Lajmet

Vushtrri, 28 dhjetor 2021 -  Në Akademinë e Kosovës për Siguri Publike (AKSP),  sot  u mbajt  takimi i rregullt i bordit të Akademisë ku u diskutua rreth aktiviteteve dhe trajnimeve që janë zhvilluar gjatë  këtij viti që po e lemë pas. 

Në takim morën pjesë  Drejtori i Përgjithshëm i Akademisë për  Siguri Publike Arton Berisha, Drejtori i Përgjithshëm i Policisë së Kosovës Samedin Mehmeti, Drejtori i Përgjithshëm i Inspektoratit Policor të Kosovës Kushtrim Hodaj,  Zëvendësues i  Drejtorit të Përgjithshëm të  Shërbimit Korrektues  të Kosovës  Ali Gashi, Zëvendësuese e Drejtorit të Përgjithshëm të Shërbimit Sprovues të Kosovës  Metije Ademi, Drejtori i Departamentit për Rend dhe Siguri Publike në OSBE Edward Anderson, Dekani i Fakultetit të Sigurisë Publike Bejtush Gashi si dhe  zyrtarë tjerë nga institucionet e sigurisë publike.

Temë  me rendësi në këtë takim ishte trajnimet e përfunduara në Akademinë e Kosovës për Siguri Publike gjatë vitit 2021, gjithashtu pikë e rendit të ditës ishte diskutimet rreth  planit të trajnimeve që do të mbahen gjatë vitit 2022.

Gjatë këtij takim anëtaret e bordit vlerësuan se në Akademi gjatë vitit që po e lemë pas është bërë një punë shumë e madhe. Anëtarët e bordit vlerësuan se edhe për kundër virusit “COVID 19” në Akademi janë realizuar shumë trajnime dhe shumë aktivitete që lidhen më fushën e sigurisë publike, gjithmonë duke u respektuar masat mbrojtës kudër “COVID 19”. 

Tutje pos tjerash gjatë mbledhjes u shqyrtuan edhe kërkesat  e studentëve të  Fakultetit të Sigurisë Publike, kërkesa këto që kanë të bëjnë me orarin e ligjëratave. 

Po ashtu anëtarët e bordit të Akademisë u njoftuan edhe për themelimin  e grupit punese për hartimin dhe kompletimin e dokumentacionit përkatës  për hapjen e programin master “Siguria Publike”  në Fakultetin e Sigurisë Publike që është në kuadër të Akademisë së Kosovës për Siguri Publike. 

Në fund anëtarët  e bordit falënderuan stafin e Akademisë për bashkëpunim gjatë gjithë kohës. 

Vushtrri, 23 dhjetor 2021 –  Në Akademinë e Kosovës për Siguri Publike (AKSP), sot u përurua dhoma e webinarëve dhe salla e ekspozitës së uniformave të institucioneve të sigurisë publike në Kosovë. E gjithë kjo është donacion nga Organizata për Siguri dhe Bashkëpunim në Evropë (OSBE)  më mision në Kosovë. 

Drejtori i Përgjithshëm i Akademisë së Kosovës për Siguri Publike Arton Berisha e falënderoj  OSBE –në për ndihmën e vazhdueshme që po i bënë Akademisë.  Drejtori Berisha tha se çdo ditë po krijohen kushte edhe më të mira  për kadetët, studentët dhe për të gjithë zyrtarët e sigurisë publike që kryejnë trajnime në Akademi. 

“ Siç jemi në dijeni virusi ‘Covid 19’ ka shkaktuar pasoja të mëdha në gjithë globin dhe për këtë ka lindur nevoja që komunikimi të zhvillohet në një tjetër dimensioni, andaj dhoma e webinarëve do t’í shërbej Akademisë për të  mbajtur aktivitete, mësim, trajnime, seminare, punëtori edhe nga larg, të cilat do t’ju dedikohet të gjitha institucioneve të sigurisë publike për të cilat AKSP ofron trajnime dhe arsim të lartë”, u shpreh Berisha 

Ai foli edhe rreth sallës së ekspozitës në të cilën janë të ekspozuara uniformat dhe simbolet e zyrtarëve të cilët kujdesën për siguri publike duke vlerësuar së kjo sallë ka një rëndësi të veçantë për Akademinë.

Ndërsa zëvendësministri i Punëve të Brendshme Bardhyl Dobra i falënderoj të gjithë partnerët ndërkombëtarë që po japin kontribut në zhvillimin e institucioneve të sigurisë publike.

“Profesionalizmi nuk arrihet ndryshe përveç arsimimit dhe trajnimeve të duhura dhe në këtë aspekt nuk mjafton vetëm kurrikula të jetë në nivelin e duhur,  por edhe pajisjet dhe premisat e Akademisë të jenë në nivelin e duhur. E dimë që është bërë punë shumë e madhe këtyre viteve,  e dimë që këtë nuk do ta arrijmë  pa ndihmën e partnerëve tanë  andaj jemi shumë falënderues jo vetëm OSBE-së, por të gjithë akterëve tjerë që kanë kontribuar gjatë këtyre viteve”, u shpreh zv/ministri Dobra duke e inkurajuar Akademinë që të vazhdojë punën  në mënyrë që zyrtarët e sigurisë publike të jenë në nivelin e duhur profesional. 

