Vushtrrri, 12, qershor 2026- Në Akademinë e Kosovës për Siguri Publike, nga data 8 deri më 12 qershor 2026, u realizua trajnimi me temë “Hetimi dhe Reagimi ndaj Incidenteve Kibernetike” (Cyber Incident Investigations and Response Training), i ofruar nga Departamenti i Sigurisë Kombëtare i Shteteve të Bashkuara të Amerikës (U.S. Department of Homeland Security).

Në trajnim morën pjesë zyrtarë nga Policia e Kosovës, Agjencia e Kosovës për Forenzikë, Agjencia për Shoqërinë e Informacionit dhe Autoriteti Rregullator i Komunikimeve Elektronike dhe Postare.

Trajnimi kishte për qëllim avancimin e kapaciteteve profesionale në fushën e sigurisë kibernetike, me fokus në hetimin, analizimin dhe reagimin ndaj incidenteve kibernetike si pjesë e përpjekjeve më të gjëra kundër terrorizmit dhe kundër organizatave kriminale transnacionale.

Gjatë pesë ditëve të trajnimit, pjesëmarrësit u njohën me konceptet bashkëkohore të mbrojtjes kibernetike, metodologjitë e identifikimit dhe analizimit të kërcënimeve, proceset e reagimit ndaj incidenteve, si dhe me praktikat më të mira ndërkombëtare në këtë fushë.

Programi përfshiu ligjërata teorike dhe ushtrime praktike, të cilat mundësuan zhvillimin e aftësive për identifikimin e treguesve të komprometimit, analizimin e të dhënave relevante për hetime kibernetike dhe menaxhimin efektiv të incidenteve të sigurisë.

Trajnimi u përmbyll me një ushtrim praktik gjithëpërfshirës, ku pjesëmarrësit aplikuan njohuritë e fituara në trajtimin e një skenari të simuluar të një incidenti kibernetik.

Organizimi i këtij trajnimi paraqet një kontribut të rëndësishëm në forcimin e kapaciteteve institucionale dhe ndërinstitucionale në fushën e sigurisë kibernetike, si dhe në avancimin e bashkëpunimit me partnerët ndërkombëtarë në përballjen me sfidat e sigurisë në hapësirën digjitale.

Vushtrri, 11 qershor 2026 - Sot Akademinë e Kosovës për Siguri Publike (AKSP) e vizitoi Shefi i Misionit të Konsullatës së Përgjithshme të Republikës së Kosovës në Varshavë të Polonisë, Ambasadori Sh.T.z. Drilon Gashi. Ai u prit nga u.d. i Drejtorit të Përgjithshëm të AKSP-së, z. Shpend Shabani, me bashkëpunëtorë.

Drejtori Shabani e njoftoi Ambasadorin Gashi për historikun e zhvillimit, mënyrën e funksionimit dhe detajet e organizimit të brendshëm, si dhe nivelin, sukseset dhe rezultatet e arritura së fundi nga Akademia.

Ai po ashtu e njoftoi atë edhe për bashkëpunimin e AKSP-së me Universitetin e Zjarrfikjes në Varshavë të Polonisë, bashkëpunim i cili deri më tani funksionon përmes Marrëveshjeve Ndër-Institucionale të të dyja institucione në kuadër të programit Erasmus+ të Bashkimit Evropian.

Shabani po ashtu i shprehu gatishmërinë Gashit për mundësitë e thellimit dhe zgjerimit të bashkëpunimit të AKSP-së edhe me Universitetin e Zjarrfikjes në baza dypalëshe, por edhe me institucione tjera relevante të Polonisë që mbulojnë fushën e trajnimit profesional dhe arsimit të lartë në sigurinë publike, përkatësisht zbatimin e ligjit.

