Filloi mini-olimpiada për persona me aftësi të kufizuara
Vushtrri, 25 qershor 2016 - Në Akademinë e Kosovës për Siguri Publike (AKSP), sot filloi mini-olimpiada për persona me aftësi të kufizuara.
Në hapje e mini-olimpiadës morën pjesë, ministri i Punës dhe Mirëqenies Sociale Arban Abrashi, Drejtori i Përgjithshëm i Akademisë Ismail Smakiqi, komandanti i KFOR-it gjeneral Guglielmo Luigi Miglietta, shefi i misionit të OSBE-së Jan Claude Schlumberger, kryetarja e Komitetit Paralimpik, Njomza Emini si dhe përfaqësues tjerë nga institucionet vendore e ndërkombëtare.
Njomza Emini, presidente e Komitetit Paraolimpik vlerësoj lartë mbajtjen e garave për personat me nevoja të veçanta. Ajo tha se është duke u shënuar progres në njohjen e komitetit paraolimpik nga ndërkombëtaret.
Emini tha se mbajta e mini-olimpiadës jep mundësi që secili garues të tregojë vetën, “Garat e juaj do të vlerësohen me kupa. Ju uroj të gjithëve suksese në garat dy ditore”.
Ambasadori i OSBE-së në Kosovë, Jean-Claude Schlumberger tha se lojërat miniolimpike janë një ngjarje e mrekullueshme, është një shembull i shkëlqyer se si sportet dhe rrjetet mund të bëjnë një ndryshim për fëmijët dhe jetën e tyre.
Schlumberger duke folur rreth rëndësisë se garave mini-olimpike, tha se ngjarjet e tilla japin mundësi garuesve që të tregojnë aftësitë dhe talentin e tyre personal dhe të marrin pjesë në shumë aktivitete sportive.
“Ngjarje të tilla si ngjarja e sotme duhet të përqendrohen në aftësitë dhe jo aftësi të kufizuara për të ndihmuar në rritjen e vetëdijes publike për rëndësinë e respektimit të drejtave të të gjithë njerëzve për të shfaqë kapacitetet që kanë”, tha Schlumberger.
Për të pasur rezultat Schlumberger tha se institucionet e Kosovës duhet të trajtojnë rastet e diskriminimit, për shkak që personat me nevoja te veçanta të ndihen më të përfshirë dhe më mirë.
“Ne të gjithë duhet të punojmë së bashku për të përmirësuar gjendjen e personave me aftësi të kufizuara. Ne do të ndajmë me ju praktikat më të mira lidhur me standardet ligjore ndërkombëtare dhe vendore mbi mos diskriminimin e personave me aftësi të kufizuara dhe për zbatimin e këtyre standardeve në praktikë”, tha ai.
Duke falënderuar të gjithë ata që punuan në organizimin e mbajtjes së kësaj mini-olipiade, ambasadori i OSBE-së Schlumberger tha se ngjarja e tillë duhet të mbahen gjithmonë.
Komandanti i KFOR-it gjeneral Guglielmo luigi Miglietta u shpreh i lumtur që ishte pjesë e kësaj ngjarje të rëndësishme. Ai me këtë rast falënderoi KFOR-in për përkushtimin e tyre që të kontribuoi në realizimin e këtij aktiviteti. “Gjithashtu këto aktivitete mundësojnë se çka mund të bëjmë se bashku. Kjo ngjarje është njëra ndër aktivitetet me të rëndësishme në Kosovë”, tha Miglietta.
Ndërkaq Ministri i Punës dhe Mirëqenies Sociale, Arban Abrashi, tha se organizimi i mini-olimpiades, aktivitet i i cili tani po merr formë tradicionale, ka një rëndësi të veçantë në shoqërinë tonë. Abrashi tha se me aktivitete të tilla ngritët vetëdija e gjithë qytetarëve të Republikës së Kosovës.
Ministri Abrashi falënderoi KFOR-in, shefin e misionit të OSBE-së Schlumberger, dhe të gjithë përkrahësit
Gjatë fjalimit Abrashi theksoi rëndësinë e mbajtjes së mini-olimpiades, veçanërisht për ministrinë e punës duke ndihmuar atë që të hartoj politika më të mira për të marrë iniciativa të punësimit, të aftësimit, të trajnimeve si dhe iniciativën për plotësim ndryshimin e ligjit, riaftësimin e personave me aftësi të kufizuara, falë ngjarjeve si kjo.
Në fund ministri Abrashi falënderoi, Drejtorin e Përgjithshëm të Akademisë Ismail Smakiqi për përkrahjen e vazhdueshme të mini-olimpiadës.
Drejtori i Përgjithshëm i Akademisë së Kosovës për Siguri Publike Ismail Smakiqi, i uroi mirëseardhje në Akademi pjesëmarrësve duke theksuar se për Akademinë mini-olimpiada për persona me aftësi të kufizuara është një ngjarje mjaft me rëndësi duke fituar edhe statusin e një aktiviteti tradicional.
Ai tha se Akademia është e gatshme çdo herë të përkrah dhe të ndihmojë çdo qytetarë të Republikës së Kosovës.
“Vetë organizimi i mini-olimpiadës tregon rëndësinë e përfshirjes dhe ofrimit të mundësive të barabarta për secilin anëtarë të shoqërisë sonë”, tha Smakiqi.
Në fund Smakiqi përshëndeti të gjitha institucionet që kanë përkrahur mbajtjen e këtij aktiviteti duke shpreh një falënderim të veçantë për institucionet e sigurisë si Policinë e Kosovës, KFOR-in si dhe agjencione tjera të cilët ishin prezent në përkrahje dhe ndihmë për pjesëmarrësit e mini-olimpiadës.
Mini-olimpiada “Kosova 2016” është organizuar nga Komiteti Para-Olimpik i Kosovës dhe OPFAKOS “Prindi e Fëmiu”, dhe është përkrahur nga KFOR-i Italian, OSBE-ja dhe AKSP.