Kurse udhëheqësi i misionit të OSBE-së në Kosovë, Michael Davenport  e përgezon  Akademinë e Kosovës për Siguri Publike për  tw arriturat, ndërsa u shpreh i lumtur  që OSBE  ka pajisur me teknologji të nevojshme dhomën e webinarëve dhe sallën e ekspozitës së uniformave. 

Davenport tha se  Akademinë është një liderë jo vetëm në Kosovë, por edhe në regjion. 

Më këtë rast  Davenport ka uruar Akademinë për ri akreditimin e saj nga Agjencia e Kosovës për Akreditim dhe për ri akreditimin  nga Asociacioni Ndërkombëtar i Drejtorëve të Standardeve dhe Trajnimit të Zbatimit të Ligjit (IADLEST) të Shteteve të Bashkuara të Amerikës (SHBA) në fushën institucionale me çmimin e ekselencës. 

Ambasadori Davenport tha se OSBE do të vazhdojë të përkrah institucionet e sigurisë publike edhe në të ardhmen.

Në këtë ceremoni morën pjesë Drejtori i Përgjithshëm  i Akademisë së Kosovës për Siguri Publike Arton Berisha, zëvendësministri i Punëve të Brendshme Bardhyl Dobra, Ambasadori i misionit të OSBE-së në Kosovë Michael Davenport, Drejtori i Përgjithshëm i Policisë së Kosovës Samedin Mehmeti, Drejtori i Përgjithshëm i Inspektoratit Policor të Kosovës Kushtrim Hodaj, Zëvendësdrejtor  i Agjencisë së Menaxhimt Emergjent Shefki Avdullahu, zëvendësuese e Drejtorit të Përgjithshëm të Shërbimit Sprovues të Kosovës  Metije Ademi, Drejtori i Departamentit për Rend dhe Siguri Publike në OSBE Edward Anderson, Shpresa Muharremi këshilltare kombëtare e OSBE-së në AKSP si dhe zyrtarë tjerë nga institucionet e sigurisë publike.

Vushtrri, 16 dhjetor  2021 –  Drejtori i Përgjithshëm i Akademisë së Kosovës për Siguri Publike (AKSP),  Arton Berisha priti sot në takim një delegacion nga institucioni Shërbimi i Mbrojtjes nga Zjarri dhe Shpëtimin të Republikës së Shqipërisë.  Delegacioni ishte i  kryesuar nga Drejtoresha e Përgjithshëm e këtij institucioni Holta Komino e cila ishte  e shoqëruar nga drejtori i MZSH-së  për Tiranë Shkëlqim Goxhaj dhe drejtori i trajnimeve dhe mbështetjes logjistike Arben Cara. 

Qëllim i kësaj vizite nga delegacioni në fjalë ishte  njohja me modelin e arsimit në fushën e sigurisë konkretisht në menaxhimin emergjent në kohë krizash, siç janë zjarrfikja, tërmetet etj. 

Fillimisht delegacioni nga Shqipëria u njoftua për misionin dhe zhvillimet e fundit në Akademinë e Kosovës për Siguri Publike. 

Gjatë  këtij takimi, drejtori Berisha foli rreth trajnimeve profesionale të zyrtarëve të sigurisë publike si dhe për  bashkëpunimin e vazhdueshëm në mes Akademisë së Kosovës për Siguri Publike dhe Akademisë së Sigurisë Publike në Shqipëri, në fushën e trajnimeve për pjesëtarët e  sigurisë publike.

Drejtori Berisha vlerësoj se shkëmbimi i përvojave mes Kosovës dhe Shqipërisë në fushën e sigurisë publike është i domosdoshëm dhe i mirëseardhur.

“Bashkëpunimet për zhvillimin e zyrtarëve të sigurisë publike është i mirëseardhur, ne si Akademi për trajnimin e zbatuesve të ligjit jemi të gatshëm që bashkëpunim në fushën e sigurisë publike të vazhdojë edhe më tutje”, u shpreh Berisha.

Ndërsa delegacioni nga Shërbimi i Mbrojtjes nga Zjarri dhe Shpëtimin u interesuan kryesisht rreth metodave që ka Akademia për trajnimin dhe arsimimin e pjesëtarëve të sigurisë publike në menaxhimin emergjent, konkretisht zjarrfikje dhe shpëtim. 

Delegacioni në fjalë vlerësoi se Akademia e Kosovës për Siguri Publike është një shembull i mirë për arsimimin dhe trajnimin e pjesëtarëve të sigurisë. Njëkohësisht vlerësuan se shkëmbimi i përvojave më  Akademinë  e Kosovës për Siguri Publike është shumë i rëndësishëm.

Në takim më delegacionin nga Shqipëria morën pjesë Hasan Kodra Drejtor i Departamentit të Zjarrfikjes dhe Shpëtimit në Agjencionin e Menaxhimit Emergjent, Nexhat Behrami Udhëheqës i Divizionit për Standarde Zjarrfikjes dhe Shpëtimit në AME, Rrahim Rexha  Drejtor i Departamentit të Financave dhe Shërbimeve të Përbashkëta në Akademinë e Kosovës për Siguri Publike, Kastriot Jashari  Drejtor i Departamentit për Trajnime dhe Përkrahje Programore në Akademi  dhe  Avni Istrefi Udhëheqës i Divizionit për Marrëdhënie me Jashtë po ashtu në Akademi. 

Vushtrri, 09 dhjetor 2021 –  Akademia e Kosovës për Siguri Publike organizon konferencë shkencore ndërkombëtare me temën  \"Teknologjia dhe siguria: Një luftë moderne kundër krimit\". 

