithashtu ai uroi kadetët e sapodimplomuar ndërsa shprehu bindjen se do të punojnë me integritet e përkushtim në realizimin e misionit të tyre, mbrojtjen e ekonomisë dhe sigurisë së shtetit.

Kadetët e sapodimplomuar i përgëzoi edhe Eva Palatova, ushtruese e detyrës së shefes së BE-së në Kosovë, ndërsa vlerësoi përparimin në reformat e rekrutimit dhe operacioneve të Doganës.

Kadetja e sapodimplomuar Shkurte Hajredini, me emocione foli për rrugëtimin e saj dhe kolegëve, përgjatë muajve të trajnimit në Akademinë e Kosovës për Siguri Publike, duke theksuar se aty morën njohuri të thella për punën që do ta kryejn nga sot.

“Përvoja në AKSP ishte një bazë e fortë e cila u ndërtua çdo ditë e më shumë me ligjërata të mbajtura nga profesionistët me përvojë, me ushtrime praktike e diskutime të hapura që na ndihmuan të kuptonim thelbin e punës sonë. Në AKSP, jo vetëm se morëm njohuri, por aty mësuam kulturën e shërbimit, ndershmërinë, korrekëtësinë dhe përkushtimin ndaj detyrës”, tha kadetja Hajredini.

Vushtrri, 16 korrik 2025 - Ushtruesi i detyrës së Drejtorit të Përgjithshëm të Akademisë së Kosovës për Siguri Publike, (AKSP) Shpend Shabani me bashkëpunëtorë, priti në takim delegacion nga Republika e Bullgarisë, i kryesuar nga Gjeneralmajor Emil Simeonov Tonev, Shef i Shërbimit Kombëtar të Mbrojtjes të Bullgarisë, i shoqëruar nga Sh.T. z. Hristo Kraevski, Ambasador i Republikës së Bullgarisë në Kosovë me bashkpunëtorë.

Me këtë rast, drejtori Shabani, falënderoi delegacionin e zyrtarëve të lartë nga Bullgaria për vizitën në Akademi, ndërsa foli për rolin e akademisë në ngritjen e kapaciteteve të zbatuesve të ligjit konform sfidave dhe ndryshimeve në kohë. Ai njoftoi delegacionin për punën dhe aktivitetet që zhvillohen në Akademi, me theks për programet arsimore e programet për trajnime bazike, të avancuara e profesionale me standarde ndërkombëtare në fushën e sigurisë publike. 

Gjatë diskutimeve, të dyja palët shprehën nevojën e bashkëpunimit jo vetëm në nivel vizitash, por bashkëpunim ndërinstitucional, që do të thellohej edhe më shumë përmes nënshkrimit të një marrëveshje ndërmjet Akademisë së Kosovës për Siguri Publike dhe Akademisë së Punëve të Brendshme të Bullgarisë, për të shkëmbyer ekspertizat, përvojat dhe praktikat më të mira nga fushëveprimtaria e trajnimeve dhe arsimit në sigurinë publike.

Delegacioni bullgar, shprehu gatishmërinë për thellimin e bashkëpunimit përmes një marrëveshje dypalëshe, duke u zotuar që iniciativa do të ndërmirret shumë shpejt.

Në kuadër të vizitës, delegacioni nga Bullgaria u njoh më për së afërmi me aktivitetet dhe funksionimin e Akademisë si tërësi, duke qenë institucion kredibil i cili ofron trajnime dhe arsimim profesional për zbatuesit e ligjit në Kosovë.

Ndër të tjerash, nga Njësia për Mbrojtjen e Afërt në Policinë e Kosovës, atyre iu prezantua edhe organizimi, funksionimi dhe përgjegjësitë që kjo njësi mbanë në vete në kuadër të Policisë së Kosovës.

 Gjithashtu për delegacionin mysafir, në hapësirat e Akademisë, u demonstrua një rast simulativ i shkathtësive të Njësisë së Mbrojtjes së Afërt të Policisë së Kosovës.

Vushtrri, 11 korrik 2025 - Sot diplomoi gjenerata e 62-të e kadetëve të Policisë së Kosovës.