Nga ana e tij, Ambasadori Gashi vlerësoi lart përpjekjet dhe të arriturat e Akademisë në drejtim të arritjes së standardeve ndërkombëtare dhe të sukseseve të njëpasnjëshme në fushën e arsimit dhe të trajnimit në sigurinë publike, të cilat shfaqen edhe në performancën dhe sukseset e të gjitha gjashtë institucioneve të sigurisë publike të Kosovës, si brenda po ashtu edhe jashtë vendit.

Ai foli me konsideratat më të larta për të gjitha këto rezultate dhe suksese, duke shprehur gatishmërinë e tij që të ngrisë dhe thellojë edhe më tutje bashkëpunimin e AKSP-së me institucione të ngjashme nga Polonia.

Në fund të takimit, Ambasadori Gashi vizitoi hapësirat e kampusit të Akademisë dhe pati rastin që me një fjalim të shkurtër t’i drejtohet kadetëve të Gjeneratës 63 të Policisë së Kosovës, të cilët aktualisht po e ndjekin trajnimin profesional në Akademi.

Vushtrri, 26 maj 2026 - Kryeministri i Republikës së Kosovës, z. Albin Kurti, dhe Ministri i Punëve të Brendshme, z. Xhelal Sveçla, u pritën sot në Akademinë e Kosovës për Siguri Publike nga u.d. Drejtori i Përgjithshëm i AKSP-së, z. Shpend Shabani.

Në këtë vizitë morën pjesë edhe Drejtori i Përgjithshëm i Policisë së Kosovës Kolonel Gazmend Hoxha dhe Zëvendësdrejtori i Përgjithshëm i Policisë së Kosovës, Kolonel Fehmi Hoti.

Gjatë takimit prezantues, Drejtori i Përgjithshëm i AKSP-së prezantoi zhvillimin institucional të Akademisë, modelin unik të integruar të trajnimit dhe arsimit në siguri publike, të arriturat kryesore institucionale, proceset e akreditimit vendor dhe ndërkombëtar, zhvillimin e programeve akademike dhe profesionale, si dhe orientimet strategjike të Akademisë për periudhën e ardhshme.

Në kuadër të prezantimit u theksua roli i AKSP-së si institucion i vetëm publik në Republikën e Kosovës i specializuar në trajnimin profesional dhe arsimin e lartë në fushën e sigurisë publike, duke ofruar programe trajnuese dhe akademike për Policinë e Kosovës, Shërbimin Korrektues të Kosovës, Shërbimin Sprovues të Kosovës, Doganën e Kosovës, Agjencinë e Menaxhimit Emergjent dhe Inspektoratin Policor të Kosovës.

Kryeministri Kurti vlerësoi progresin dhe zhvillimin institucional të Akademisë së Kosovës për Siguri Publike, duke theksuar se: “Akademia duhet të fuqizohet dhe të zhvillohet jo vetëm si institucion mbështetës për mekanizmat e sigurisë, por edhe në dimensionin e saj akademik dhe hulumtues, përmes analizave strategjike, studimeve profesionale dhe kontributit në hartimin e politikave të sigurisë. Mbështetja jonë në të gjitha këto drejtime do të vazhdojë të jetë e plotë dhe e parezervë, me synim forcimin e mëtejmë të Akademisë si institucion i rëndësisë së veçantë për sigurinë dhe zhvillimin institucional të Republikës së Kosovës”.

Ndërsa Ministri i Punëve të Brendshme, z. Xhelal Sveçla, vlerësoi rolin dhe rëndësinë e Akademisë në zhvillimin profesional dhe institucional të mekanizmave të sigurisë publike, duke ritheksuar mbështetjen për avancimin e mëtejmë të AKSP-së.

Në pjesën e dytë të vizitës, Kryeministri Kurti dhe Ministri Sveçla së bashku me Drejtorin e Përgjithshëm të AKSP-së dhe PK-së zhvilluan drekë të përbashkët me kadetët e Gjeneratës së 63-të të Policisë së Kosovës, ndër të cilët janë edhe dy djemtë e zyrtarëve policorë të rënë në krye të detyrës, Sokol Enver Zymeri dhe Jetlum Afrim Bunjaku.