Qëllimi i mbajtjes së kësaj konference është që të bashkojë studiues të fushës së sigurisë publike të rajonit të Ballkanit dhe vendeve evropiane me qëllim të prezantimit të modeleve të institucioneve arsimore, trajnimet dhe  përvojat në vendet e tyre. 

Synimi kryesor i konferencës është të adresoj rolin dhe ndikimin e çështjeve të sigurisë kibernetike në shoqëri dhe rolin e zbatimit të ligjit në trajtimin e këtyre çështjeve.

Bazuar në thirrjen për aplikim në konferencë, jeni të ftuar;  akademikë, studentë, hulumtues dhe profesionistë të tjerë të pavarur ose të punësuar në Agjencitë e Sigurisë Publike, institucione shtetërore, institucione arsimore apo hulumtuese nga Kosova, vendet e rajonit dhe vendet partnere ndërkombëtare, për të marrë pjesë  në konferencë me punimiet,  përkatësisht me hulumtimet e juaja shkencore. 

Punimet dhe prezantimet nuk duhet të jenë botuar apo paraqitur diku tjetër më parë.

• Dorëzimi i abstraktit me 20 janar 2022,  njoftimi rreth pranimit me 30 janar 2022

• Dorëzimi i punimeve, 15 shkurt 2022

• Njoftimi për pranimin e punimit, 25 shkurt 2022

• Data e konferencës 10-11 Mars 2022

Propozimi ose abstrakti duhet të përmbajë 250-300 fjalë, me 4-5 fjalë kyçe, duhet të dërgohet në e-mail: [email protected] , cc: [email protected] 

Konferenca do të mbahet në gjuhën shqipe, serbe dhe angleze, me mundësi përkthimi simultan në gjuhët e lartpërmendura. 

Data e mbajtjes së konferencës më 10-11 mars 2022 Vushtrri

Për më tepër informata klikoni këtu: NJOFTIM 

Vushtrri 05 nëntor 2021 - Akademia e Kosovës për Siguri Publike (AKSP) është ri akredituar nga Asociacioni Ndërkombëtar i Drejtorëve të Standardeve dhe Trajnimit të Zbatimit të Ligjit (IADLEST) të Shteteve të Bashkuara të Amerikës (SHBA) në fushën institucionale me çmimin më të lartë të ofruar ndonjëherë nga ky asociacion, Çmimin e Ekselencës.

AKSP pas fazës fillestare për ri akreditim, filloi procesin aplikues në pranverën e vitit 2020. Ngarkimi i dokumentacionit në platformën e ofruar nga IADLEST u përmbyll në fund të muajit mars 2021, me çfarë filluan përgatitjet për fazën inspektuese në terren nga ana e ekipit vlerësues të IADLEST. Vizita fakt-mbledhëse dhe inspektuese është bërë me datën 23 deri më 24 gusht 2021 në Akademi. Ekipi vlerësues i ekspertëve në përbërje të Mark Damitio, menaxher i akreditimit në IADLEST dhe Kelly Alzaharna, drejtoreshë Ekzekutive e Akademisë së Zbatimit të Ligjit në New Mexico të SHBA-ve, njëherësh kryesuese e Komitetit Akreditues në IALDEST, zhvilluan një mori takimesh në koordinim me Emin Ukën, Udhëheqës i Divizionit për Sigurimin e Cilësisë menaxher i Akreditimit në AKSP, nën udhëheqjen dhe menaxhimin e Arton Berishës, Drejtor i Përgjithshëm i Akademisë së Kosovës për Siguri Publike.  

Takimet u zhvilluan me stafin menaxhues, udhëheqës e trajnues në AKSP, duke verifikuar përputhshmërinë e politikave, proceseve dhe zbatueshmërinë e standardeve në kuadër të AKSP-së. Pas fazës inspektuese e fakt-mbledhëse, pasoi faza e rekomandimeve dhe e raportit preliminar të cilat, bazuar në rekomandimet e ekipit vlerësues, i hapën rrugën Komitetit Akreditues të IADLEST të marrë vendim për ri akreditimin e AKSP-së me njohjen më të lartë të ofruar ndonjëherë nga ky Asociacion, me Çmimin e Ekselencës  tejkaluar të priturat nga 80%, me një vlerësim prej 96.26% arritshmëri. 

Kjo njohje e radhit AKSP-në të dytën në botë pas ShBA-së, që njëherësh është treguesi parësor i përmbushjes së misionit të Akademisë si një Qendër e Ekselencës në rajon e më gjerë. 

“Në këtë aspekt, AKSP po i bashkohet një grupi elitar të përkushtuar për përsosmërinë në ofrimin e trajnimeve për sigurinë publike në mbarë botën. Politikat, procedurat, proceset, objektet dhe personeli i Akademisë pasqyrojnë faktin e të qenurit shembulli më i mirë i praktikave dhe standardeve në aspektin vendor dhe atë ndërkombëtar”,  kështu thuhet në njoftimin e akreditim të IADLEST. 

Ndryshe, mbetet që Akademia të sfidohet në përmirësimin e vazhdueshëm në ruajtjen dhe aplikimin e kësaj njohjeje për të gjithë ata që i qasen Akademisë së Kosovës për Siguri Publike duke zbatuar standarde dhe shembull për t’u ndjekur nga të tjerët.   