279 zyrtarë policor të trajnuar në Akademinë e Kosovës për Siguri Publike,nga sot do  veshin uniformën e Policisë së Kosovës për të shërbyer në mbrojtjen dhe sigurinë e vendit dhe të të gjithë qytetarëve.

Në ceremonia solemne të diplomimit të kadetëve morën pjesë personalitetet të larta shtetërore, përfaqësues të institucioneve vendore dhe ndërkombëtare, eprorë dhe zyrtarë të Policisë së Kosovës, zyrtarë të lartë të Akademisë së Kosovës për Siguri Publike, si dhe familjarët e kadetëve të sapodiplomuar.

Zëvendëskryeministri i parë në detyrë për Integrim Evropian, Zhvillim dhe Dialog i Republikës së Kosovës, Besnik Bislimi, në ceremoninë e diplomimit të gjeneratës së 62-të të kadetëve të Policisë së Kosovës, tha se për 26 vite me radhë që nga krijimi, Policia e Kosovës shërben me përkushtim e integritet.

“Ky institucion po forcohet e radhët e saj po shtohen çdo herë e më shumë. 62 gjenerata të diplomuara përfshirë këtë të sotmen, të cilat udhëhiqen nga profesionalizmi, në mbrojtje të Republikës, ligjeve e Kushtetutës së vendit, sovranitetit e integritetit territorial. Të jesh pjesë e Policisë së Kosovës është nder dhe përgjegjësi e lartë. Kjo uniformë dhe ky institucion është më shumë sesa zbatuese e ligjit, por edhe përfaqësuese e vlerave të disiplinës ndaj punës, integritetit dhe atdhedashurisë.” u shpreh zëvendëskryeministri Bislimi.

Ai shtoi se kadetët i përbashkon misioni e qëllimet e njëjta, ndërsa në realizimin e tyre do ta kenë përherë qeverinë përkrah.

Ndërkaq ministri i Punëve të Brendshme Xhelal Sveçla, tha se kjo gjeneratë që sot jep betimin si pjesëtarë të Policisë së Kosovës, janë mbështetja e vizionit tonë të përbashkët për një polici profesionale që garanton rend e ligj, që respekton e mbron qytetarët tanë dhe që me integritet e disiplinë mbron besimin e qytetarëve të ndërtuar ndër vite për Policinë e Kosovës

“Policia jonë, jo vetëm që është institucioni me besimin më të lartë, por është shembull në rajon për partneritetin dhe suksese në operacionet ndërkombëtare në luftimin e grupeve kriminale”, tha minsitri Sveçla.

 Ministri, uroi policët e rinj, ndërsa shprehu besimin se ata do të shërbejnë me përgjegjësi e integritet të lartë duke respektuar ligjet në mbrojtjen dhe sigurinë e vendit dhe qytetarëve.

Drejtori i Përgjithshëm i Policisë së Kosovës, z. Gazmend Hoxha, duke iu drejtuar kadetëve të rinj tha se nga sot keni hyrë në një kapitull të ri të jetës suaj personale dhe profesionale.

“Uniforma policore nuk është një previlegj, por mbi të gjitha është një përgjegjësi shumë e madhe. Njëkohësisht është një emicion, një krenari, duke pranuar detyrën e shërbimit të shenjtë ndaj qytetarëve të vendit”, tha drejtori Hoxha.

Ai u kujtoi kadetëve që çdo veprim që do të ndërmarrin të jetë në harmoni me ligjin.

“Qytetarët në uniformën tuaj shohin shpresë, guximin, presin mbrojtje dhe siguri, e ju duhet të jeni atje e të zbatoni ligjin” tha Hoxha.

Në këtë ceremoni mori pjesë edhe ushtruesi i detyrës së Drejtorit të Përgjithshëm të Akademisë së Kosovës për Siguri Publike Shpend Shabani.

Gjatë ceremonisë së diplomimit kadetët e gjeneratës së 62-të të Policisë së Kosovës morën certifikatat për pranimin e detyrës së re, duke u betuar se me profesionalizëm, përgjegjësi e integritet do të kujdesen për sigurinë dhe paqen e gjithë qytetarëve të Republikës së Kosovës.

