NewsArticle

Charlotte, Karolina e Veriut, 4 qershor 2025 - Akademia e Kosovës për Siguri Publike (AKSP) ka pranuar Çmimin e Ekselencës "Award of Excellence" nga IADLEST – Shoqata Ndërkombëtare e Drejtuesve të Standardeve dhe Trajnimeve të Zbatimit të Ligjit me seli në SHBA, si pjesë e procesit të suksesshëm të riakreditimit të vitit 2024.

Kjo ngjarje e rëndësishme është duke u zhvilluar në kuadër të Konferencës vjetore të IADLEST, që po mbahet nga data 1 deri më 4 qershor 2025 në Charlotte, Karolina e Veriut. Marrja e këtij çmimi konfirmon përkushtimin e Akademisë së Kosovës për Siguri Publike për të ruajtur standarde të larta institucionale në trajnimet për sigurinë publike dhe zhvillimin profesional të zbatuesve të ligjit.

Çmimi i Ekselencës i është dhënë Akademisë (AKSP) deri në vitin 2028, duke njohur dhe konfirmuar përmbushjen me sukses të kritereve ndërkombëtare të cilësisë në procesin e riakreditimit nga IADLEST në vitin 2024. Ky është një dëshmi e fortë e profesionalizmit dhe përkushtimit të vazhdueshëm të Akademisë për përmirësimin e standardeve në arsimimin dhe trajnimin e zyrtarëve të sigurisë publike në Kosovë.

Në emwr tw Akademisw sw Kosovës për Siguri Publike, Çmimin e Ekselencës e pranuan përfaqësuesit nga Menaxhmenti i Lartë, Kastriot Jashari, Drejtor i Departamentit të Trajnimeve dhe Përkrahjes Arsimore dhe Rrahim Rexha, Drejtor i Departamentit të Financave dhe Shërbimeve të Përgjithshme.

Konferenca e IADLEST-it këtë vit trajton temat më të rëndësishme për udhëheqësit dhe menaxherët e trajnimeve në fushën e sigurisë dhe ligjzbatimit, duke përfshirë: dizajnin e kurrikulës, përfshirjen e inteligjencës artificiale në procesin mësimor, teknikat e mësimdhënies për gjeneratën e re, platforma trajnimi me realitet virtual, standardet e testimit, dhe matjen e efektivitetit të trajnimeve.

Pjesëmarrja e Akademisë së Kosovës për Siguri Publike në këtë konferencë të nivelit të lartë dhe pranimi i çmimit të ekselencës janë një hap i madh drejt avancimit të mëtejshëm të cilësisë dhe njohjes ndërkombëtare të sistemit të trajnimit për sigurinë publike në Republiken e Kosovës.

Vushtrri, 13 maj 2025 - Sot Akademinë e Kosovës për Siguri Publike e vizitoi delegacioni i përfaqësuar nga niveli i lartë i udhëheqjes së Komunës Växjö, i udhëhequr nga Maja Bebeljak,si dhe ish-kryetari i kësa komune,Bo Frank shoqëruar nga menaxhmenti i lartë i Komunës së Vushtrrisë, udhëhequr nga Melihate Basholli, kryesuese e Kuvendit Komunal në Vushtrri.

Ky është delegacioni i dytë nga Komuna Växjö e Suedisë që viziton Akademinë e Kosovës për Siguri Publike, derisa vetëm pak javë më parë një tjetër delegacion, po nga kjo komunë ishte në vizitë në akademi.

Edhe kjo vizitë sikur edhe vizita parapkrake vjen si rezultat i bashkëpunimit të komunës suedeze me Komunën e Vushtrrisë, në të cilën edhe gjendet Akademia dhe të cilat ndajnë tradicionalisht përvojat në fusha të ndryshme. Delegacionet nga të dyja komunat u mirëpritën nga udhëheqës të lartë të akademisë, të cilët i njoftuan mysafirët për organizimin, rolin, përgjegjësitë dhe të arriturat e Akademisë, duke përfshirë historikun e saj dhe planet për të ardhmen.

Vizita e përfaqësuesve të lartë të komunës suedeze kishte në fokus ndarjen e përvojave e praktikave në kuadër të funksionalizimit të Akademisë si i vetmi institucion publik trajnues dhe arsimor në Kosovë për përgaditjen profesionale të zbatuesve të ligjit.

Për më tepër, në këtë takim u diskutua edhe për mundësitë dhe gatishmërinë për një iniciativë të bashkëpunimit të AKSP-së me institucionet përkatëse të trajnimit të sigurisë publike të Komunës Växjö dhe në përgjithësi të Suedisë.