Vushtrri, 27 tetor 2021 – Sekretarja e  Përgjithshme e Organizatës për Siguri dhe Bashkëpunim në Evropë (OSBE) Helga Maria Schmid,  vizitoi Akademinë e Kosovës për Siguri Publike (AKSP), ku u prit nga Ministri i Punëve të Brendshme Xhelal Sveçla si dhe nga Drejtori i Përgjithshëm i Akademisë Arton Berisha. Në pritje ishte edhe Drejtori i Përgjithshëm i Policisë së Kosovës  Samedin Mehmeti si dhe ministri i Administrimit të Pushtetit Lokal Elbert Krasniqi.

Sekretarja Schmid ishte e shoqëruar  nga udhëheqësi i misionit të OSBE-së në Kosovë Michael Davenport si dhe nga zëvendës udhëheqës i misionit në fjalë Kilian Wahl.

Qëllimi i vizitës se sekretares Schmid ishte që të njihet më për se afërmi me misionin, trajnimet si dhe më zhvillimet e fundit në Akademi  

Ministri i Punëve të Brendshme Xhelal Sveçla duke falënderuar OSBE- në për përkrahjen e vazhdueshme që iu ofron institucioneve të sigurisë publike tha se Akademia e Kosovës për Siguri Publike  që nga themelimi ka luajtur rol të rëndësishëm  në edukimin dhe trajnimin e zyrtarëve të  institucioneve të sigurisë, duke nxjerr shumë gjenerata të Policisë së Kosovës, por edhe zyrtar të institucioneve tjera të sigurisë.  

“Më gjithë të arriturat deri me tani vizioni ynë është që Akademia e Kosovës për Siguri Publike të avancohet edhe më shumë. Nga një institucion përgjegjës për ofrimin e trajnimeve, të avancohet në një institucion edukativ që do të ofroj, përgatisë personel të specializuar dhe profesional në aspektin akademik kërkimor e shkencor në fushën e sigurisë publike”, tha ministri Sveçla.  

 Ministri Sveçla tha se për Qeverinë e Kosovës dhe për Ministrinë e Punëve të Brendshme prioritet është dhe do të mbetët  lufta kundër krimit të organizuar dhe korrupsionit dhe për këtë ai tha se MPB do t’i ofroj  mbështetje të pa rezervë çdo pjesëtari të Policisë së Kosovës.

Duke folur për punën e Policisë së Kosovës ministri Sveçla tha se falë bashkëpunimit, vetëm në gjashtë muajit e fundit është bërë një arritur e madhe në luftimin e krimit dhe korrupsionit.

Tutje gjatë këtij takimi ministri Sveçla ka folur edhe rreth përfshirjes së minoriteteve  në Policinë e Kosovës.

Ai tha se synimi i Ministrisë së Punëve të Brendshme është që inkuadrimi i komuniteteve pakicë në Policinë e Kosovës  të rritet në vitet në vijim. “Është shumë më rëndësi që më mbështetjen e OSBE-së kemi filluar një iniciativë shumë të mirë që ka të bëjë më trajnimet parapërgatitore, me sesionet  informuese për të rinjtë dhe të rejat e komunitetit jo shumicë më theks të veçantë komunitetet  romë, ashkali dhe egjiptian që dëshirojnë t'i bashkohen Policisë së Kosovës”, tha ministri Sveçla.

Më këtë rast ministri Sveçla shprehi  gatishmërinë e tij për bashkëpunim me OSBE-në dhe me institucionet e sigurisë publike edhe më tutje.

Ndërsa sekretarja e  Përgjithshme e Organizatës për Siguri dhe Bashkëpunim në Evropë (OSBE) Helga Maria Schmid  u shpreh e kënaqur për bashkëpunimin që OSBE-ja ka me institucionet e Kosovës, konkretisht me institucionet e sigurisë publike.  “Jam e kënaqur për partneritetin dhe marrëdhëniet e mirë që OSBE-ja ka më Akademinë,  me Ministrinë e Punëve të Brendshme, më Policinë e Kosovës dhe me ministritë tjera”, tha Schmid  ndërkohë që vlerësoj se edukim për zyrtarët e sigurisë publike është shumë më rëndësi.

Sekretarja Schmid foli për barazinë gjinore në institucionet e sigurisë publike si dhe rreth inkuadrimit të minoriteteve pakicë në Policinë e Kosovës.  

Ajo vlerësoj lartë përpjekjet e institucioneve të Kosovës  për t’i dhënë hapësirë minoriteteve që të jenë pjesë e Policisë së Kosovës.  Schmid tha se OSBE do të vazhdojë të jap përkrahje në zhvillimin e sektorit të sigurisë publike në Kosovë.

Gjatë takimit foli edhe ministri i Administrimit të Pushtetit Lokal Elbert Krasniqi tha se Kosova ka bashkëpunim të shkëlqyeshëm më OSBE-në nëpër të gjitha komunat e Republikës së Kosovës.  Duke folur rreth bashkëpunimit ministri Krasniqi tha se OSBE e ka përkrah MAPL-në edhe në draftimin e ligjit për vetëqeverisje lokale.  

Ndërsa, udhëheqësi i misionit të OSBE-së në Kosovë, Michael Davenport, tha se OSBE është duke mbajtur komponentat më komunitetet jo shumicë që ata të njoftohen se si të inkuadrohen në Policinë e Kosovës. “Ripërsërisë përkushtimin tonë për të vazhduar dhe punuar për avancimin e kapaciteteve dhe shkathtësive  të agjencive të zbatuesve të ligjit”, tha Davenport.  

