NewsArticle

Vushtrri, 4 dhjetor 2025 – Në ambientet e Agjencisë së Kosovës për Siguri Publike (AKSP) u zhvillua punëtoria rajonale me titull “Transparenca e Agjencive Mbikëqyrëse Policore dhe Roli i Transparencës në Forcimin e Integritetit Policor”. Ky aktivitet u organizua nga Inspektorati Policor i Kosovës (IPK) në partneritet me AKSP-në dhe përfaqëson një nga ngjarjet kryesore të Planit të Aktivitetit të Forumit Rajonal të Agjencive Mbikëqyrëse Policore.

Punëtoria dyditore mblodhi përfaqësues nga institucionet e mbikëqyrjes policore dhe departamentet e kontrollit të brendshëm të rajonit, përfshirë delegacione nga agjencitë mbikëqyrëse policore nga Shqipëria, Maqedonia e Veriut dhe Mali i Zi dhe përfaqësues të institucioneve vendore, nga Ministria e Punëve të Brendshme, Inspektorati Policor i Kosovës, Policia e Kosovës, Akademia e Kosovës për Siguri Publike. Pjesë e kësaj punëtorie ishin edhe profesorë nga Universiteti i Prishtinës (Fakulteti i Filologjisë – Programi i Gazetarisë) dhe përfaqësuesja e Misionit të OSBE-së në Kosovë.

Qëllimi kryesor ishte promovimi i transparencës institucionale si një shtyllë thelbësore në rritjen e besimit publik dhe forcimin e integritetit policor në nivel rajonal. Pjesëmarrësit – përfaqësues të institucioneve të ndryshme të mbikëqyrjes policore dhe strukturave të kontrollit të brendshëm nga vendet e rajonit – patën mundësinë të diskutojnë sfidat aktuale, të prezantojnë praktika të mira dhe të shkëmbejnë përvoja në fushën e mbikëqyrjes policore.

Gjatë sesioneve u trajtuan temat kyçe si: rëndësia e komunikimit transparent me publikun, roli i raportimit të rregullt në llogaridhënie, përdorimi i mekanizmave të avancuar të monitorimit, si dhe forcimi i bashkëpunimit ndërinstitucional në adresimin e parregullsive policore. Po ashtu, u theksua nevoja për standardizimin e qasjeve të mbikëqyrjes dhe rritja e efikasitetit të institucioneve përgjegjëse në ruajtjen e etikës dhe profesionalizmit.

Diskutimet treguan qartë se transparenca lidhet ngushtë me profesionalizmin, etikën policore dhe integritetin institucional.

Punëtoria rezultoi një platformë e rëndësishme për nxitjen e dialogut dhe koordinimit rajonal, duke kontribuar në krijimin e një rrjeti më të fortë dhe më bashkëpunues ndërmjet agjencive që kanë mision të përbashkët sigurimin e integritetit dhe përgjegjshmërisë policore.

Në fund të aktivitetit u mbajt ceremonia e ndarjes së certifikatave. Përfaqësuesit e IPK-së dhe AKSP-së falënderuan delegacionet për pjesëmarrjen dhe theksuan rëndësinë e vazhdimit të bashkëpunimit rajonal në forcimin e integritetit policor dhe qeverisjes së mirë.

Vushtrri, 12 dhjetor 2025 – Bordi i Akademisë së Kosovës për Siguri Publike (AKSP) mbajti sot takimin e 44-të të radhës, i cili shënon takimin e fundit për vitin 2025. Ky takim u përqendrua në diskutimin e standardeve profesionale për institucionet e sigurisë, si dhe në shqyrtimin e projekt-planit vjetor të trajnimeve për vitin 2026, në fushën e sigurisë publike.

Kryesuesi i Bordit, z. Ismail Dibrani hapi mbledhjen dhe pas miratimit të rendit të ditës të takimit të 44-të, Bordi vazhdoi punimet.

Ushtruesi i detyrës së Drejtorit të Përgjithshëm të Akademisë, Shpend Shabani, falënderoi përfaqësuesit e institucioneve të sigurisë publike për bashkëpunimin e vazhdueshëm dhe të frytshëm. Ai shprehu besimin se ky bashkëpunim do të vazhdojë me të njëjtën intensitet edhe në vitet në vijim, për të arritur objektivat e përbashkëta.

Në vijim, Drejtori Shabani informoi anëtarët e Bordit për aktivitetet dhe veprimet e ndërmarra gjatë vitit 2025 nga AKSP, duke theksuar se Akademia mbetet e përkushtuar për të bashkëpunuar ngushtë me të gjitha institucionet e sigurisë publike në realizimin e programeve trajnuese dhe arsimore të planifikuara. Ai po ashtu theksoi gatishmërinë e Akademisë për të ofruar trajnime shtesë, në varësi të nevojave specifike të institucioneve të sigurisë.

Një tjetër çështje e rëndësishme e trajtuar ishte procesi i riakreditimit të Fakultetit të Sigurisë Publike (FSP). Drejtori Shabani informoi se ka përfunduar një punë voluminoze për përgatitjen e dosjes së riakreditimit dhe shprehu optimizmin se FSP do të riakreditohet me sukses, duke ofruar mundësi të reja për studentët e ardhshëm.

Emin Uka, udhëheqës i Divizionit për Sigurim të Cilësisë, prezantoi para anëtarëve standardet profesionale të kërkuara për institucionet e sigurisë publike. Ai dha një përshkrim të detajuar të secilës nga këto standarde dhe theksoi rëndësinë e implementimit të tyre për ngritjen e cilësisë së shërbimeve në sektorin e sigurisë. Pas shqyrtimit, Bordi miratoi standardet e profesionit për gjashtë (6) institucione të sigurisë publike, si dhe Planin e Trajnimeve për vitin 2026.

Shaban Bajrami, udhëheqës i Kurrikulave dhe Testimeve, paraqiti planin e trajnimeve për vitin 2026, duke specifikuar edhe kohëzgjatjen dhe përmbajtjen e trajnimeve profesionale për pjesëtarët e institucioneve të sigurisë. Këto trajnime do të mbulojnë aspekte të ndryshme të sigurisë publike dhe do të kontribuojnë në forcimin e kapaciteteve të institucioneve përkatëse.

Gjatë takimit u diskutuan edhe disa çështje të tjera të rëndësishme, me fokus në angazhimin për realizimin e objektivave institucionale brenda afateve të përcaktuara, në kuadër të projekteve vjetore dhe planeve strategjike për vitin 2026 dhe periudhën pasuese.

Në takim morën pjesë Ushtruesi i Detyrës së Drejtorit të Përgjithshëm të Akademisë Shpend Shabani, Drejtori i Përgjithshëm i Policisë së Kosovës Gazmend Hoxha, Drejtori i Përgjithshëm i Shërbimit Sprovues të Kosovës, Arsim Tahiri, Kryeshef  Ekzekutiv i Inspektoratit Policor të Kosovës Kushtrim Hodaj,  Drejtori Departamentit Rajonal të Doganës se Kosovës  Ardian Jashari,  Drejtori i Përgjithshëm  i  Shërbimit Korrektues të Kosovës  Ismail Dibrani,  Drejtori i Përgjithshëm në Agjencinë e Menaxhimit Emergjent, Genc Metaj, përfaqësuesi i OSBE-së Bylent Ribari, si dhe zyrtarë të tjerë të lartë nga AKSP.