Vushtrri, 2 korrik 2025 - Sot, në Akademinë e Kosovës për Siguri Publike, u zhvillua një takim i përbashkët me përfaqësues të Akademisë Diplomatike. Ky takim ishte pjesë e vazhdimit të bashkëpunimit të ndërsjellë ndërmjet dy institucioneve. Të dy institucionet u përfaqësuan nga udhëheqësit e tyre, z. Shpend Shabani, u.d. Drejtor të Përgjithshëm të AKSP-së, dhe znj. Mirjeta Behluli, Drejtoreshë e Përgjithshme e Akademisë Diplomatike, të shoqëruar nga bashkëpunëtorët e tyre.

Gjatë takimit, palët diskutuan për bashkëorganizimin e trajnimit të radhës në AKSP, i cili do t’u dedikohet zyrtarëve të huaj (ndërkombëtarë) që operojnë në fushën e sigurisë publike. Trajnime të tilla janë mbajtur edhe në vitet e kaluara, në kuadër të implementimit të suksesshëm të marrëveshjes së bashkëpunimit mes këtyre dy institucioneve.

Ky aktivitet dëshmon angazhimin e vazhdueshëm për zbatimin e marrëveshjes së bashkëpunimit ndërmjet dy institucioneve, e cila ka për synim forcimin e partneritetit strategjik në fusha me interes të përbashkët. Në fokus mbetet zhvillimi i trajnimeve cilësore, avancimi profesional dhe fuqizimi i kapaciteteve institucionale.

Përmes këtij bashkëpunimi, të dyja palët riafirmojnë përkushtimin e tyre për bashkërendim efektiv në organizimin e aktiviteteve të përbashkëta, shkëmbimin e njohurive dhe përvojave, si dhe mbështetjen e iniciativave që kontribuojnë në ngritjen e mëtejshme të standardeve në fushën e sigurisë publike dhe diplomacisë.

Vushtrri, 01 korrik 2025 - Sot në Akademinë e Kosovës për Siguri Publike (AKSP) David Walsh, profesor i hetimeve penale në Shkollën e Drejtësisë të Universitetit De Montfort, të Leicester në Mbretërinë e Bashkuar, njëkohësisht edhe udhëheqës i projektit “Krijimi i Rrjeteve për Zbatimin e Parimeve mbi Intervistimin Efektiv për Hetime (ImpleMendez)”, bëri një prezantim të Projektit ImpleMendez, i bazuar në gjashtë parime.

Profesori Walsh para zyrtarëve të lartë të AKSP-së, ligjëruesve të Fakultetit për Siguri Publike, zyrtarëve të Policisë së Kosovës e stafit udhëheqës të programeve trajnuese pranë AKSP-së prezantoi një historik të shkurtër të zanafillës së Parimeve mbi Intervistimin Efektiv për Hetimet dhe Mbledhjen e Informacionit, të njohura tashmë si Parimet e Mendezit.

Më pas profesori Wash, shpjegoi rëndësinë e projektit ImpleMendez në proceset hetimore të krimeve, ndërsa theksoi se projekti ImpleMendez është një projekt i gjërë i implementuar në 41 vende anëtare, që synim ka rrjetëzimin e mëtejmë, bashkëpunimin dhe përmirësimin e praktikave policore në hetimin efektiv të krimit dhe vërtetimin e provave.

Duke ndarë praktikat dhe përvojat e tij, profesor Walsh, shprehu vullnetin për të ndihmuar në implementimin e parimeve të projektit ImpleMendez, në veçanti rreth qasjes së drejtë të marrjes në pyetje të të dyshuarve, dëshmitarëve dhe viktimave (përfshirë intervistimin e fëmijëve) në Kosovë. Profesori, Walsh shpreson që edhe Kosova shumë shpejtë do të jetë pjesë e këtij projekti duke u përfaqësuar nga niveli profesional dhe akademik për avancimin e hetimeve efektive të krimeve nga fusha e marrjes në pyetje.

Projekti ImpleMéndez, është pjesë e Bashkëpunimit Evropian në Shkencë dhe Teknologji (COST) i financuar nga Bashkimi Evropian.