Kurse, Drejtori i Përgjithshëm i Policisë së Kosovës Samedin Mehmeti falënderoj OSBE-në për mbështetjen  që i bënë Policisë së Kosovës, “Rrugëtim i themelimit të Policisë së Kosovës nuk ka qenë i lehtë, duke marrë për bazë kohën dhe rrethanat në të cilat gjendet vendin ynë në atë kohë, por me ndihmën e partnerëve tanë ndërkombëtarë e në veçanti me kontributin e OSBE-së kemi arritur të ndërtojmë një institucion policor mjaftë kredibil dhe profesional, ndërtimin e një policie shumë etnik, demokratike”, tha Mehmeti duke thënë se Policia e Kosovës është duke kryer detyrën e saj më shumë sukses.


Edhe, Drejtori i Përgjithshëm i Akademisë së Kosovës për Siguri Publike Arton Berisha falënderoj OSBE-në për mbështetjen që po i bënë Akademisë.  “Të flasësh për kontributin e kësaj organizate jo vetëm për AKSP-në, por edhe për institucionet e zbatimit të ligjit në veçanti dhe për kontributin e përgjithshëm të saj në Kosovën e pas vitit 1999 është me të vërtetë sa privilegj  aq edhe përgjegjësi”, u shpreh Berisha duke thënë se pa misionin e OSBE-së AKSP nuk do të ishte kjo që është sot.

Drejtori Berisha përmendi të gjitha fushat në ndërtimin e së cilave ka dhënë përkrahje OSBE-ja. Po ashtu Berisha foli edhe për donacionet e shumta  që ka dhënë OSBE-ja pa të cilat siç tha ai Akademia nuk do të ishte kaq profesionale dhe e njohur edhe nga ndërkombëtaret.

Në takim morën pjesë edhe zyrtarë tjerë nga asgjencionet e sigurisë publike.

 

Vushtrri, 19 tetor 2021.- Në Akademinë e Kosovës për Siguri Publike u mbajt punëtoria e parë në nivel të përfituesve, qëllimi i së cilës ishte mbledhja dhe analizimi i të dhënave për nevojat e trajnimeve në fushën e sigurisë publike në Kosovë. Ky aktivitet është pjesë e projektit Partneriteti i Ballkanit Perëndimor kundër krimit dhe terrorizmit (CEPOL WB PaCT).

Gjatë mbajtjes se punëtorisë të pranishmit vlerësuan se projekti në fjalë ka për qëllim ngritjen e kapaciteteve të zyrtarëve  të fushës së sigurisë publike.
 
Florentin-Dumitru Dicu, zyrtar i lartë i projektit duke përshëndetur të pranishmit vlerësoj se  realizimi i projektit në fjalë është shumë i rëndësishëm për zbatuesit e ligjit.  Ai tha se që nga java tjetër pesë zyrtarë të zbatimit të ligjit nga Kosova do të përfitojnë nga pjesëmarrja në një trajnim në selinë e CEPOL-it në Budapest.   Dicu foli edhe rreth tri projekteve tjera të CEPOL-it në rajonet e tjera, si dhe komponentët e projektit WB PaCT.

Kurse eksperti afatshkurtër i projektit, Peter Davidson, theksoi  bashkëpunimin që Kosova ka pasur deri më tani me CEPOL-in, përfshirë programin e shkëmbimit, dhe shpjegoi në detaje qasjen shkencore në kryerjen e kurseve të trajnimit, përfshirë trajnimin e trajnerëve. Për më tepër, ai përmendi se qasja e CEPOL është të mbulojë të gjitha fushat e trajnimit bazuar në nevojat e zyrtarëve të zbatimit të ligjit, duke u fokusuar në rëndësi, zona, nivel dhe numra.

Albert Avdiu nga Ministria e Punëve të Brendshme gjithashtu përshëndeti pjesëmarrësit, duke theksuar mbështetjen që i jepet projektit nga kjo ministri

Avni Istrefi nga Akademia e Kosovës për Siguri Publike (AKSP), CAPASPOC e Projektit të WB PaCT për Kosovën, tha se kjo punëtori do të përdoret gjerësisht në dobi të institucioneve të zbatimit të ligjit të Kosovës, duke theksuar rrjetin e madh që AKSP tashmë ka me të gjitha agjencitë e zbatimit të ligjit.

 Ndërsa Kadri Arifi nga Policia e Kosovës (PK), ANASPOC e Projektit të WB PaCT për Kosovën  u përqendrua në rëndësinë e këtij projekti që do të ketë për ngritjen e kapaciteteve dhe nevojave operacionale të Policisë së Kosovës, si institucioni kryesor dhe i rëndësishëm i vendit për luftimin e krimit dhe terrorizmit.


Kjo punëtori  është pjesë e projektit Partneriteti i Ballkanit Perëndimor kundër Krimit dhe Terrorizmit (CEPOL  WB PaCT), një projekt në mesin e 4 projekteve në total që Agjencia e Bashkimit Evropian për Trajnim në Zbatimit të Ligjit (CEPOL) po zbaton aktualisht brenda dimensionit të bashkëpunimit ndërkombëtar, duke përfshirë edhe CT INFLOËW, TOPCOP dhe EUROMED Police. Projekti zbatohet së bashku me Agjencinë e Bashkimit Evropian për Zbatimin e Ligjit (EUROPOL), financuar nga Bashkimi Evropian, dhe, përveç Kosovës, implementohet edhe në Shqipëri, Bosnjë dhe Hercegovinë, Maqedoninë e Veriut, Malin e Zi dhe Serbi.


Kosova ka marrë pjesë aktive në projekt që nga fillimi i tij dhe tashmë ka krijuar Pikën e Vetme të Kontaktit (SPOC), një përfaqësues të Ministrisë së Punëve të Brendshme (MPB), Pikën e Vetme të Kontaktit për Ndërtimin e Kapaciteteve (CAPASPOC), një përfaqësues nga Akademia e Kosovës për Siguri Publike (AKSP) dhe Pikën e Vetme të Kontaktit Analitik (ANASPOC), një përfaqësues nga Policia e Kosovës.

Në këtë punëtori morën pjesë zyrtarë nga CEPOL, Ministria e Punëve të Brendshme, Akademia e Kosovës për Siguri Publike, Policia e Kosovës, Dogana e Kosovës dhe Njësia e Inteligjencës Financiare.

Ndryshe, Projekti WB PaCT arrin shumën totale prej 3,000,000 € dhe zbatohet për 3 vjet, nga 19 tetori 2020 deri më 18 tetor 2023. Projekti do të zbatohet përmes metodave të menaxhimit indirekt sipas Instrumentit për Asistencën e Para-Anëtarësimit, objektivat e përgjithshme të të cilit janë për të lehtësuar ngritjen e kapaciteteve të autoriteteve në Ballkanin Perëndimor për luftën ndaj krimit të organizuar dhe terrorizmit, përpjekjet dhe luftën kundër ekstremizmit të vendosur me forcë përgjatë kufirit brenda rajonit dhe me BE-në.

Vushtrri, 25 gusht 2021 -  Në Akademinë e Kosovës për Siguri Publike për dy ditë radhazi, me 23 dhe 24 gusht, qëndroi për vizitë një ekip i ekspertëve vlerësues nga Asociacioni Ndërkombëtar i Drejtorëve të Standardeve dhe Trajnimit të Zbatimit të Ligjit të Shteteve të Bashkuara të Amerikës, (International Association of Directors of Law Enforcement Standards and Training- IADLEST).

 Qëllimi i vizitës ishte për të mbledhur fakte rreth procesit të ri-akreditimit ndërkombëtar të Akademisë.


Akademia e Kosovës për Siguri Publike (AKSP) ka fituar akreditim  ndërkombëtar nga IADLEST  në  muajin maj të vitit 2018 për periudhën tre vjeçare,  duke qenë kështu institucioni i parë i akredituar  jashtë SHBA-ve.


Ekipi i ekspertëve është udhëhequr nga Mark Damitio menaxher i akreditimit në IADLEST  dhe  Kelly Alzaharna, drejtoresh e  Akademisë e Zbatimit të Ligjit në New Mexico si dhe kryetare e  Komitetit të Akreditimit në IADLEST.

Ekipi i ekspertëve vlerësues nga IADLEST  gjatë vizitës së tyre në Akademi është pritur nga Drejtori i Përgjithshëm i Akademisë së Kosovës për Siguri Publike   Arton Berisha, udhëheqësit e lartë si dhe përfaqësuesit e agjencioneve të sigurisë publike në Akademi.


Gjatë procesit të verifikimit drejtori Berisha e njoftoi ekipin e ekspertëve për rrjedhën e proceseve gjatë tri vjetëve të fundit në Akademinë si dhe iu ofroi  mbështetje të plotë.

Berisha shfaqi shpresën që Akademia do të vazhdojë të renditet edhe me tutje me institucionet e sigurisë publike ndërkombëtare siç është IADLEST etj.

Më këtë rast drejtori Berisha e falënderoj ICITAP-in, Ambasadën e SHBA-ve  në Kosovë për përkrahjen që i ka bërë dhe vazhdon ti bëjë Akademisë.

“Akademia synon që në të ardhmen të jetë qendër e ekselencës, rrugëtimi i saj ka filluar qysh në vitin 2011 më miratimin e ligjit të saj,  ky rrugëtim u argumentua  duke pasur bashkëpunim me institucionet e sigurisë vendore dhe ndërkombëtare,  duke u renditur si organ kyç në ngritjen kapaciteteve të zyrtarëve të sigurisë publike”, u shpreh Berisha duke thënë se akreditimi i parë nga IADLEST  i ka hapur rrugë Akademisë  në zbatimit  e strategjive të saj.

Drejtori i Përgjithshëm i Akademisë Arton Berisha u zotua për përmirësim të vazhdueshëm të proceseve, infrastrukturës dhe shërbimeve të cilat janë fushëveprim i AKSP-së.


Kurse Ismail Smakiqi i cili ka qenë drejtor i përgjithshëm në Akademi gjatë vitit 2011-2020 shprehi barrën e përgjegjës të cilën e ka ndjerë Akademia, si bartëse e akreditimit ndërkombëtar nga IADLEST  gjatë këtyre tre viteve të fundit, dhe synimin e Akademisë të shprehur në Strategjinë Zhvillimore të Akademisë gjatë viteve 2019 – 2022, gjegjësisht në vizionin e kësaj strategjie që “në vitin 2022 Akademia do të jetë Qendra e Ekselencës për Siguri Publike në Kosovë”.


Ndërsa duke folur në emër të ekipi të ekspertëve nga IADLEST-i  Mark Damitio, shprehi konsideratë të lartë për Akademinë në procesin e vlerësimit për ri-akreditimin ndërkombëtar të Akademisë.
Damitio veçoi  rolin e lidershipit të Akademisë në rrugëtimin shumë vjeçar drejtë një Akademie me standarde të larta dhe praktika më të mira, ashtu siç janë të njohura vlerësimet e IADLEST-it.  
Damitio tha se vendimi për ri-akreditim të Akademisë nga IADLEST do të kumtohet në ditët në vijim, pas vendimit të Bordit Ekzekutiv të IADLEST-it.


Ndryshe gjatë dy ditëve në vijim ekipi i ekspertëve ka vazhduar punën në verifikimin e standardeve në fusha përkatëse, me ç’ rast ka zhvilluar intervista me instruktorët, kadetët, me drejtoret e departamenteve në Akademi etj.  Po ashtu kanë vizituar edhe  objektet e Akademisë ku zhvillohen trajnimet siç janë sallat e edukatës fizike, poligonet e gjuajtjes me armë zjarri, Pajisjen e Trajnimit të Simulimit të Armëve të Zjarrit (FATS), poligonin e trafikut etj.
 

Vushtrri, 12 gusht 2021 –  Në vazhdën e bashkëpunimeve në fushën e trajnimeve, Akademia e Kosovës për Siguri Publike (AKSP), sot  nënshkroi marrëveshje bashkëpunimi me Advocacy Training and Resource Center (Qendra e Trajnimeve dhe Burimeve për Avokim).  

Marrëveshja u nënshkrua mes Drejtorit të Përgjithshëm të Akademisë së Kosovës për Siguri Publike Arton Berisha dhe Drejtorit Ekzekutiv të Advocacy Training and Resource Center Kushtrim Kaloshi.

Qëllimi i marrëveshjes është bashkëpunimin  ndërmjet dy institucioneve si dhe përkrahja e objektivave strategjike në fushën e trajnimeve për zbatuesit e ligjit.  

Gjatë nënshkrimit të marrëveshjes të dy palët ranë dakord të bashkëpunojnë përmes aktiviteteve  të përbashkët për trajnimin e zyrtarëve të zbatimit të ligjit në Republikën e Kosovës me temën \"Krimet e Urrejtjes\".

Më këtë rast  Drejtori i Përgjithshëm i Akademisë së Kosovës për Siguri Publike Arton Berisha tha se Akademia është e gatshme të lidh bashkëpunim më çdo institucion që merret më siguri më qëllim të avancimit të zbatuesve të ligjit.

Nënshkrimin e marrëveshjes se bashkëpunimit e mirëpriti edhe Drejtori Ekzekutiv i Advocacy Training and Resource Center  Kushtrim Kaloshi duke thënë se marrëveshja në fjalë  kontribuon për të mirën e të dyja institucioneve, Akademisë dhe  ATRC-së.

Të dyja palët vlerësuan se nënshkrimi i marrëveshjes hap shtigjet për bashkëpunim në fushën e trajnimeve që ka për qëllim avancimin e gjithë atyre që merren më fushën e drejtësisë dhe sigurisë.

Bazuar në marrëveshje të dyja palët u dakorduan që të marrin veprime të përbashkëta për të organizuar trajnime për zbatuesit e ligjit, përkatësisht palët e interesit të AKSP-së me temën \"Krimet e urrejtjes\"; ta mbështesin njëri-tjetrin në zhvillimin e kapaciteteve dhe aftësive për një potencial të plotë në ndërmarrjen e veprimeve për përmirësimin e reagimit institucional në lidhje me krimet e urrejtjes si dhe të japin ndihmë reciproke për të organizuar dhe zbatuar me sukses proceset e trajnimit etj.

Vushtrri, 05 gusht 2021 -  Drejtori i Përgjithshëm i Akademisë së Kosovës për Siguri Publike (AKSP) Arton Berisha priti sot në takim  Drejtorin e Përgjithshëm të Akademisë Diplomatike (AD) ambasadorin Sabri Kiçmarin.

Qëllimi i takimit ishte krijimi i bashkëpunimit mes Akademisë për Siguri Publike dhe  Akademisë Diplomatike.


Më këtë rast drejtori Berisha prezantoi disa nga objektivat dhe prioritete të cilat ka për qëllim t’i realizoj gjatë këtij viti. Duke prezantuar të arriturat e Akademisë drejtori Berisha  e informoi ambasadorin Kiçmari për trajnimet, aktivitetet dhe punën e bërë  në Akademi.

Po ashtu drejtori Berisha foli edhe për bashkëpunimin e vazhdueshëm që Akademia ka me institucionet e sigurisë vendore dhe ndërkombëtare në fushën e trajnimeve të zyrtarëve të sigurisë publike.

Duke u shprehur i gatshëm për bashkëpunim drejtori Berisha vlerësoj se shkëmbimi i përvojave mes Akademisë së Kosovës për Siguri Publike dhe Akademisë Diplomatike është i mirëseardhur dhe i domosdoshëm.


Ndërkaq Drejtori i Përgjithshëm i Akademisë Diplomatike ambasadori Sabri Kiçmari e njoftoi drejtorin Berisha për rolin e Akademisë Diplomatike. Ambasadori  Kiçmari në theks të veçantë foli  për fushën e trajnimeve të ndryshme që siç tha ai kanë për qëllim avancimin e zyrtarëve shtetëror, konkretisht  stafit diplomatik.
 

Vushtrri, 02 gusht 2021 -  Këshilli Shtetëror i Cilësisë (KSHC) i Agjencisë së Kosovës për Akreditim (AKA) ka marr vendim që të  riakreditojë programin e studimeve bachelor në Akademinë e Kosovës për Siguri Publike konkretisht në Fakultetin e Sigurisë Publike.

Vendimi është marrë  nga KSHC i Agjencisë së Kosovës për Akreditim (AKA)  në mbledhjen e mbajtur më datën 27.07.2021.

Këshilli Shtetëror  i Cilësisë ka marrë vendim për të gjitha raportet e ekspertëve ndërkombëtarë dhe në këtë mënyrë është krijuar mundësia për hapjen e konkurseve për pranimin e studentëve në vitin e ri akademik 2021/2022 në të gjitha institucionet dhe programet e akredituara në Republikën e Kosovës thuhet në vendim.


Vendimin për riakreditimin e programit studimor për periudhën tre vjeçare e ka mirëpritur Drejtori i Përgjithshëm i Akademisë së Kosovës për Siguri Publike Arton Berisha.

Berisha vlerësoi se riakreditimi i programit bachelor për siguri publike është një e arritur e madhe për Akademinë  dhe për gjithë zyrtarët e sigurisë publike.


Rreth vendimit ka folur edhe Dekani i Fakultetit të Sigurisë Publike Bejtush Gashi i cili tha se vendimi në fjalë nga KSHC i AKA-së është një lajm i mirë për stafin akademik, studentë dhe për agjencionet e sigurisë publike.

“Ky vendim për riakreditim konfirmon edhe një herë nivelin dhe përkushtimin e stafit akademik, administratës dhe studentëve në përmbushjen më sukses të objektivave të përcaktuara. Andaj ky vendim le të shërbej si motiv për zgjerimin e horizontit të dijes dhe hulumtimit shkencor nga fusha e sigurisë për të arritur rezultatet që ne i synojmë”, u shpreh dekani Gashi

Vushtrri, 15 korrik 2021 –  Në Akademinë e Kosovës për Siguri Publike, sot anëtaret e Bordit të Akademisë mbajtën takimin e radhës ku temë diskutimi ishte rrjedha e trajnimeve si dhe procesi i ri-akreditimit të programit të Fakultetit të Sigurisë Publike. 

Drejtori i Përgjithshëm i Akademisë së Kosovës për Siguri Publike Arton Berisha duke përshëndetur anëtaret e bordit,  tha se rrjedha e trajnimeve dhe zhvillimeve të aktiviteteve tjera është duke shkuar sipas planë programit të Akademisë. 

Pas aprovimit të procesverbalit të takimit të fundit të bordit, drejtori  Berisha  pasqyroj të gjitha  aktivitete dhe të arriturat e Akademisë që nga janari i vitit 2020 e deri me tani. 

Në fillim të mbledhjes anëtarët e bordit propozuan dhe zgjodhën kryesuesin e ri të tyre Samedin Mehmetin i cili është  Drejtor i Përgjithshëm i Policisë së Kosovës. 

Mehmeti pasi u zgjodh kryesues falënderoj anëtaret e bordit të Akademisë  dhe u shpreh i gatshëm për bashkëpunim. 

Temë më rëndësi gjatë takimi ishte edhe raportimi rreth procesit të ri-akreditimit të programit bachelor të Fakultetit të Sigurisë Publike, ku rreth këtij procesi anëtarët e bordit u njoftuan nga dekani i Fakultetit Bejtush Gashi. Gashi tha se deri më tani  rreth ri-akreditimit janë dhënë komente pozitive.

Gjithashtu gjatë takimit  u  diskutua  edhe caktimi i kuotave për regjistrimin  e studentëve në Fakultetin e Sigurisë Publike  për vitin akademik 2021/22. 

Anëtaret e bordit po ashtu u informuan edhe  rreth aprovimit  të standardeve të profesionit për trajnimet profesionale nga Këshilli Drejtues i Autoritetit Kombëtar të Kualifikimeve  dhe me procesin e rishikimit të planit të trajnimeve të AKSP-së për vitin 2021.

 Anëtarët e Bordit të Akademisë së Kosovës për Siguri Publike gjatë takimit vlerësuan se Akademia është shembull për organizimin e mirë jo vetëm në rajon, por edhe më lartë. Ata tha se deri më tani në Akademi është bërë një punë e shkëlqyeshme. 

Të pranishmit i ka përshëndetur edhe Drejtori i Departamentit për Rend dhe Siguri misioni i OSBE-së në Kosovë Erward Anderson, i cili i inkurajoj anëtarët e bordit dhe stafin e Akademisë për diskutimet dhe punën e bërë. 

Në këtë takim morën pjesë  Drejtori i Përgjithshëm i Akademisë Arton Berisha, Drejtori i Përgjithshëm i Policisë së Kosovës Samedin  Mehmeti, zv e Drejtorit të Përgjithshëm të Shërbimit Sprovues të Kosovës Metije Ademi,   Kryeshefi Ekzekutiv i Inspektoratit Policor të Kosovës Kushtrim Hodaj,   Drejtori i Përgjithshëm i Doganave të Kosovës  Agron Llugaliu, ud i Drejtorit të  Përgjithshëm të  Shërbimit Korrektues të Kosovës  Rasim Selmani,  Drejtori i Përgjithshëm  i Agjencisë për Menaxhimin Emergjent Fadil Kodra, Drejtori i Departamentit për Rend dhe Siguri misioni i OSBE-së në Kosovë Erward Anderson si dhe zyrtarë të lartë nga institucionet  përkatëse.